Filha de Teodòr II, l’emperaire de Nicea, Eudòssia Lascaris venguec se mariar a Tenda en val Ròia. Montet al lòng de l’aiga eschumarèla e trobec son espós, lo conte Guilhèm Peire I, que l’atendia ailamont al metz di bòscs e di crests.

L’amor arlamec lo recòrd di clars cèls d'orient, l'estent per las caravanas boraas de tota sòrt de marchandisas: marchants, cavals, gamèls que jorn après jorn artibavon al palais de l’emperaire dai país mai luenhs de la tèrra.

Caravanas que portavon seas de China, encens d’Aràbia, esmeralds de l’Índia e peliças de las forestas iperbòreas.

Fritaa a las ortias (Valadas occitanas)

Conilh en crosta (Provença)

Torta de brinhas a la mòda de Tenda (Valadas occitanas)

Fritaa a las ortias

Ingredients:

1 maçolin de buts d’ortia

9 uous

1 ceula

1 ecto de fromatge

sal e peure

2 culhiers d’ueli d’oliva

Preparacion:

Chapolar la ceula ben fina e la còire a la paèla. Quora la ceola rossís ajontiar las ortias chapolaas finas e frigolear plan plan, ianlai 10 menutas.

Entrementier dins un griletòt esbate uous e fromatge gratat ambe sal e peure, puei colar lhi uous sus las ortias, betar dins un paèla e còire fin que la fritaa se fai. D’en darrier virar la fritaa aquò sot sobre abo la cubercèla e l’assolar mai dins la paèla. Finir de la còire e la portar vite sal desc.

Conilh en crosta

Ingredients:

1 conilh de 2 quilos

4 culhiers d’ueli d’oliva

3 culhiers de farina

1 pichòt veire de cognac

1 quart d’aiga bulhenta

4 ectos de ceulòts

4 ectos de champairòls

4 ectos de jambon talhonat a carronets

una punhaa d’olivas vèrdas sensa garilh

laurier, serpol, rosmarin

sal e peure

1 paquet de pasta fròla

Preparacion:

Per desosar mielh lo conilh, far de tòc gròs e lhi rossir a fuec ben ardit.

Un viatge desossat, asolar lhi talhons de conilh dins na caçairòla de guisa ensemp a un pauc d’ueli e frigolear dos-tres menutas. Ajontiar lo Cognac e flamar, puèi ajontiar la farina e mesclar fin que s'endòra. Totjorn en varalhant, versar n’estiç al bòt l’aiga bolhenta e far la sausa ben eigaliera. Après d’aquò ajontiar lhi ceulòts, lhi champairòls, jambon, laurier, serpol, rosmarin, sal e peure.

Cubercelar la caçairòla, còire a pichòt fuec n’autra bèla mesora, puei, d’en darrier, jónher tanben las olivas. Emburrar na tortiera ambe lhi bòrds auts e dedins sembuar la pasta fròla. Versar lo conilh de la caçairòla de guisa, acoatar ambe n’autre fuelh de pasta fròla e esquichar la pasta lòng di bòrds per sarrar tot ben. Betar lo tortiera en forn na mesoreta, puei portar ben chaud sal desc.

Torta de brinhas a la mòda de Tenda

Ingredients:

6 ectos de farina

2 uous

1 veire d’aiga

3 culhiers d’ueli

1 quilo de brinhas sensa garilh

1 ecto de sucre

Preparacion:

Còire la brinhas e entrementier empastar farina ambe uous, aiga e ueli. Esparte la pasta en quatre e, abo lo lasanhaor, far de reond gròs coma un platèl. Dui siervon per far lo fons e lo cuburcèl e van mai espés.

Prene un reond mai espés e l’assolar sal fons dal platèl. Cuérber abo las brinhas cuechas, dessus espantear lo sucre, puei asolar n’autre reond de pasta d’aqueli mai prim e contunar com’aquò: un sòl de brinhas e un de pasta.

D’en darrier cubercelar abo un reond d’aqueli mai espés e possaraiçai ailai lo dessus, abo lo det gròs, que s’arsete; puei espenelar de lach e ueli esbatuts e còire esquasi un’oreta dins lo forn mitat chaud.