Filha de Francesc de Bardonescha, que dins lo secol XIV era senhori de la valada d’Ols e chastelan en auta val Varacha, que despei n’en dison la Chastelada.

Clotilda avia na beutat coma de las flors menuas en montanha.

Aquela flor, Guigo VIII, lo dalfin, un jorn la raubec.

Francesc, tuquin per onor, s’arvirec a sio senhori. Des ans se batec partijan al mes de las montanhas dal Briançones, e quora a la fin lo preneron foguec condamnat a mòrt.

Qualqui temps après dequò lo dalfin moriguec a la guèrra, centrat d’un balestrier dal temps d’un assetge.

Clotilda demorec soleta, abo Jan, l’enfant naissu da l’amor furiós de jove Guigo.

Bòudra (Valadas occitanas)

Piòtas e tripa d’anhèl (Provença)

Salada de morreporcins a la mòda de Montpelhièr (Lengadòc)

Torta d’Ais de Provença a las levòtas (Provença)

Bòudra

Ingredients:

8 ectos de chastanhas blanchas

1 litre e metz de lach

1 litre e metz d’aiga

1 ecto e metz de ris

1 noisa de burre

sal

Preparacion:

Betar las chastanhas dotze oras a trempar dins l’aiga tebia.

Un viatge escolaas e neteaas, las betar dins na raminaa d’aiga e lach; ajontiar bur e sal e còire un parelh d’oras a pichòt fuec.

D’en darrier, quora las chastanhas son bèla cuechas, ajontiar lo ris e laissar sal fuec fin qu’es cuech.

Piòtas e tripa d’anhèl

Ingredients:

1 tripa d’anhèl

2 piòtas d’anhèl flamaas e just passaas al bulh

3 ectos e metz de ventresca o jambon crut

2 fiscas d’alh

1 punhaa de persil

1 pòr

1 ceula

1 caròta

2 tomàticas

4 clòs de garòfol

metz litre de vin blanc

2 litre de bròd

serpol, rosmarin, laurier

sal e peure

Preparacion:

Netear la tripa e n’en far de carronets de 7 cm.

Betar ensemp la ventresca (o lo jambon crut), ‘na fisca d’alh, lo persil, lo peure, la sal e aprestar l’emplum.

Asolar n’estiç d’emplum sus chasque carronet de tripa, auçar lhi bòrds, plegar e gropar la tripa ambé na ficèla. D’en darrier eissuar lhi carronets abo lo papier que chucha, puèi, dins na pinhata, fricassar lo pòr e la ceula chapolats fin. Jónher las tomàticas, lhi clòs de garòfol, lo vin blanc e lo bròd. 

Asolar las piòtas dins la pinhata, ajontiar la tripa, lo serpol, lo rosmarin, lo laurier, alh, sal e peure. Empastar farina e aiga: n’en far na pastela espessa per sarrar tot d’entorn, al lòng di bòrds, lo cuburcèl la pinhata. Betar ental forn a chalor mesana e còire plan planet 6-7 oras, puèi portar sal desc.

Salada de morreporcins a la mòda de Montpelhièr

Ingredients:

2-3 punhaas de morreporcins

ueli d’oliva

asit

sal

de pichòtas rostias

alh

Preparacion:

Es la reina de las saladas de lhi prats: ariba la premiera. E coma es tenra !

Betar la sal dins lo saladier, ajontiar ueli e asit, varalhar abo un culhier de bòsc, puei betar lhi morreporcins e virar la salada dos tres bòts que se conduche ben. D’en darrier ajuntiar las rostias fretaas ambé l’alh.

Torta d’Ais de Provença a las levòtas

Ingredients:

per la pasta

1 ecto de burre

3 ectos de farina

mesa bòla escarsa de sucre a vel

mes ecto de pols d’amandas

1 uou

per la crema:

1 ecto de burre

mesa bòla escarsa de sucre a vel 

1 ecto de pols d’amandas

2 uous

2 culhiers de rom

mes ecto de levòtas

Preparacion:

Mesclar tot çò qu’ilh vai per la pasta. Far lest a empastar, puei sembuar la pasta al mòio emburat.

Far la crema: betar ensemp burre, sucre, pols d’amandas e mesclar.

Ajontiar lhi uous e mesclar fin que la crema es bèla soatina e eigaliera. Versar lo rom, puei, d’en darrier, asolar la crema sla la pasta e après las levòtas. Enfornar a chalor mesana 35-40 menutas. Esfreisir e portar sal desc.