A dì se nosto gent ariben d'anà d'acorde e de fa de trabai ensem es pa péi tan bel fa! L'a sempre agù aquihi que ruziàven coume l'a sempre agù aquihi que s'ajutàven.
Ma dich ishò, la fai manco de veire de l'a agù de chambiament e se i soun stà envers lou miei ou envers lou pejou. Per lou proublemo que nou enteresso, me semeho que pouén esse tuchi d'acorde que n'iage l'avìo ben pus de coulabourasioun que oouro.
Jo mec la coustumo de cazià i partament un dapé de l'aoute, ent'al mentre que din la piano i an sempre fach de casine da louenh, fai veire que ai nostri reire la i piazìo pa de vive da soulet. Acò pouhìo vene da la poou di loup ou di brigant, ma mec d'acò que se sent a countà ou d'acò que se pol encà veire a lou journ d'encùi, l'ero decò que i nosti viei avìen pa tante malisie que oouro, e sicoume la coumpanìo i piazìo vivìen pitouest ensem.
Bou 'co, couro la capitavo, i fazìen voulentìe i rueide per la Cumuno ou per lou vezin. Se apré la se boouco la vachairo ou la chabrairo sen pa louenh d'aquello ideio que al journ d'encui i dìen «stalla sociale».
E se belou i sarén sempre stà estachà a lou touquet de tero chal decò dì que l'avìo pa na grando diferenso entrà lou ric e lou paoure, coume ensinto pouìo cadde ent'la piano. Cante i avìen da marià na fiho, laissaven encà souvent ganhà lou sentiment senso boucà se l'espous avés péi agu doue vache de menu.
Coume ei-lo capità, alouro, que i coze van pa pus 'ma 'n bot?
Sent an passà i ruziàven soubre de tout entrà fraire per i enteressi di divizioun. Denan l'ero i fraire de doue maire e apré l'ero i fraire de la Franso. I pus viei que i éren anà 'qui-oouto i voulìen .tout perqué l'ero stà lour que i avìen enlevà la famiho bou i sordi qu'i avìen mandà ishai; i pus jouve voulìen tout perqué l'ero stà lour qu'i avìen cudì paire e maire da viei: bou 'co i engrisàven i avoucat.
Apré, i doue guere moundial per roumpe lou moural de la gent i an fach pus que fà. Per la primo guero moundialo l'a aguù de rouà que i an perdù tuoto na generasioun. Fin la modo a chambià: i mouchet de la testo di freme denan i éren de couleur alegre; apré esquazi toute i avìen de mort ent'la famiho e i butaven nìe, e aquelle poque qu'i éren pa stà touchà ancalàven pa pus a butà-i rous ou jaoun.
La secoundo guero moundialo es stà la guero dal «fascismo», bou i mort de la Russio e la oucupasion di Tedesc: tout dich!
Se sà ben, que couro i coze van mal la gent soun malcountent, se souporten pa tan, la i semeho que lou vezin sie vengù marì, na bordo ven 'n lenh e i ruze sòrten. Se sà decò ben que cante se fai l'escur ou i coze viren mal, i jouve pratìquen pa tan i bal, i chansoun e i coumpanìe; coum'acò da omme i soun pa pus tan unì.
Apré la guero nou pa fa carcozo per la mountanho, 'n paou de coumandaire an sercà de moustà a nosto gent lou vive, que lour dìen sivil e que mi diou sarvage. Diou sarvage perqué vol dì que la cozo pus empourtanto ent'la vito l'es de pasà denan a i aouti, de ganhà pa per stà miei ma per ganhà de pus que i aouti, de coumandà i aouti.
Bou 'co pré, denan i ne vai mec un e i aouti résten arìe, malcountent e difident un de l'aoute. E bou la difidenso e la mancanso de amichisio se parlo pa gaire de coulabourasioun.
Ma es panca tout perdù!
Carcun se rend jo count de l'enjan que sarìo, pensà que la valour de la vito es mec de passà denan de i aouti, d'esse superbi e de coze pareie. Apré isi-amoun, tout ensem, l'a encà pus de coulabourasioun que en d'aouti cant.
Soubre de tout, cante sa parlo de coulabourasioun vol péi dì de mantene e de retroubà uno di coze bone que i nosti paire avìen, magaro adatà ai nechessità d'oouro, e pa d'enventà de coze de n'aoute mounde.
E se lour soun sta capable, nouzauti lou saren-cou pa decò?