Tuchi sabèn que l'uvern es ben dur e lonc en mountanho, 'mbe la nèou, lou guias e lou freit que nous tenoun companhò per ben set mes a l'an.
Tuchi, ou escazi tuchi i travai de campanho, que soun pres que la souleto fouont de i jò pichot ganh, se rendoun empousible.
La gent se saro dedin i estabi a souanhar aqueles cattre besties qu'i on. Per ganhar en pàou de mai chariò tenir ben de besties, ma l'istà es trop court e lou fen de mal rebeìr.
Coumo se fai a far ben de fen se la vai mai de temp a pourtar a la meizoun na trousso, que la sehar, la rastelar e la far!
I pra lei sariòn de groses prataries von en malouro just perqué 'mbé les vieies manieres la counven pa pus de anar fin eilamoun a far lou fen. La chariò de vìes, tontes vìes; se nou pa que 'mbé la lieio ou 'mbé la mulo, en pougues lei anar 'mbé i trattour, e n'en charjar de baroun per bot, la resparmiariò tontou temp e tonto fatigo e la rendariò ben de mai.
E se la rendes carcaren de mai, i jouve sariòn pa oubligà de se n'anar, de laisar lour pais, lour tero, lour gent, i sariòn pa oubliga de laisar lour meizoun que apres von en rouvino, lour ambient natural 'nte i soun neisù e creisù, sigurament en trubulant, ma 'nte resto lou cor, i sariòn pa oubligà de dementiar lour lengo que tuchi lour reire on sempre parlà ben fier e se umiliar a n'en parlar n'autro que lour dì pa ren, a perder lour persounalità 'nte n'ambient inumon, fach de na souchetà 'nte un chercho de pasar dron a l'outre, ma pa per si merit, a fouorso
envece de raccoumandasioun ou de autres manieres que 'mbe la cousienso on pagaire a que veire; cozes que i vitoun beisà da la mountanho poloun pa far, ma que james i fariòn bele se i pouguessoun.
Ma ei post des vìes per la campanho que poulariòn ajuàr direttament la gent de la mountanho a fermar sa spoupoulasioun, carque nouostre rapresentont a la prouvincho, nou proumet de sejouvìes e de empiont per lou tuorisme, que, sabén tuchi, rent mac a carque capitalisto fourestier e a nous autres rouino en maniero enreparablo l'ambient de vito e nou oubligo a scapar.
L'on pasà, a la meità de mars l'ei vengù en baroun de n'ou, coumo s'ero james vist, l'a beisà toutes lavonches que on bloucà les vìes: senso lumiero eletrico e senso telefono per tres ou cattre journ. E mentre carque malate rescavo de murir, senso les cures dei medic, i nouostre rapresentont prouvinchal, que puro eroun ei courent d'aco, faziòn durbir e perder temp a slargar e aranjar a la perfesioun les vies de Pountechanal que i eroun jo duberte.
Ent'aquesto maniera i touriste pouion viajar ben coumode e portar lour soldi a i empiont de tourisme de l'uvern, per lou avantage de qui sabèn!
E sicoume les vies que nous descouren soun de la prouvincho es natural que nou demanden se i raprezentant prouvinchal sabiòn so que la capitavo e soubre de tout so que i faziòn per lou ben ou per lou mal de la gent de montanho.
La gent de Blins se sent trascurà, perqué apres an aquest fach, ajountà a d'aoutres, i on perdù touto la counfianso qu'i aviòn dounà an aquisti responsable, e tuchi on pòu perquà l'uvern es encà lonc e aquelo cauzo poulariò encà capitar d'aoutres bot.