Per la gent des cità lou tourismo es n'a gron caùso maraviouzo; per nous aùtre d'eïçì assus eï nous pouorto mac dalmage e nueïo.
La diamenjo ou i jour dé vaconsès i veïé nous pa arribar coumo la nebbio basso que sé ficho din tuchi cantoun, leïssont la mïnà senso coumont, anar cuïr de fiour din i pro senso sé cruciar si vou chalear l'èrbo qu'aven peï ton dé péno a séar? Senso parlar des «escatoulettes» e di papier gras qui laïssoun a rabel en paù dapertout e que trouben peï a la poucho de nosti daï ou din la goulo de n'a vacho en tren d'ou macharélar. La l'eï n'a même que per anar se bétar a l'oumbro passoun sus trés ou catre prà embé lour «automobil» senso se rende counte qui rouvinoun l'enreïsuro de nostre fen. Que chal pensar d'aquello gent? Qui s'en foutoun? Qui s'en foutoun? Blòu pa! Chario pu vite creïré qui sé rendoun pa counte deï dalmage que pouortoun à la gent deï peïs.
I coumprénoun pa que cont i pistoun l'èrbo di prà i gastoun en paü d'aquello richesso qué faï vioùre la gent deï cantoun e que faï decò lou bounur e la joïo de lour jour de proumenado.
N'effet, s'i venoun eïçi assus l'eï per troubar la frescour de la mountanho, per veïre la beltà di prà en fiour, en soumo per esser pu proch de la naturo. Ma chal pa qui nous la massacroun aquello belta que la naturo nous a douna e que nosti vieï on enrichì de lour mon groussières e calouses.
Per couontro l'eï pa lou tout de parlar deï mal qui poïoun nous far tuchi aquié salvajoun: ma chario blòu i troubar lou remedi. Ma per acò farello pa a nouzaùtre, de proch ou de luenh de proupousar lou mouïen, disen pa de «chivilisar», ma d'esducar aquello paùro gent inhourento des bouones manieres deï vioùre en comun. Chal que lour fasoun coumpréne soque vol dir lou mout «libertà». Chal que embè de panel, de cartes, de festes, de libres, lour emprenon so qui on pa pougù r'tenir a l'escolo... Chal ben qui se betoun din la testo que la libertà vol pa dir destrussion senso foundament ni pourtar dan a n'aquié qui creïoun pu «deboul». L'ea meme un filosofe qu'a scrich que le libertà coumenso e fenis eï moument ente i pouorto pa tort a n'aquello di aùtre.
L'eï de bel dir chario troubar un remedi, ma soque chario soubretout troubar l'eï de piacel perqué nosti visitour poïssoun betar lour automobil e pouïssen lour defende d'es betar ente se sio.
Chario decò lour far coumpréné que la serio magaro mieï per tuchi si chaminesoun din les draïes ou i viol senso pistar l'erbo aùto di pra.
Pourion encaro lour troubar carquè cantounet per minjar din l'erbo da vezin a en béalot ou en réòur. Pourion decò prouvar de lour vendé carquè prouduch deï peïs so que nous ménario per i pu ingenious carqué soldi de maï a se betar din l'escarsello. E tout acò, embe d'aùtres ideïes, farìo blòu que gruincharion pa ton brut nosti visitour senso geno e proufitarion tuchi, is, e nous, de lour nouvello educassioun e de lour nouvel modo de pensar, que apres tout n'en val ben d'aùtre.