L'abandoun massiou d'la mountanha e d'la coulina - dou poei armen dez an - d'la part di pîzan, nouz a pourtà d'enorme dann a cauza d'lâ pioeve.
Cand i avia li pîzan, i travaievevë lou sol (lavourage, sapage, ecc.) e meime profoundamënt ma ën meine tëmp i lou gardavë presiouzamënt oud tanti fousal quë - sampe entertengù - pourtavë i aigue - pu divizâ quë pousible - ënt i coumbal. E cand la piouvìa aversa li pîzan, oud un sac de strojou su i espale, anavë sourveiâ, oud la sapa, quë i aigue couressën ënt i fousal sensa pourtâ dan ar sol. Lou campanhard era lou pu ëmpourtant defensour dar teren: l'era el quë fëzìa lou goùern minusious d'i'aigue d'lâ pioeve, ouperasioun foundamentala per reduire, lou pu pousible, li dan su li pendeis e ënt ar pian. Ai nosti journ, la prepoutënsa dë i industrie, d'i coumersi, d'iempieg statal, d'lâ prouvinse, d'i Cumun, etc., coumbinà oud i sampe pu mizerable arvengù d'la campanha, an, per fòrsa fâ scapâ li campanhard, surtout li pu jouve, dar travai d'la tera ënt lâ couline e ënt lâ mountanhe; ën efet l'é pa just countinue ad ese d'om sfrutà. Couma councluzioun lâ mountanhe e lâ couline soun restà sensa countrol per la proutesioun dar sol e a coumensë dengeroezamënt a arvinâ: surtout, su la basa mountanha e su la coulina, dount la pioou pu a lounc (surtout ai mes dë mars, d'avril e de nouvëmbre, mentre su la mouienna ed aouta mountanha, a tala epòca, la fioca caize sampe) nouz an verifìa (nouvembre 1968 blî - mars 1972) d'inoumbrabbe arvine. Se la fenoumène vai agravase - e la situasioun nouz oblija a pensâ mal - nouz devë prevëde dë grandi dann, pâ just a la coulina e a la mountanha ma dëcò ar pian, a lâ ville, e a i endustrie dar pian. Quë përvede couma armedi, couma defansa?
Li travai dë defansa (rampar, mur, barage etc.) an una bouna eficasa, ma i durë pa sensa èse coumbinà ensém ar rembouscage e surtout ensém ar govern minousiouz de i'aigue e a l'entretièu coustant di canal e di fousal per desviâ i'aigue. L'ourganizasioun d'i travai é un
proublema quë në po' pâ ese rezolù sensa l'inisiativa di raprezëntant dë la popoulasioun loucala.
Li counsei de lâ valade devrë avê li mezou d'ourganizâ d'equipe d'ouvriê quë deve èse ocupà tout l'an. L'estat (ou la regioun) dèvrë coumpletâ la lei su la mountanha dispouzënt quë për i'equipe ourganizâ diretamënt dai counsei d'lê valade për una ocupasioun continuela dèvë èse acourdà dë subvensioun armen de la 70 % dl'â depanse efetive per tuchi li mezou dë travai (tratour, ruspe, trivele, «roulotte», «campanhale»). I'equipe outre a fâ tuchi li travai dal rembouscage, barage, mur, vie etc. sërë destinà, secound li bezounh, a countroulâ e ëntërtenî canal, fousal, etc. ënt la perioda presëdënta lâ grose pioeve. Ent ar cours de lâ pioeve proulounjâ, i equipe dèvë countinuelamënt vigilâ e countroulâ quë i aigue courë rgouliarmënt ënt i coumbal surtout su lâ zone qu'an tëndënsa ad arvinâ. Li ouvriê d'i equipe sërë de veritable «gardian di sol».
Toute lâ depanse per 'quisti travai, dë natura publica e generala, dèvrë èse soustengùe da l'estat (ou regioun). Nouz antisipë quë i equipe di travai dèvrë, en outre, èse disponible per la defansa countra li bosc quë quërme. La dificoultà pu grosa en vista d'una ocupasioun continuela d'li ouvriê d'i equipe sërè l'uern: nou nou proupozën d'ënzaminâ 'quest proublema oud un aoute article arzërvà escluzivamënt a i equipe dë travai dë lâ cumunità.
Nou poë antisipâ quë la baza foundamentala per i equipe dë travai é quë touta l'ourganizasioun së devoula ënt lâ valade, sensa burocrasia, oud la garansìa absolua d'una countinuità de finansiamënt proupoursiounâ ai bezounh d'la valade.

ënt ar patoua dë Vilar Pelis
Alber Baridoun