Liz albri i sioun pa meque empourtans perquè i nou dounan de boc da travalh, ma soubretout perquè i defendan l'equilibre idro-geologique dâ sol, empâchant da courouzion e laz eivazeira.
Se coumpren la valour d'li bocs, cmà defenço a proutesion, ezaminant çoc la capitto din lâ zona qui n'an pa gî. Per prumiero chozo lou deibouscage porto a l'empauriment dâ teren a cauzo de l'erouzion de l'aigo, en souito la tero, pa mai tengùo da li vertoulhs d'lâ rei, coumenço a eivazar menasant meizouns e vielagi entiè.
En plu de setto enflouenço diretto su lou sol, li bocs prezentan un'asion indiretto su la countinuetà de lâ sourça, soubretout en auto mountanho, adont lou teren vegetal entertenent, cmà un'eiponjo l'aigo de la pleò, la laiso sumir e parelh nurir lâ sourça souteirana, assurant parelh qu'az abbian uno pourtâ regouliero e qu'az eisùan pâ. Deitruizent, cmà a s'ée fait din liz agi pasà, lâ serva su lâ simma e su li flancs de lâ mountanha, liz omi il an prestà a lâ generasions que veren doua granda calamità: la mancanço d'aigo e de boc. Douguen pa eisublià que pluziera ouservasions an demoûtrà que li bocs, din la plu gran' partiò d'li câz, poiun evitar que la se fourme de nebla charjâ de grili e mouderar la forço d'li raias e d'liz aigouleri.
Al ée pamens counouisùo l'enflouenço d'li bocs per rendre l'air boun, parfumà, en lou filtrant dâ microbbi e l'enrichisent dâ flà dâ bijoun aboù de grandi avantagi per noutra santà. Tantoutun douguen pa eisublier l'auto valour esteticco d'li bocs, noumà a razon «ournament manhifique de la naturo» adont din la pâz arpauzanto de saz ombra, din la claro e grando bèltâ de sî bèaus paezagi, l'ome trobbo trévo e counsoulasion a lâ fatigga de la vitto e a s'artempro per lâ lutta e lâ batalha nouvella. Acairant setta vizions un pauc poueticca, li bocs van pilhà en counsiderasion sous lou proufil ecounomique. Da pluzieri eituddi, rezulto que la culturo dâ boc nou douno de renta prou elevâ e bien de viegi autament prouduttivo, soubretout cant al ée plaçâ en coundisions favourabla de clima e souanhâ rasiounalament.
Coum en Italio la souperfisio a bocs raprezento meque lou 17 % de lâ zona coultivâ, se deou counvincre lou particulìe mountanhart que da lâ plantasions al ée pousible ganhar un boun boursicòt; al ée nesesari laz eitendre, que se no l'agricoulturo de mountanho e l'alevament saren pa pousibli se lh'a pa l'anel plu empourtant din la cheino de cauza e efes qu'i s'apielan din la coultivasion de lâ planta fourêtala su lâ mountanha.
Meme que la bouscamento il ée en chamin a esre remplaçâ en pluziera aplicasions, abou d'autra materia, fere e siment per li bâtimens, lou charboun e çoc se chavo dâ petrole per far fèoc, tantoutun coum soun utilizasion aumento countinuament, se pol pensar qu'al aurè un'empourtanço toujourn plu grando. D'autre caire lâ plantasions rasiounala saren de gran'avantage ecounomique perquè raprezenterion un'attivo sourço de travalh e frenerion la
creisento empourtasioun de bouscament da l'eitragie.
Se coumpren gaire a sie nesesari, diriouc cazi indispensable, encourajar li reibouscagi e far counoisre a noutro gent de mountanho l'utilità d'li bocs, lâ maniera de far de bouna plantasions e qu'il emprennan a ararir e talhar aboù boun sens e abilità.