franco-provenzale

STATUT

(Moudificà é integrà a to Deliberasioun doou Counseulh n. 32 doou 11/12/2018)

STATUT

Unioun Mountana ëd Coumun ëd lë Valadë ëd Leun, Cheronda é Casternoun

(Unioun Mountana ëd Coumun a to sede a Sérë)

CAP 1 – PRINSIPI É REGOULË FOUNDAMENTAL

Ërt. 1 Coustitousioun é scop ëd l’Unioun.

  1. Li Coumun (n.21) d’Ala dë Stura, Balagé, Balmë, Cafasë, Quëntoira, Sérë, Chalambert, Couaseul, Queuri, Fian, Germanhën, Givoulet, La Casa, Leun, Mizinì, Mounasté, Pisinai, Travë, Val dla Tour, Val, Varizela, ai li sens ëd l’ërticoul 32 doou Decret legizlatìou doou 18 oust 2000, n. 276 é s.m.i, é ëd lh’ërticoul 4,12 é 13 ëd la Legë Rejounal n. 11 doou 28/09/2012, ënt ‘oou rispet ëd la leu aoutonomìi ou costitouesount n’ Unioun Mountana ëd Coumun –d’eura ën avënti brevemënt indicaia Unioun Mountana o Unioun – secoundou ël normë doou prezent Statut, për la gestioun ëd ‘na pluralità ëd founsioun é relatìou servisi ëd coumpetensi ëd li Cumoun medemi.

  2. L’Unioun Mountana è i ëst n’ënt loucal doutà ëd persounalità jouridica publica é poutestà statoutaria é regoulamentar, qu’è travaiët ënt ‘oou teritori couinchident a sè dli Coumun cou la costitouesount, secoundou li prinsipi fisà da la Coustitousioun, daou Dirit Coumounitari é dal normë statal é rejounal.

  3. L’Unioun Mountana è costitueit ambit teritourial outimal për l’ezerchisi asouchà ëd lë founsioun é dli servisi que li Coumun ou li dounet.

  4. A l’intern ëd l’Unioun Mountana ou peuvount estri creaië diferentë agregasioun teritorial su bazë ouperativa-funsiounal, sensa personalità juridica, ëndoua la gestiouna asouchaia è peut dounà più eficacha, efichensi é ecounoumichità.

  5. A li sens doou comma 3° doou prezent ërticoul, l’Unioun Mountana è peut ezerchità dopou lou counferimënt da part ëd li Coumun:

  1. Ël founsioun foundamental dli Coumun parei ‘mou sount individouaië da la legizlasioun nasiounal, da gestì ën foueurma asouchaia,

  2. Ërz’aoutrë founsioun é servisi a sëlla counferì da li Coumun;

  3. Lë spechifiquë coumpetensi ëd tutela é proumousioun dla mountanhi, ën quëlità d’agensia dë zvilup, ën atouasioun ëd lë dispouzisioun dl’ërticoul 44, comma scound dla Coustitusioun é dla nourmativa ën favour dli teritori ëd mountanhi;

  4. Ël founsioun relativë a li intervent spechal për la mountanhi;

  5. Ël founsioun gë atribuìë a lë Coumunità Mountanë, counferìë da la Rejoun a li Coumun, da gestì ën maneri asouchaia.

6)L’Unioun è peut ëd co ezerchità ërz’aoutrë funsioun cou li vinhount counferìë da la Rejoun é da la Prouvincha é toutë ërz’aoutrë funsioun o servisi counferibil.

7) Ël deliberasioun ëd l’organo counsiliar ëd l’Unioun Mountana, stretamënt rigouardant la gestioun dlë founsioun é dli servisi dounà da li Coumun partechipant, për estri aprouà, ou dëvount ërpourtà lou voto favourevoul dla mëjourënsi dli counsilhé asenhìa a l’Unioun.

8) Couerentemënt a to l’ezerchisi ëd lë founsioun é dli servisi individouà aou comma 5, l’Unioun è i eu lë scop ëd:

  • Guërentì l’eficacha, l’efichensi é l’ecounomichità ëd la propria asioun;

  • Proumouovri lë zvilup socho-ecounomic é la toutela doo teritori;

  • Cooperà a to li soun Coumun për milhourà ël coundisioun ëd vita dli soun sitadin é për dounà livel adegouà ëd servisi;

  • Trëvaì për superà li zvantajou caouzà da l’ambiënt mountan é da la mërginalità doou soun teritori, countinouant l’asioun ëncaminaia da ël douë prechedent Coumunità Mountanë costituìë da la Rejoun ënt ‘oou 1973 é countinouaia da l’ultima Coumunità Mountana ëd lë Valadë ëd Leun, Cheronda é Casternoun, ënt ëstou moumënt ën tren ëd shoulhimënt;

  • Realizà li prinsipi ouperatìou sënchì da la legë 31/12/1971 n. 1102 é s.m.i.;

  • Realizà lhi obietìou sënchì da la legë 31/12/1972 é s.m.i;

9. Ënt l’Unioun Mountana la regoula è i ëst que ‘ste founsioun ou sount ezerchitaië diretamënt da l’Unioun, scound la Legë Rejounal 28/09/2012 n. 11 é, ënt ëstou cas dishiplinaië da Regoulamënt. Echesiounalmënt ès peut druvà lhë strumënt ëd la Counvensioun tra li Coumun, parei coume è vint indicà aou comma 4° ëd st’ërticoul, a li sens ëd l’ërticoul 5, comma 2° é 3° ëd la Lege Rejounal n° 11 doou 28/09/2012.

10. L’Unioun è peut stipoulà counvensioun avé ërz’aoutrë Unioun o avé singoul Coumun a to teritori counfinant, secondo l’ërticoul 5, comma 2 ëd la L.R. 28/09/2012 n°11

11. A l’Unioun Mountana ou pëvount aderì souchesivamënt ëd co aoutri Coumun. Lou Counseui Coumunal cou veut fà part ëd l’Unioun, ou deout deliberà la voulountà d’aderì diquiarant la dispounibilità a coumpartechipà a lë speizë councourdaië é ripartìë anoualmënt tra li Coumun aderent, atravers n’idonea delibera faita për onhi ezerchisi finënsiari dla Jounta ëd l’Unioun.

12. L’adezioun doou neu Coumun è vint aprouvaia daou Counseui dl’Unioun a to lou voto favourevoul ëd li dui ters ëd li counsilhé asenhìa.

Ërt. 2 Denominasioun, ambiti é sede.

  1. L’Unioun Mountana ëd Coumun è piet la denominasioun d’ “Unioun Mountana ëd Coumun ëd lë Valadë ëd Leun, Cheronda è Casternoun”.

  2. La sede istitousiounal ëd l’Unioun Mountana è vint couloucaia a Serë, ërz’adounënsi ëd lh’ourgan elet coulejal ëd regoula ou s’ font ën sitta sede.

Ërt. 3 Prinsipi ëd përtechipasioun.

  1. L’Unioun encouragët lou couinvoulgimënt ëd li Coumun couinvolt é ëd lë coumunità loucal, fachilitant la përtechipasioun a la fourmasioun ëd lë sheltë poulitiquë-aministrativë é a la vëlutasioun ëd li rizultà outenù, ën più asicurant l’aches a lh’at é arz’infourmasioun ëd l’ent.

  2. Tui’ lh’abitant ou peuvount prezentà aou President ëd l’Unioun, ëd co atravers lhë spourtel infourmatìou loucal, istënsi, petisioun é proupostë për materië rigouardant atività d’aministrasioun.

  3. Për seun cou rigouardët l’adousioun d’at cou interesount përticoulà categourië ëd souget, l’Unioun è peut counsoultà asouchasioun ëd quëtegourì é souget pourtatoù d’interes coumun.

  4. Ël moudalità ëd përtechipasioun é d’aches ou sount stëbilìë da ‘në spechific regoulamënt atouà ënt ‘oou rispet ëd la nourmativa ën vigour.

Ërt. 4 Dispouzisioun për l’ezerchisi ëd lë funsioun é dli servisi ën foueurma asouchaia.

  1. Lou zvoulgimënt ëd lë funsioun é dli servisi afidà da li Coumun diretamënt a l’Unioun, ou i ëst dishiplinà da aposit regoulamënt aprouvà, su prouposta ëd l’ourgan ezecoutìou, daou Counseulh ëd l’Unioun, a to lou voto favourevoul ëd la majourënsi ëd li counsilhé asenhìa a l’Unioun. Ël moudalità é li ten ëd councreta atouasioun për ounhidun ëd li servisi ou sount stëbilì ënt la delibera d’aprouvasioun doou relatìou Regoulamënt da part doou Counselh ëd l’Unioun, adoutà zla bazë ëd në studi analitic ëd lë rizoursë umanë é strumental ezistent ënt onhi Coumun partechipant, é ëd lë nechesità ëd servisi për onhidun ëd leu.

  2. Lou trasferimënt ëd funsioun é servisi Coumunal a l’Unioun ou determinët, a echesioun ëd ‘na diferenta voulountà indicaia ënt lh’at ëd trasferimënt, l’ineficacha ëd lë nourmativë coumunal ën materia. ‘Sti efet ou s’ realizount daou moumënt que ou sount azecutìou lh’at ëd l’Unioun deputà a sostituì ël dispouzisioun nourmativë coumunal.

  3. Lou regoulamënt ou dishiplinët ën përticoulà ël moudalità d’ezerchisi ëd lë funsioun é dli servisi, é li criteri ëd divizioun ëd lë speizë, tinënt count nhint mëc ëd seullë coulegaië diretamënt a l’ezerchisi ëd lë funsioun o lë zvoulgimënt ëd l’ezerchisi, ma ëd co seulle relativë a la part dë speizë general ëd funsiounamënt ëd l’Unioun.

  4. Ël funsioun é li servisi counferì da li Coumun a l’Unioun, countestoualmënt a l’istitusioun ëd l’Unioun medema, ou sount ërpourtà ënt ‘oou documënt alegà aou prezent Statut.

  5. Për tui’ lh’acreshimënt ëd coumpetënsi da part ëd l’Unioun è ventët que li regoulamënt indicà aou comma 1 ou riportount ël rizorsë umanë, finënsiarië é strumëntal për l’ezerchisi ëd la funsioun a l’at d’aprouvasioun da part ëd li counsëlh coumunal, a to l’adousioun da part ëd l’Asemblea ëd l’Unioun, ëd la gestioun ëd la neuva coumpetensi, a to ël rizoursë për la cuvertura finënsiaria, qu’è peut gueurentì la soustenibilità doou neu impenh é lou parejou doou bilanch.

CAPO 2 OURGAN ËD GOUVERN

Ërt. 5 Ourgan ëd gouvern ëd l’Unioun

  1. Ourgan ëd gouvern ëd l’Unioun ou sount:

  1. Lou Conseulh

  2. Lou Presidënt

  3. La Jounta

  1. Lh’ourgan ëd gouvern ou sount fourmà escluzivamënt da aministratoù ën carica ëd li Coumun asouchìa, scount ël dispouzisioun ëd li souchesìou ërticoul.

Ërt. 6 Coumpouzisioun doou Counseulh

  1. Lou Counseulh ëd l’Unioun ou i ëst coumpost da ën raprezentant dla majourënsi d’onhi Coumun asouchìa é da li raprezentant ëd lë minourënsi counsilhar eletë ënt ël manerë dishiplinaië daou souchesìou comma 4°.

  2. Lou Counseulh ou i eu ën mëndà aministratìou ourdinari ëd sinc an, couinchident a to lou rinov dërz’aministrasioun coumunal ëd la majourënsi ëd li Coumun interesà a la tournà eletoural.

  3. Onhidun Couseulh Coumunal ou eleget tra li soun coumpounënt, a to ‘na voutasioun ëndoua ou partechipët ëd co lou Sindic, lou raprezentant doou Coumun ënt ‘oou Counseulh ëd l’Unioun.

  4. Lou numër ëd li raprezentant ëd lë minourënsë counsilhar, ou i ëst individouà ënt la mizura doou 10% - a to aroutoundamënt doou rizultà a l’unità superiour sé l’eventoual dechimal ou i ëst ugoual o superiour a 5- ëd li Coumun cou font part ëd l’Unioun Mountana.

Li raprezentant ëd lë minourënsë ou sount elet da la Counferensi straordinaria ëd tui’ li Counsilhé Coumunal ëd minourënsi ën carica, a to voto segret limità a un candidà; li Counsilhé Coumunal ëd minourënsi ou sount mëc si cou font part ëd lë listë que ënt ël counsoultasioun eletoural coumunal ou i erount nhint coulegaië aou Sindic elet.

La Counferensi straordinaria è vint counvoucaia é presiedua daou Sindic doou Coumun a to lou più aout numer d’abitant é ou eleget a majourënsi asoluta, a to la prezensi ëd la metà più un ëd li coumpounënt, li raprezentant ëd lë minourënsë.

Stou adempimënt ou deout estri espletà entro 30 dì daou rinovo ëd lë aministrasioun coumunal counsideraië aou comma 2°.

  1. La coumunicasioun ëd la raprezentansi coumunal ënt l’Unioun è deout avinì entro 30 dì da la data dërz’elesioun aministrativë cou coumportount lou rinovou doou Counseulh Coumunal, fait për quëlsiasi razoun.

  2. Pasà lou termine previst aou comma prechedent, se un Coumun ou i eu nhint provedù a coumunicà ‘na diferente determinasioun, lou Sindic ou i ëst counsiderà coumpounent efetìou doou Counseulh ëd l’Unioun ën raprezentënsi ëd se Coumun, finha a l’elesioun doou raprezentant doou Counseulh Coumunal.

  3. Ën cas ëd shoulhimënt d’ën Counseulh Coumunal, lou Coumun ou i ëst raprezentà daou Coumisari.

  4. Ënt li cas ëd rinovo d’un o più Counseulh Coumunal, li raprezentant doou Coumun ënt l’Unioun ou restount ën carica finha a l’inesediamënt ëd li neu Counsilhé elet.

  5. Lou raprezentant ëd la minourënsi cou fait part doou Coumun souget a shoulhimënt o rinovo, ou vint sostituì da n’aoutrou raprezentant, individouà segouent l’ourdin ëd li voti outenù ënt l’elesioun scount lou comma 4° ëd ‘sto ërticoul.

Ërt. 7 Sedua d’insediamënt doou Counseulh.

  1. La pruma sedua doou Counseulh è vint counvoucaia, entro 30 dì daou coumpletamënt ëd lë dizenhasioun, é è vint presiedua daou Sindic (o aoutrou raprezentant delegà o dezinhà) doou Coumun a to lou numër più aout d’abitant; a l’ordin dou journ dla sedua è i eu la counvalida ëd lh’elet, l’elesioun doou President é dla Jounta.

Ërt. 8 Coumpetënsi doou Counseulh.

  1. Lou Counseulh ëd l’Unioun ou eleget, a to voutasioun unica, lou President é ërz’aoutri 6 coumpounënt dla Jounta ënt la pruma adounënsi, subit dopou la counvalida ëd li Counsilhé.

  2. Lou Counseulh ou ezerchitët l’atività d’indirisi é countrol politic, aministratiou ëd l’Unioun. La coumpetensi doou Counseulh è i ëst limitaia a l’aprouvasioun ëd lh’at foundamental que l’ërticoul 42, comma 2, doou D.Lgs. 18.8.2000 n. 267 é li s.m.i., ou prevedount për li Counseulh Coumunal, salvo seun cou vint diversamënt stëbilì daou present Statut.

  3. Lou Counseulh, për proumouvri lë zvilup socho-ecounomic é për tutelà lou soun teritori, ou adotët a inisi doou mëndà, su prouposta ëd Jounta, në specific document prougramatic inerent a l’atività ëd l’Unioun.

  4. Lou Counseulh ou peut nhint delegà ël souë fusioun a d’aoutri ourgan ëd l’Unioun.

Ërt. 9 Funsiunamënt doou Counseulh.

  1. Lou Counseulh ou vint counvoucà daou President ën sesioun ourdinaria, aoumeno dui vì l’an, ën relasioun a l’aprouvasioun doou bilancho ëd previzioun é doou rendicount ëd la gestioun. Lou Counseulh ou vint ëd co counvoucà ën sedouta straourdinaria can è i n’eu la nechesità o mëc l’oupourtounità. Lou Counseulh ou vint anquë counvoucà can ën ters ëd li Counsilhé ou n’eun font riquiesta, scound la dishiplina doou Regoulamënt predispost a li sens doou sochesìou comma 2°.

  2. Lou Counseulh ou adotët, a majourënsi ëd li Counsilhé asenhìa, lou Regoulamënt cou dishiplinët la soua ourganizasioun é founsiounamënt. A to l’istesa majourënsi lou Counseulh ou aportët arz’eventoual moudificasioun.

  3. Lou Counseulh, fait salf li cas ëndoua la legë o lë Statut ou dëspounount diversamënt, ou deliberët a majourënsi ëd vot favourevoul é a to la prezensi ëd la majourënsi ëd li coumpounënt asegnìa da l’Unioun, a to voutasioun palezë, sempër fait salv li cas ëndoua la legë o lë Statut ou prevedount la voutasioun segreta.

  4. Ën cas ëd parità ëd voto, lou President ou peut fà ripetri la voutasioun mëc ën vì ënt l’istesa sedouta.

  5. Li Cousilhé cou diquiarount d’astenese daou voto ou intrount nhint ënt ‘oou numër ëd li voutant, bele se ou vinhount countà ënt ël numer nechesari për rendri la voutasioun legal për la sedouta.

  6. A lë proupostë ëd deliberasioun doou Counseulh ou s’apliquët l’ërticoul 49 (Pareri ëd li respounsabil ëd li servisi) doou D. Lgs. n°267/18.8.2000 é s.m.i é ën relasioun a lë coumpetensi doou Diretoù Segretari, l’ërt. 97 comma 2°, ën ourdin aou parer ëd “counfourmità aministrativa”. Li prechedent parer costitouesount ëd co ‘na moudalità për l’ezerchisi ëd li countrol previst a l’ërt. 147-bis, comma 1é 2 doou gë nouminà decret legizlatìou.

Ërt. 10 Status ëd li Counsilhé.

  1. La pouzisioun juridica é lou status ëd li Counsilhé ou sount regoulà da la legë. A li Counsilhé ëd l’Unioun ou s’aplicount ël normë doou Cap II doou Decret Legizlatìou n° 267 doou 18.8.2000 é s.m.i., daou moumënt cou sount coumpatibil.

  2. Li Counsilhé ou i ont dirit ëd prezentà interougasioun, mousioun é aoutri dirit d’inisiativa vers lou President, la Jounta é li Asesoù a to ël moudalità previuvë daou Regoulamënt adoutà daou Counseulh, a l’ërt. 8, comma 2°.

  3. Li Counsilhé ou sount tinù a përtechipà al sedoutë doou Counseulh é a seullë Coumisioun endoua ou font part.

Ërt. 11 Duraia ën carica dli Counsilhé é caouzë ëd inelegibilità o d’ëncoumpatibilità.

  1. Li membri doou Counseulh ëd l’Unioun ou entrount ën carica a to l’acouizisioun aou protocol ëd l’Unioun ëd la spechifica coumunicasioun doou Sindic doou Coumun.

  2. Li Counsilhé ou restount ën carica fin a l’insediamënt ënt ‘oou Counseulh ëd l’Unioun ëd lh’elet qu’è segouët l’arneuv doou Counseulh doou Coumun cou raprezentount, salvo li cas ëd noulità ëd l’elesioun, ëd decadensi o chesasioun ëntichipaia ëd la carica, previst da la lege o da lou Statut, o lou cas

ëd l’eventoual sostitusioun doou raprezentant comunicà daou Sindic doou Coumun d’apartenensi.

  1. Lou raprezentant d’ën Counseulh Coumunal dëzgrupà ou decadët da la data d’insediamënt doou Coumisari. Lou Coumisari ou sostitueit a tui’ lh’efet lou raprezentant coumunal ënt lh’ourgan ëd l’Unioun.

Ërt. 12 Soustitusioun ëd li Counsilhé.

  1. La soustitusion ëd li singoul membër doou Counseulh è peut verificase ënt ësti cas:

  1. Dimisioun;

  2. revouca da part doou Counseulh Coumunal;

  3. nulità ëd l’elesioun, perdita ëd la coualifica ëd Counsilhé Coumunal o ëd l’Unioun, aoutri moutìou d’ëncoumpatibilità o decadensi previst da la lege;

  4. mort o aoutre caouzë previstë da la lege;

  5. decadensi për mëncaia përtechipasioun al sedutë doou Counseulh;

  1. Ècostitueit rëzoun ëd decadensi daou mëndà ëd Counsilhé ëd l’Unioun la mëncaia përtechipasioun, sensa justificà moutiou, a trai sedutë counsecoutivë ëd li travai doou Counseulh.

  2. Ënt li cas ëd decadensi o dimisioun ëd li counsilhé ëd l’Unioun, li sindic ëd li Coumun d’apartenensi ëd ‘sti counsilhé, ën 30 dì da la data ëd prounouncha ëd decadensi o ou sount istaië prezentaië ël dimisioun, ou counvoucount li Counseulh ëd li Coumun, cou elegount ën neu counsilhé ëd l’Unioun. Pasà lou terminë, ou s’aplicount ël dispouzisioun ëd l’ërticoul 6 doou prezent Statut.

Ërt. 13 Coumisioun Counsilhar

  1. Lou Counseulh për l’ezerchisi ëd lë souë funsioun ou peut servise ëd Coumisioun counsilhar fourmaië da Counsilhé ëd l’Unioun é dishiplinaië daou Regoulamënt previst da l’ërt. 9 comma 2 ëd ‘stou Statut.

Ërt. 14 Elesioun doou President é dla Jounta

  1. Lou President ëd l’Unioun ou vint nouminà daou Counseulh é ou deuout estri Sindic d’un ëd li Coumun cou font part ëd l’Unioun.

  2. Li coumpounënt ëd la Jounta ëd l’Unioun ou deuvount estri aministratoù ëd li Coumun (Sindic, Viche Sindic, Asesour é/o Counsilhé) sensa d’aoutri oblig për la publica finënsi, coumë previst dal legë vingent.

  3. L’elesioun doou President, doou Viche President é dla Jounta (për ën toutal ëd 8 coumpounënt ëd l’ourgan ezecoutiou) ès fait countestoualmënt, a to voutasioun manifesta a majourënsi ëd counsilhé asenhìa, ën bazë aou document prougramatic previst daou 3° comma ëd l’ërt. 8, prezentà daou quëndidat President, ëndoua ou vint moustrà lou rispet ëd li recouiziti ëd raprezentatività ëndicà aou souchesiou ërticoul 17.

  4. Se è vint hint outenua la majourënsi ëndicaia, ès prouchedët a l’indisioun ëd trai souchesivë voutasioun da tinisë ën sedoutë diferentë é coumounquë ënt 20 dì da la counvalida ëd li Counsilhé.

  5. Ënt ël cas quë ënt nhuna ëd lë cat voutasioun (1+3) è s’aruvët nhint a la majourënsi riquiesta lou candidat President ëd l’ultima voutasioun ou i eu la funsioun ëd Coumisari é lou Counseulh ou vint dëzgroupà scount ël restant prochedurë previstë da l’ërt. 141 doou D.lgs. n°267/18.8.2000é s.m.i.

Ërt. 15 Coumpetensi doou President

  1. Lou Presidente ëd l’Unioun ou i ëst lou legal raprezentant dl’entë, ou asicurët unità ënt l’atività poulitic-aministrativa, ëd co grasië a lou couourdinamënt dërz’atività ëd lh’ourgan coulejal é ëd li coumpounënt dla Jounta, souvrintendënt aou funsiounamënt ëd li servisi é ëd lh’ufisi ma ëd co a l’ezecusioun ëd lh’at, souvrintendënt ëd co a l’espletamënt ëd lë funsioun cou li sount dounaië da la lege, da lë Statut é da li regoulamënt.

  2. Ënt l’ezerchisi ëd lë coumpetensi indicaië aou prum comma, lou President, ën përticoulà:

  1. Ou raprezentët l’Unioun ën’ tui’ li raport é sedë istitusiounalë é souchalë coumpetënt;

  2. Ou firmënt tui’ lh’at, ëndoua st’aoutourità è i ëst nhint atribuìa a d’aoutri souget da la lege o da lë Statut, ënt l’interes ëd l’Unioun;

  3. Ou counvouquët é ou dirigët la Jounta fisënt l’ourdin doou joueurn;

  4. Ou counvouquët é ou dirigët lou Counseulh, fisënt l’ourdin doou joueurn;

  5. Ou firmët li verbal é ël deliberasioun dla Jounta é doou Counseulh counjuntamënt aou diretoù segretari cou verbalizët;

  6. Ou adotët at monocratic (decret) ën relasioun a souë spechifiquë coumpetensi;

  7. Ou dounët a li coumpounënt ëd la Jounta ël diretivë poulitiquë é aministrativë relative a l’ëndirisi general;

  8. Ou couordinët é ou stimoulët l’atività ëd li singoul coumpounënt dla Jount; da sitti ou vint ënfourmà ëd toutë ërz’inisiativë cou inlfuesount l’indirisi poulitic aministratìou ëd l’Unioun; ou peut ën onhi moumënt souspendri l’ezecusioun ëd lh’at ëd li coumpounënt ëd la Jounta da qiueul ëncaricà për soutpounli a l’ezam ëd la Jounta

  9. Ou zvilupët atività ëd proupoulsioun vers lh’ufisi é li servisi, dounënt diretivë, moustrant oubietìou é atività nechesarië për la realizasioun ëd li prougram ëd l’entë, ëd co ën bazë a ëlz’indicasioun ëd la Jounta;

  10. Ou richevët ërz’interougasioun, ël mousioun, ërz’istensë, ël proupostë é ël petisioun da proupounri aou Counseulh;

  11. Ou nouminët li raprezentant ëd l’Unioun Mountana ën’ tui’ lh’ent é ourganizm ën’ toutë ël manerë denouminàyë, can quë sta coumpetensi è i ëst nhint escluziva doou Counseulh.

Ërt. 16 Chesasioun ëd la carica

  1. Lou President ou perdet la carica, nhint mëc que për la perdita ëd la carica ëd Sindic, ma ëd co për mort, dimisioun o ërvenuë caouzë d’ëncoumpatibilità. Ël dimisioun ou sount validë pasà 20 dì da la richesioun a l’Ufisi Proutoucol ëd l’Unioun.

  2. Lou President ou fineit ëd co la carica ën cas d’aprouvasioun da part doou Counseulh ëd ‘na mousioun ëd sfiducha, voutaia për apel nouminal da la majourënsi assoluta ëd li soun coumpounënt. La mousioun ëd sfiducha è deout estri moutivaia ésoutscritada aoumeno li dui couint ëd li Counsihlé, a escluzioun doou President, é è vint butaia ën discusioun nhint pruma ëd 10 dì é nhint dopou trënta dì da la soua prezentasioun.

  3. Ën cas ëd chesasioun për couëlsiasi rëzoun doou President, è cheset ëd co la Jounta é ou li subintrët ënt ël souë funsioun lou Viche President coume Coumisari a to li pouder doou President é dla Jounta, për l’ourdinaria aministrasioun finha a la noumina doou neuou ezecutiou.

  4. Lou medezim ou i ëst oubligà a counvoucà eunt vint dì lou Counseulh ëd l’Unioun a to a l’ourdin doou joueurn l’elesioun dou President é ëd l’ezecutìou.

Ërt. 17 Coumpouzisioun ëd la Jounta

  1. La Jounta è i ëst l’Ourgan ezecutìou ëd l’Unioun Mountana.

  2. La Jountà è i ëst coumposta daou President, daou Viche President é da aoutri 6 membri, denouminà asesour, për ën toutal ëd 8 coumpounënt, sernù tra lh’aministratoù coumunal ën carica.

  3. La coumpouzisioun dla Jounta è deout estri inspiraia aou rispet ëd lë diferent realtà teritourial ëd lë singoulë Valadë o teritori oumougeni cou i ont creà l’Unioun.

  4. La coumpouzisioun ëd la Jounta è deout guërantì la raprezentënsi derz’aree coume sout ëndicà:

  • Aouta Val – numër 3 coumpounënt

  • Basa Val – numër 2 coumpounënt

  • Val doou Tes Maloun – numër 1 coumpounënt

  • Val Cheronda é Casternoun – numër 2 coumpounënt

Coume ërpourtà graficamënt ënt la quërtina alegaia aou prezent Statut.

  1. Aou Viche President, cou sostitueit lou President ën cas d’asensi o impedimënt, piennën tui’ li pouteri, è vint atribuìa l’apozita delega për l’ezerchisi da part ëd l’Unioun ëd lë spechifiquë coumpetensë ëd toutela é proumousioun ëd la mountanhi ën atouasioun dla dispouzisioun ëd l’ërticoul 44 comma scound, dla Coustitusioun é dla restant nourmativa coumunitaria, statal é rejounal a favour ëd li teritori ëd mountanhi.

Ërt. 18 Funsiounamënt é coumpetensi dla Jounta

  1. La Jounta è coulabourët avé lou President ënt lou gouvern ëd l’Unioun é ënt l’atouasioun ëd lh’ëndiris general doou Counseulh, aou coualë è deout riferì anoualmënt rigouard la soua atività é è zvilupët atività proupouzitivë é d’ëmpouls ënt li counfront doou Counseulh medezim.

  2. La Jounta, ën përticoulà, è prouvedët a:

  1. adoutà tui’ lh’at d’aministrasioun cou sount nhint rizervà aou Counseulh é cou font nhint part ëd lë coumpetensë doou President, previstë da lou Statut;

  2. adoutà eventoualmënt, ën vì d’urgensi, ël deliberasioun cou coumportount ël variasioun ëd bilancho da soutoupounri a ratifica doou Counseulh ënt li termini previst da la lege;

  3. aprouvà ël counvensioun avé d’aoutri Ent public sempër quë sittë ou sont nhint rizervaië a l’escluziva coumpetensi doou Counseulh;

  4. dounà efichent atouasioun a l’ëndirisi doou Counseulh;

  5. ezerchità toutë ërz’aoutrë funsioun qu’è li sount istaië atribuìë da lë Statut é da li regoulamënt;

  6. elabourà é aprouà lou Regoulamënt su l’Ourdinamënt ëd lh’Ufisi é dli Servisi.

  1. La Jounta è vint counvoucaia é direta daou President ëd l’Unioun, tui’ li vì quë quieul ou pensët qu’è i n’eu dabëzounh, o da qui cou lou sustitueit legitimamënt, Viche President o Asesour, ën cas d’estrema urgensi o për impedimënt doou President é doou Viche President. La Jounta è peut estri counvoucaia ëd co për doumanda ëd cat ëd li soun coumpounënt.

  2. La Jounta è peut dishiplinà lou soun funsiounamënt a to ën regoulamënt, deliberà a majourënsi assoluta ëd li soun coumpounënt (sinc).

  3. La jounta è deliberet a majourënsi ëd voti favourevoul su li countrari, a to la majourënsi ëd li coumpounënt (sinc) é a to voutasioun manifesta, foravia quë li cas ëndoua la lege o o li regoulamënt ou prevedount la voutasioun segreta.

  4. Al proupostë ëd deliberasioun ëd la Jounta ou s’apliquët l’ërticoul 49 (oupinioun ëd li respounsabil ëd li servisi) doou D. Lgs n. 267/18.8.2000 é s.m.i é, ën relasioun a lë coumpetënsi doou Diretoù Segretari, l’ërt. 97 comma 2°, rigourdant l’oupinioun ëd “counfourmità aministrativa”. Ël gë nouminàië oupinioun coustitouesount ëd co ël manerë për l’ezerchisi ëd li countrol previst da l’ërt. 147-bis., commi 1 é 2 doou gë nouminà Decret Legizlatìou.

CAPO III OURDINAMËNT AMINISTRATÍOU

Ërt. 19 Prinsìpi general

  1. Lh’ufisi é li servisi ëd l’Unioun ou sount ourganizà scound li prinsipi ëd boun andamënt, ëmparsialità/justisi, ecounoumichità, funsiounalità, efichensi é aficacha, a to spechific riferimënt a l’ërt. 97 ëd la Coustitusioun é ëd la legë n° 241/7.8.1990 é s.m.i.

  2. Lou funsiouonamënt é l’atività aministrativa ou s’ counfourmount aou prinsipi ëd la separasioun fra li poteri d’ëndirisi é lou countrol poulitic-aministratìou, cou spetount a lh’ourgan ëd gouvern, é poteri ëd gestioun aministrativa, finënsiaria é tennica, cou spetount a li respounsabil ëd lh’ufisi.

  3. L’ourganizasioun ëd lë struturë è vint prountaia scount ën moudel lest é flesibil ën raport a li prougram ëd l’aministrasioun é aou prougresìou trasferimënt ëd funsioun é servisi coumunal o ëd funsioun é incaric dounà da la Rejoun o da la Prouvinsi.

  4. Ën përticoulà l’ourganizasioun è i ëst ënspiràia é coustruìa su la bazë ëd li prinsipi ëd përtechipasioun, respounsabilità, vëlourizasioun doou countribut persounal é coualificasioun proufesiounal doou persounal.

  5. L’Unioun è asicurët aou personal é arz’asochasioun sindacal, cou lou raprezentount, lou zvoulgimënt ëd couretë relasioun sindacal, ënt ‘oou pien rispet ëd le norme ëd legë é countratoual ën materia ëd dirit sindacal.

  6. L’Unioun è serquët ëd dounà, atravers lou dechentramënt é la prezensi soou teritori, n’ouferta ëd servisi pi bouna për li sitadin é ërz’impreizë, a to l’adousioun ëd regoulamënt d’ourganizasiouna counveniënt.

  7. L’Unioun è stimoulët l’outimizasioun ëd la couëlità dli servisi dounà a li sitadin grasië a l’utilizi ëd strumënt infourmatic cou asicurount la counesioun é l’efetìa integrasioun tra lh’ufisi ëd li Coumun é si dl’Unioun për ën più fachil aches a li sitadin medemi.

Ërt. 20 Regoulamënt d’ourganizasioun, doutasioun ourganica é Diretoù Segretari

  1. L’Unioun è regoulët l’eficachë é efichent ourganizasioun ëd lh’ufisi é dli servisi grasië a ‘n Regoulamënt su l’Ourdinamënt ëd lh’Ufisi é dli Servisi aprouvà da la Jounta ënt ‘oou rispet ëd li criteri general stëbilì daou Counseulh é dli prinsipi statoutari.

  2. Lou regoulamënt s’empenhët për l’atouasioun ëd li prinsipi cou gouvernount l’atività é l’asioun aministrativ, ou defineit l’ourdin dla strutura ourganizativa (tecnostrutura) dl’Unioun é regoulët l’ezerchisi ëd lë funsioun ëd diresioun, ourganizasioun é gestioun, stëbilënt finalità, oubietìou, respounsabilità é sistem ëd vëlutasioun ëd li rizultà outenù.

  3. La doutasioun ourganica ëd l’Unioun è prevedët la couëlifica ëd Diretoù Segretari, coume diretoù é courdinatoù ëd l’ourganizasioun ëd l’Ent.

  4. Ën sede ëd pruma aplicasioun doou prezent Statut la funsioun ëd Diretoù Segretari ëd l’Unioun è vint ocupaia daou Diretoù Segretari ëd la preezistent Coumunità Mountana.

4 bis. Souchesivamënt ël funsioun ëd Segretari ëd l’Unioun ou vinhount realizaië daou Segretari d’ën Coumun cou fait part ëd l’Unioun, nominà daou President, sintua la Jounta. Ël funsioun ëd Segretari ëd lh’ourgan coulejal ëd l’Unioun ou vinhount pourtàië avënti sensa aoutri caric quë lou rimbouërs dlë speizë d’aches.

  1. Ënt ‘oou pourtà a coumpimënt toutë ël funsioun atribuìë a li sens doou comma 2° ëd l’ërt. 4 doou D. Lgs. 30.3.2001 n°165 é s.m.i. lou Diretoù Segretari ou i eu la raprezentansi legal ëd l’ent é ou ou travaiët a to li relatìou poteri cou peut ezerchità për ël souë funsioun. Ël determinasioun për l’ourganizasion ëd lh’ufisi é ël mëzurë rigouardant la gestioun ëd li raport ëd travai ou sount ën vì escluziva ëd lh’ourgan prepost a la gestioun a to quëpëchità é poteri doou privà datour ëd travai.

  2. Lou regoulamënt su l’Ourdinamënt ëd lh’Ufisi è dli Servisi ou regoulët ëd co, ën relasioun a la figura doou Diretoù Segretari è dli funsiounari respounsabil ënt la sfera ëd la tecnostrutura, ël moudalità d’adousioun ëd lh’at é prouvedimënt aministratìou, nhint mëc tui’ lh’at cou impenhount l’aminstrasioun vers l’estern, ma ëd co la gestioun finansiaria, tennica è aministratìva atravers poteri aoutonom dë speiza d’ourganizasioun ëd lë rizoursë umanë, trumental é ëd countrol.

  3. Lou Diretoù Segretari é li funsiounari individouà ënt ‘oou Regoulamënt su l’Ourdinamënt ëd lh’Ufisi é dli Servisi ou sount respounsabil ën maneri escluziva ëd l’atività aministrativa, ëd la gestioun é dli relatìou rizultà.

CAPO IV OURDINAMËNT FINËNSIARI É COUNTABIL

Ërt. 21 Prinsipi General

  1. A l’Unioun, a li sens doou 4°comma ëd l’ërt. 32 doou D. Lgs. N°267/18.8.2000, ou s’aplicount ël normë ën materia ëd finënsi é countabilità prtevist da la legë

  2. L’ourdinamënt finansiari é countabil ou vint regoulamentà, ënt li limiti stëbilì da la legë, daou regoulamënt ëd countabilità aprouvàia daou Counseulh ëd l’Unioun.

Ërt. 22 Finënsë ëd l’Unioun

  1. L’Unioun è i eu aoutonomì finënsiaria foundaia su la sicurëssi ëd rizoursë proprië é ëd co trësferìë.

  2. Ën përticoulà a l’Unioun ou spetount ërz’ëntraië cou derivount da:

  • Found rejounal për la mountanhi secound l’ërticoul 50 ëd la legë rejounal 2 lui 1999 n° 16 é s.m.i

  • Found asenhìa a li sens ëd l’ërt. 8 ëd la legë rejounal 20 gené 1997, n° 13 é për ërz’atività ëd difeiza é toutela ëd l’aset idrogeologic doou teritori mountan.

  • Countribù erougà da l’Unioun Eouropea é da aoutri ourganizm.

  • Trësferimënt coumunitari, statal, rejounal é dli Coumun cou partechipount për ërzë speizë d’investimënt.

  • Trësferimënt é countribusioun ourdinari dlë Stat, dla Rejoun é d’aoutri Ent.

  • Trësferimënt ëd lë rizoursë ëd li Coumun përtechipant për l’ourdinari funsiounamënt é për l’ezerchisi ëd lë founsioun é dli servisi trësferì o, ën tui’ li cas, counvensiounà.

  • Taië, tarifë é countribù zli servisi afidà da li Coumun.

  • Countribusioun rejounal é statal a titoul d’inchentìou ëd lë gestioun asouchaië.

  • Trasferimënt ëd la Rejoun é dla Prouvinsi për l’ezerchisi ëd lë funsioun é servisi counferì o asenhìa.

  • Renditë pëtrimounial

  • Duertura ëd prestiti

  • Prestasioun për count ëd ters

  • Aoutri proufit o erougasioun

  1. Li Coumun aderent a l’Unioun ou asicurount a l’Ent medem, për la gestioun ëd lë funsioun pourtaië a coumpimënt, li trasferimënt ëd rizoursë nechesarië, d’ën vì a l’aoutrou stëbilì a to ën sistema coulegà a la spechifichità doou servisi o dla funsioun. Ën mënquënsi d’aoutri prinsipi, li trasferimënt ou vinhount divis ën maneri diretamënt proupoursiounal a l’entità ëd poupoulasioun rezident aou 31 gëzembër ëd l’an prechedent ënt onhi Coumun.

Ërt. 23 bilans é prougramasioun finënsiaria

  1. Lou Counseulh ou deliberët lou bilans anoual ëd previzioun ën li termou ëd legë stëbilì për li Coumun. Lou moudel ëd bilans ou vint prountà da l’ourgan ezecutìou cou travaiët ënsembiou a li Coumun për asicurà la counfourmità funsiounal ëd li rispetìou documënt countabil.

  2. Lou bilans anoual ëd previzioun ou vint redat ën termou ëd coumpetensi ouservant li prinsipi ëd l’universalità, unità, anoualità, veridichità, publisità, ëntegrità é parejamënt ecounomic finënsiari.

  3. Lou bilans anoual ou vint doutà ëd la relasioun previziounal é prougramatica é doou bilans ëd previzioun trienal.

Ërt. 24 Countrol ëd gestioun

  1. L’Unioun è apliquët ël prouchedourë ëd countrol ëd gestioun për vëlutà l’utilizi ëd lë rizoursë finënsiarië, umanë é strumëntal, ëd coumparà li cost a to la couëntità é couëlità ëd dli servisi dounà é verificà la funsiounalità dl’ourganizasioun é lou livel ëd realizasioun ëd lh’ubietìou prougramà.

  2. Lou countrol ëd gestioun ou vint pourtà a coumpimënt scount ël moudaltà stëbilìë ënt ‘oou regoulamënt ëd countabilità ënt ‘oou rispet ëd la nourmativa ën vigour.

Ërt. 25 Rendicount ëd gestioun

  1. Lou Counseulh ou aprouvët lou rendicount ëd gestioun ënt la fin doou termou previst da ‘l dispouzisioun nourmativë ën vigour su prouposta ëd l’ourgan ezecutìou, cou lou prountët a to la relasioun ilustrativa é a lh’at previst da la legë.

  2. Copia doou rendicount è i ëst a dispouzisioun ëd li Counseulh Coumunal.

Ërt. 26 Ourgan ëd revizioun ecounomic finënsiaria

  1. La nourmativa ëd revizioun ecounomic finënsiaria è vit detaia daou titoul VII, ërticoul daou 234 aou 241 doou T:U:E:L ëd coui aou D. Lgs. N°267/18.8.2000 é s.m.i, cou regoulët ënt lou spechific ërz’atribusioun, li douvé, ël funsioun é li counfin ëd l’ourgan ëd revizioun ecounomic finënsiaria.

Ërt. 27 Servisi ëd tezoureria

  1. Lou Servisi ëd tezoureria ou vint ourdinà daou regoulamënt ëd countabilità é da la counvensioun avé lou Tezourié, ënt l’ouservënsi ëd le nourmë detaië daou Titoul V é ën përticoulà daou Capo 1° (ërticoul daou 208 aou 213) doou T.U.E.L. ëd coui aou D. Lgs. N°267/18.8.2000 é s.m.i.

  2. Lou Servisi ëd tezoureria ou vint afidà, atravers prouchedura a evidensi publica, a ën souget abilità ënt ‘oou rispet ëd la nourmativa ën vigour ën materia.

Ërt. 28 Pëtrimoni

  1. Lou pëtrimoni ëd l’Unioun ou i ëst coustituì da:

  1. Bin mobil é imobil atribuì ën couseguènsi a l’ëmparsial ripartisioun faita tra ël diferentë Unioun (o ëd co singoul Coumun), bin cou vinhount da ël preezistent Coumunità Mountanë ëd lë Valadë ëd Leun, Cheronda é Casternoun, daou moumënt quë l’Unioun è i ëst lou souchesoù për li Coumun cou i ont sernù ‘sta foueurma d’asouchasioun coumë delimitaia, a li sens ëd l’ërticoul 12 ëd la legë rejounal n° 11 doou 28.9.2012;

  2. Bin mobil é imobil cou vinhount a l’Unioun atravers la soua coustitusioun;

  3. Ël përtechipasioun souchetarië;

  4. Aoutri proufit pëtrimounial ën aoutrë manerë acouizì.

CAPO V DURÀ, RECHES É DISOULUSIOUN

Ërt. 29 Durà ëd l’Unioun

  1. L’Unioun è i eu ‘na duràia ilimitaia countand la decourensi daou 28/04/2014 foravia lou dirit ëd reches doou singoul Coumun é ën li cas ëd disoulusioun ëntichipaia.

Ërt. 30 Reches doou Coumun

  1. Onhidun Coumun partechipant ou peut rechedri unilateralmënt.

  2. La deliberasioun ëd reches è vint pìia daou Counseulh coumunal rechedent a to la majourënsi nechesaria ëd co për ël moudifiquë statoutarië, descrivënt ël razoun cou i ont determinà la voulountà ëd rechedri.

  3. La deliberasioun ëd reches è vint mëndaia ën 10 dì da la soua adousioun aou President ëd l’Unioun, a li Sindic ëd li Coumun partechipant é a la Rejoun.

Ërt. 31 Efet é adempimënt cou vinhount daou reches

  1. Lou reches ou deout estri deliberà ënt lou 30 ëd junh é ou i eu efet daou 1° ëd gene ëd l’an souchesìou.

  2. Lou Coumun cou rechedët é l’Unioun ou defineisount d’acordi lh’efet doou reches për seun qu’è rigouardët lou pëtrimoni é li raport juridic ën at, applicant ëd nourma ‘sti prinsipi:

  1. Oubligasioun- lou Coumun cou rechedët ou i ëst oubligà mëc për lh’ëmpenh piìa pruma ëd la data d’adousioun ëd la delibera ëd reches, cou sount gestì da l’Unioun finha a la soua natural scadensi;

  2. Pëtrimoni: lou pëtrimoni acouizì da l’Unioun ou restët a dispouzisioun ëd l’Unioun medema a echesioun ëd seun cou t’istà dounà daou Coumun cou rechedët é cou i ëst counsiderà nhint ëndispensabil për la prousecusioun ëd l’ezerchisi asouchìa da part ëd l’Unioun. Lou Coumun cou rechedët ou intrët toueurna ënt la dispounibiltà ëd li bin counferì a l’Unioun ënt ‘oou cas quë ‘sti bin ou sount nhint nechesari për lou regoular zvoulgimënt dërz’atività istitusiounal é aministrativë ëd l’Unioun medema.

  3. Intervent: ou sount ëd coumpetensi ëd l’Unioun lh’intervent ouget ëd prougramasioun rejounal, prouvinchal o loucal finha a la fin doou chiclo ëd prougramasioun ëd co ënt ‘oou teritori doou Coumun cou rechedët.

  4. Ënt ‘oou cas quë s’aruvët nhint a n’acordi, la definisioun ëd lh’efet doou reches ou sount dëmandà an coulejou arbitral coumpost da ‘n raprezentant doou Coumun cou rechedët, da ‘n raprezentant ëd l’Unioun é da ën ters raprezentant nouminà d’acordi dal douë part.

Ërt. 32 Disoulusioun ëd l’Unioun

  1. L’Unioun es’ dësfait can cou vinhount meno ël coundisioun ëd legë previst për la soua coustitusioun

  2. Li Coumun cou font part ëd l’Unioun can quë vint dësfaita, ou definesount d’acordi tra leu lh’efet ëd la disoulusioun për seun qu’è rigouardët lou pëtrimoni é li raport juridic ën coueurs.

CAPO VI MOUDIFIQUË ËD LOU STATUT

Ërt. 33 Moudifiquë ëd lou statut

  1. Ënt ‘oou moumënt ëd pruma istitusioun lë Statut ëd l’Unioun ou vint aprouvà da li Counseulh ëd li Coumun partechipant é ël souchesivë moudifiquë ou sount aprouvaië daou Counseulh ëd l’Unioun a li sens ëd l’ërt.32, comma 4 doou D. Lgs. 267/00 coume moudificà da l’ërt. 1, comma 105 ëd la lege 56/2014.

CAPO VII NORMË TRANZITORIË É FINALË

Ërt. 34 Normë ën materia ëd persounal ëd la preezistent Coumunità Mountana

  1. Lou persounal a to raport ëd travai a ten ëndeterminà ën servisi ënt la preezistent Coumunità Mountana ëd lë Valadë ëd Leun, Cheronda é Casternoun, a li sens é per lh’efet ëd l’ërt. 31 doou D. Lgs. N° 165 doou 30 mars 2001 é s.m.i., ou vint trësferì a l’Unioun ënt ël manerë é a to li vincoul stëbilì daou comma 5° ëd l’ërt. 18 ëd la L.R. 28.9.2012 nà 11, sensa nhun peis finënsiari ajountìou për l’Unioun.

  2. Lou trasferimënt doou persounal ëd la Coumunità Mountana a l’Unioun, ën relasioun a lou ricounoushimënt ëd lë proufesiounalità ën servisi për l’ezerchisi ëd lë funsioun counferìë, ëd coui a l’ërt 15 é ën përticoulà doou comma 2° litra g) ëd la legë rejounal n° 11/28.9.2012 é counsegouent pian ëd ripart doou persounal tra ël diferentë Unioun o foueurmë d’asouchasioun cou sount ën tren ëd fourmasë, ou devount nhint coumpourtà speizë ajountivë.

  3. Ënt ‘oou rispet ëd li liam enounchìa a li comma 1° é 2° doou prezent ërticoul, l’Unioun è peut ëd co estri la capofila ëd ‘na Counvensioun, d’acordi avé d’aoutrë Unioun, foueurmë d’asouchasiouno ëd co ëd singoul Coumun.

  4. L’ëndicaia counvensioun, asourbënt tou’ lou persounal ëd la preezistent Coumunità Mountana a to la coulegaia cuertura finënsiaria, è regoulamentët la perchentoual d’utilizi da part ëd lh’aoutri souget couinvolt ënt ‘oou pian ëd ripart, ëd lë unità ëd travai atribuìë ën bazë a lë rizultënsi doou pian ëd ricounhisioun fait daou Coumisari.

Ërt. 35 Përsounal trësferì o dëstacà da li Coumun

  1. Ën sedë ëd pruma aplicasioun, a li sens doou comma 5 ëd l’ërt. 32 doou T.U.E.L. ëd coui aou D. Lgs. N267/18.8.2000 é s.m.i, la speiza për lou persounal nechesari për l’ezerchisi asouchìa ëd funsioun o servisi coumunal, trësferì o dëstacà a l’Unioun è peut nhint coumpourtà lou superamënt doou toutal ëd lë speizë ëd persounal sustenuë prechedentemënt da li singoul Coumun, për seun l’Unioun è prountët tui’ lh’istitut për la gestioun doou persounal, cou sount previst da la legë é daou countrat couletìou nësiounal ëd travai, fazënt pruma esperimënt ëd lë prescritë relasioun sindacal.

Ërt. 36 At regoulamentar

  1. Finha a l’emanasioun ëd lh’at regoulamentar da part ëd li soun ourgan, a l’Unioun ou s’aplicount ën maneri prouvizoria é se coumpatibil, li regoulamënt gë ën vigour ëd la preezistent Coumunità Mountana ëd lë Valadë ëd Leun, Cheronda é Casternoun.

  2. Për l’ezerchisi ëd lë funsioun coumunal, ëndoua è i eu nhint li regoulamënt ëd la Coumunità Mountana, ou s’aplicount si adoutà da li Coumun ëd l’Unioun o da un ëd sitti individouà da l’ourgan ezecutìou ëd l’Unioun.

  3. Ën sedë ëd pruma aplicasioun é për lou prum an soular d’aplicasioun d’atività lou Tezourié ëd l’Ent ou i ëst lou Tezourié ëd la preezistent Coumunità Mountana.

Ërt. 37 Ërmand

  1. Për tou’ seun cou i ëst nhint previst daou present statut è s’ fait espres ërmand:

  1. Al nourmë ëd la legë rejounal 28.9.2012 n. 11 “Dispouzisioun ouganiquë ën materia d’ent loucal” é ën përticoulà a lh’ërticoul 4 é 5.

  2. Al nourmë doou T.U.E.L. ëd coui aou D. Lgs. 18.8.2000 n. 267 “Testo unic ëd lë legë su l’ourdinamënt ëd lh’ ent loucal” é s.m.i.

Ërt. 38 Intraia ën vigour

  1. Lou prezent Statut ou intrët ën vigour ënt li termou é a to ël moudalità stëbilìë a l’ërticoul 6, comma 5 doou decret legizlatìou 18.8.2000 n.267 é s.m.i.

  2. Lou termou ëd trënta dì, lai ëndicà për l’intraia ën vigour, ou parteit da l’inisi ëd la publicasioun dlë statut da part doou Coumun cou li prouvedët për ultim.

Alegà a lë STATUT

ëd l’Unioun Mountana ëd lë Valadë ëd Leun, Cheronda é Casternoun.

(Ërt. 4, comma 3)

Funsioun é servisi counferì da li Coumun

  1. Catast, a echesioun ëd lë funsioun mëntinuë a lë Stat da la nourmativa ën vigour (Legë n. 135/7.8.2012 comma 1°, let a) veus c) ëd lë funsioun foundamëntal ëd li Coumun, a li sens ëd l’ërt, 117, scound comma litra p) ëd la Coustitusioun.

  2. Proutesioun chivil, atività ënt la sfera coumunal ëd pianificasioun ëd proutesioun chivil é ëd couperasioun ëd li prum soucoueurs (a escluzioun doou coumun ëd Val dla Tour).

  3. Ourganizasioun general dl’aministrasioun, gestioun finënsiaria é countabilë é countrol.

  4. Ourganizasioun ëd servisi public d’interes general ëd sfera coumunal, coumpreis ëd co li servisi ëd trasport public coumunal.

  5. La pianificasioun urbanistica é edilisia ëd sfera coumunal ma ëd co la përtechipasioun a la pianificasioun teritourial ëd livel sovra coumunal.

  6. Prougetasioun é gestioun doou sistema loucal ëd li servisi souchal é erougasioun ëd lë relativë prestasioun a li sitadin.

  7. Polisia munichipal é polisia aministrativa loucal.

  8. Ourganizasiouna é gestioun ëd li servisi d’arcolta, zmaltimënt é recupero ëd l’ëmnis urbana é la riscousioun ëd lë relatìvë taië

  9. Edilisia scoulastic, ourganizasioun é gestion ëd li servisi scoulastic.

  10. Servisi ën materia statistica.