Un ân, ei prinsippi dei siècle, per lou trento dezembre, journ de Sent Ziene (fèto de Ziene Poét, que alouro èro sendic dei Roure), quella canallha de Viaretin, qu'avìan pluziöri countie da aranjâ aboù el (l'Ambrouaeze Davi dei Malvezin per l'afâ de l'azil, lou notari Martin per lî tree benout e per lou testament dei fantoch de pallho, etc.), ân desidà de se venjâ e de nen coumbinâ uno diaboulicco a quee filoun de Poét. L'ocazioun se preitavo perqué quel ân Sent Ziene chöìo justament de diamenjo, que la gent vân voulountìe à l'ostou.
D'acòrdi aboù Ferloqué dei Viaaret e aboù lou meddi Tesour de Feneetrèlla, il ân aprestà un groo cartèl, ou aficcho, aboù setto eicrituro:
«Oggi, giorno di Sant'Eugenio, onomastico del proprietario, nella Trattoria Poet si venderà la Barbera d'Asti a metà prezzo: 6 soldi al litro. Tutti da Poet!».
A l'albo dei trento, lou cartèl èro jò ei Cerjòu ben en visto, pendù ei pieloun que fai da tilet per lh'avis de la coumuno e que se trobbo su l'angle ounte la vio de lâ lea da la Rouso e da Chambelìe se unî aboù lou groo chamin, quazi en faso de la fòrjo. Quel l'èro un pasagge oblijà per tutti lî Cerjòurin dei Cerjòu velh e per uno bouno part di Balmeirin e, dounco, l'èro empousibble pasâ denant lou cartèl senso lou leire.
Lâ prumiera que l'ân leiù l'eez iità lâ fenna matiniera qu'anavan a meso prumiero; pöi, vèrs dê oura, ân coumensà a pasâ tutti lh'òmme qu'anavan a meso grant. Ren que la famillho Poét l'a pâ leiù, perqué elli il avìan l'ostou un bê toc pi aval su lou chamin e il avìan cazi jamai l'ocazioun de pasâ denant lou pieloun. Dint l'aprê mezjourn l'ostou de Poét a coumensà a se remplî coumò un baril d'anchoùa; se la fousse pâ iità, d'uvèrn, il aurìan degù butâ foro, dint la court, de taula e de bancha per lî fâ asetâ tutti. Pöi caicun s'ez avansà vèrs mousù Poét per li souatâ bouno fèto e lou laudâ perqué al avìo desidà de la festejâ en arbaisent lou vin a lî client.
Mousù Poét ee chöit da lâ nebbla en sentent parlâ de cartèl e d'aficcho, ma al a subit minjà la föllho e a mandà imediatament un òmme ei pieloun a retirâ quee maledet cartèl (qu'èro eicrit a man aboù un penel, ma senso sinhaturo); ma ormai la fritâ èro faito e al a pâ pogù fâ a mens de fâ bouno mino a marì joc e al a degù se rasenhâ a vendre sî littre de barbero a sèi sòldi noumpà de douzze.
Pourtant, lou furbachoun, per pâ lh'ajountiâ trop, aprê lâ prumiera doua brinda de barbero vendùo a sèi sòldi, al a fait pasâ la vous que, la barbero estent finìo (a soun dire, lou boutal èro jò vöit!), al èro oblijà de distribuî de vin de Brequeirâ, ma que â lou dounavo decò a meità prê, a cattre sòldi lou littre noumpâ de öth. L'ee evident que su quee vin â li perdìo pâ gran chozo, perqué â li coutavo mequé dê ou douzze lira la brindo.
Ma so que lh'a fait pi rabbio l'ee cant, vers lâ sinc oura, â s'ee vit aribâ dint l'ostou toutto la bando di Viaretin (lou notari, l'Ambrouaze, Ferloqué, lou meddi Tesour e caiqui autri) que, fazent la part de l'inousent e de l'eitounà, ân coumandà decò elli un littre de barbero da sèi sòldi. Mousù Poét, que mandavo flamma da sî ölh, al aguesse pogù, â lh'aurìo fulminà; ma, denant la salo pleno de gent, al a degù fâ finto de rien, se quezâ e eibauchâ un sourire da charcutìe. Naturalment, al a subit pensà a uno severo arvenjo apeno pousibble. E lou pèis l'ee que, aguent dit a lî client qu'al avìo finì la barbero de boutal, al a degù fâ portâ doua boutellha de barbero stoup per fâ béoure gratis quelli coquin de farseur viaretin que l'avìan si ben couiounà.