A l'acoumensâ dei mount, fin da l'albo de lî temp, lh'omme î dörmìan e minjavan desous de balma o, cant il eran pi fourtunà, dint de tune naturèlla, per se arparâ da laz intemperia (pluo, neo e freit).
Lâ tuna naturèlla â servìan decò per se defendre melh da un eventual atac da part de la bèstia salvajja o, peis encaro, da quella ferujja.
Ma jò alouro la lh'èro de bèstia que èran tout are que pericoulouza per l'omme, ansi, la nh'èro que â cerchavan de s'avizinâ e de se fâ amiza!
Un brut journ, dint uno de setta tuna naturèlla, la lh'èro restà soulet, soulet un picit meinâ bien malatte. Soun pappa e sa mamma il èran anà per la fourèto cerchâ caicaren da minjâ e lou fuoc al èro bèlle eiquì per crepâ e queen la sarìo ità brut e bien pericouloû per quee picit paure meinâ jò bien malatte e que avìo mequé pi un pauc de forso per gemme e ploûrâ.
Eiquì a l'aviroun, coumà l'ee iità toujourn soun abituddo, la lh'èro un bèl uzelic que, encâ öiro, sourtoû cant la fai bien freit, al ee arè a l'aviroun de noutra meizoun, â sent gemme e, curioû, al intro e â ve quee picit tout en grumilhoun dai freit e da lou mal. L'uzelic â fai doû o tree sautin pi outro e â ve que lou fuoc al ee bèlle eiquì per se tuâ; â coumenso vitte, vitte a fâ turno-puo en portant de bucha de pallho e de picitti toquetin de ramillho perqué lou fuoc poie tourno s'alumâ!
Dint un paaren lou fuoc tourno a fâ sa bèllo flamelo e a eichaudâ quee paure meinarot que senso quee chaut eìquì al aurìo riscà de miörî. Aprê un moument l'èro bèl a vee... lou fuoc que eiclopetiavo tout countent de poguee eichaudâ quee picit meinarot bèlle mouribount que planto eiquì de gemme e de ploûrâ encoumenso a sourire a quee picit uzelic, dreit su la peiro que serv da sètti a la mamma dei meinarot, bou lou pittre ben en foro demando bou soun
cip-cip, cip-cip se öiro la vai melh!
Un spetacle que coumoverìo un cör d'asìe!
Lou Boun Diou, que tout ve e que toujourn ricoumpenso quelli que fan de ben a soun prosim, vit l'uzelic talment generoû e talment bèl bou soun pittre ben eiclarà da lou fuoc, per ricoumpenso al a fait que despöi d'alouro, tutti sî disendent, fin a la fin dei mount, il aureen lou pittre roui flambant e se demandereen «Pita-rous».
Lou pitarous l'ee verament un bèl picit uuzèl e soun pittre roui flambant, sa gentileso dint lou sauticâ, sourtoû d'uvern, a l'aviroun da noutra meizoun l'ee proppi un eritagge de quello prumièro bouno asioun!