Un dzourn, cattre ou sinc tsasau pradzalencs i desiddon dë fô une batua a la lhaure din lou prô dë la Tsalme. Lë lendëmon matin, dë boun'oure, lou tsasau s'entsaminon beqque lâ darìëra-z-itìëla brillhon din la vaute dâ sìël que, pìël a pìël, së fai clôr. Lh'à d'cò lë Dahinot (Dolf Vilhot d'lâ Traversa) e Felix Blonc, lë poustilhoun, dë la Soutsìëre, boun tsasau e boun farsör.
Aribô a la Tsalme, i fon un boucoun dë didzen: une letse dë pon, une belle fette dë sousisse ou dë fratin e un veire dë qui boun vin que lë Dahinot vent a soun ostou.
Un moument aprê, lardzô lâ vesa, lou tsasau s'iboulihon din lou prô dë la Tsalme, tsì d'un caire tsì dë l'autre, beqque lâ vesa tsartson lâ pita dë lâ lhaura. La pôse caqua minùtta pèi un gro tsôt salvadze saute fore d'un bosciou boù une vese a lâ trousa: l'ée une belle bes-ce, grî, boù doû éu dë fuëc e la boure dreite. Un tsasau pouente soun fezìël e lë tsôt tsè mort din lë bê mèi d'une abialanhe.
Felix Blonc, qu'ere pa bien lönh, â s'aprotse e, vit qui bê tsatòn grî, â pense d'abort dë coumbinô une marminelle â Dahinot que, itent plu icartà, al avia pa vit soqque s'ere pasà. Al avia mequé entendù un brôlh: la lhaure ée morte!
Lë poustilhoun pren lë dzournôl qu'â tenia din sa capusine, â lh'envourtoulhe la tete dâ tsôt per pa que la së notte la difrense e pèi â soune lë Dahinot: «Dolf, ven vitte, ven vée la belle lhaure qu'ou-z-aven tuà... I pezarè cattre ou sinc quiloo!...».
Lë Dahinot aribbe ifaruclà c'mà dzamai e â vè la lhaure londze itendua din lë prà. Sa viste ée pa d'lâ plu bouna e aloure as n'avize pô que la famöze lhaure l'ée pa d'aure qu'un... tsôt salvadze!
«Dolf - dì encôre l'amic farsör - quelle lhaure il ée talmenta belle e pezônte que la saria mélh que tu la pourtessi a mizoun, beqque nou ou fazen encôre un vir per tsì lôi. Aprê, ou venen béure l'aperitif a toun ostou!».
Lë Dahinot, que pensôve dzò a un'intrô triounfôle a lâ Traversa, â dì qu'ôi e dint un clinh d'ölh as vè enfielô lë tsôt, pardon la lhaure, din sa casadoure. Pei â pren soun fazìël, a soune soun Febo e â pren lë viol, fia c'mà un Artabon.
Din pa gaire al ée a soun vieladze dount â rancountre une coumaire e pèi encôre un'autre e din pa gron temp toù lë mound sôp que lou tsasau òn dzò tuà une grose lhaure. Lou curioû s'abarounon dron l'ostou, qu'ée proppi a mèi dâ vieladze, per vée quelle belle lhaure que pezarè sèi ou sette quiloo, grose c'mà un anhel!
Aloure lë Dahinot enfìële la mon din a casadoure per tirô fore la lhaure ma la satsìëre ée un paouc itrèite e la lhaure vò pa venî... A plonte aloure n'es-ciancoun en bralhent: «Argardà que belle bes-ce...argardà que belle...» e sa vous s'itouffe a foûn d'la goule cant a vè la tete dâ tsôt que, en tirent, i s'ere divourthoulhô dâ dzournôl. A l'aviroun la dzent iboffe a rire beqque lë Dahinot së fai roui dë rabbi e dë coulere qu'â vo tuô tu sou-z-amics, Felix Blonc pël prumia!
Un istont aprê lou tsasau aribbon, sî viedze aboù une belle lhaure, ma une lhaure per daboun, qu'î dounon a la fenne dâ Dahinot per qu'i nen fôze un boun sivè per tuts. Pêi i s'asetton e il atendon que lë Dolf, qu'acoumensôve a s'apazhô, lour porte l'aperitif c'mà il eron d'acort!