Bieen de sent ân areire, dizen puro, de milo e de milo ân areire, lou chat e la vèso il èran un pauc prê groo istes e il anavan d'acordi coumà se la fousse iità fraire e sore; proppi coumà lou Boun Diou al avìo volgù e creà tutta lâ bestia, (e lâ persouna!) perqué â pöplessan la tèro e toutta â vivessan en bouno armonìo e countenta tra ella.
Ma un bèl journ, (l'ee forse pi just dire: un brut journ!) la vèso, que jò alouro la li plaìo de rougilhâ soun oo ei cuou d'un poumie î se nen vai fâ un viret de quee caire ounte li paso aval un bèl rioulot d'algo frecho per anâ s'arfreechâ un pauc e, naturalment, se parâ la se!
Lou chat, coumà oû sabeen, al ee toujourn iità, fin da louro, un furbachoun dei diau e soun travalh pi groo l'ee quel de dörmilhâ bou un ölh serà e l'autre pâ e al a toujourn agù uno forto gargareo cronicco.
En veient, bou l'ölh ubert, que la vèso avìo entrepausà soun oo eiquì decaire â se ten papì, â se lèiso douminâ da l'ingourdigio â vai eilai, pren quel oo pâ seou e vìo pi vitte que en prèso a s'anâ cerchâ un cantoun ben eicoundù per poguee lou raaclâ ben ben!
Cant la vèso aribbo, toutto countento d'aguee ben begù e de s'èse ben afreechâ, î vai tout dreit ei cuou dei poumìe, ma viro que te viro, cercho que te cercho, l'oo â lh'ee papì! «Vottu vee....» î se di la vèso, «....vottu vee que l'ee quee farinel de chat que me l'a portà vio!? » e, vit que lou Boun Diou â lh'à dounà lou gran doun de sentî la pito il acoumenso a suunâ e cerchâ la pito dei chat.
Li vai pâ bieen... din un paaren î lh'ee acol! Lou chat, en sabent d'aguee tort mars â planto eiquì l'oo e vìo tant que â n'a; la vèso lh'apré en japant coumà uno disperâ counvinto que l'ee ouro de dounâ uno bello leisoun a quee plandroun d'un ladre matricoulà!
Oû poieen ben enmaginâ coumà l'ee anâ finî: lou chat â n'a agù per un pauc a acudî queicuna de sâ cota eicrusìa e la vèso il a pöi adirituro perdù l'ölh senetre senso countiâ lâ numerouza eigrafinhöira tout lounc de soun paure nâ!
Da pöi den-louro lh'ee mai pi iità la pas; la vèso î s'ee mai pi ricounciliâ bou lou chat que al a zamé perdù lou visi de dörmilhâ, pâ fâ ren e de robâ!
E... se oû li penseen ben, bieen d'omme dei journ d'encöi e d'ìe, î vivan un pauc coumà lou chat e la vèso fazent pâ ren e, pi souvent, deimentiant que la ricounciliasioun, bou sa gent, l'ee un gran dëvee.