A Pradzalà, c'mà din tu lou paî d'mountaggne, lë mée d'abrìël marque la boine d' l'uvern. Un viedze, apéne la néu ére foundua ventôve arcoumensô lê travôlh d' campaggne: ratlô lou prô e curô lou bials, semenô lou tramée, l'avéne e l'iordze, e pei ratlô lë valoun, fumô lâ trufìëra, fô lâ via. C'mà ou vihà, lh'avia toù d' suitte embaroun da fô.
Souvent lâ dzournô eron dzò bella, tebbia, boù lë soulelh que s' leve toudzourn plu vitte e que brillhe toudzourn plu aut din lë sìël. L'encapitôve d'cò que la plouguesse per dzours e semôna e aloure la ventôve aguée pascense que lë temp tournesse bel. Mequé lou gassi s' fazihon pa dë bile e il anôvon a lâ rôna per bials e gourcs.
Un ôn la belle sazoun ére aribô vitte. La fazia proppi dzò boun e toù lë mound avia acoumensà a semenô sâ tèra dë boune voellhe. Nou, dlâ Grôndza e dâ Rivée, ous avihon da semenô lâ tèra dâ garait dlâ Grizola.
L'ére a pé prê vel vint d'abrìël: lou prô avihon dzò arverdià e lou foure néu, lâ pimpetta, lou preirée fazihon tutut isôi e ilôi, baizô dâ tebbi raioûn dâ soulelh.
La dzent ére countente perqué, armarscent Diou e lë bê temp, il avia pougù semenô proppi ben, sens dzi dë fastùddi: dint un clign d'oelh, lâ tèra dlâ Grizola eron itô semenô côzi toutta. La mancôve mequé iquella dâ Serafin dâ Rivée que, dapè lâ-z-autra, i semblôvon en dzirp. C'mà d'abitùdde, notre barbou Serafin ére lë daria!
Un dzourn, beqque a tournôvou a mizoun aboù moû piroûn perqué ou-z-avihon finì notre travôlh e isertà la talve dlâ tèra semenô, ver meidzourn, ei rancountrà lë Serafin, sa Dalfine e soun Balin, tsardzà dë semensa, d'araire e dë fesours. Aloure a lh'ei dit:
-Boun dzourn, barbou Serafin... Sà-ou pa un pìël en artart a semenô? Toù lë mound à finì... Ou lei sà plùcca vou...
Lë barbou plônte soun muël, â m'argarde d'une ère drolle, boù la goule uberte e pei am dì:
-Oi, â siouc en artart... ma, sùlmenta, la tère ée encô freide!...
Pei al ée arpartì en dziboutient entre éel beqque sa Dalfine nou-z-argardôve dicounsoulô en soupatent la tete.