Dint un pëchò vieladze dë mountaggne, icoundù â mei d'une belle valadde, vivìa un viedze une familhole dë boutsirau. Il eron pauri: une pëchotte ouaria, une trufìëre, un ort e une vatsette que dounôve a la familhole dë boun lait que sabia lë parfun dlâ flours e dlâ-z-erba dla belle valadde.
Lë paire, boun c'mà lë pon, anôve talhô boc ità e uvern, din la belle e din la brùtte sazoun, perqué la familhole pouguèsse vioure. A travalhôve c'mà un neggre e d' nèut à tournôve a mizoun squentà; astà d' caire lë fouìha, â mindzôve une bosque dë bouridda ou dë lait bourô dë pon dur. Pei, aprê aguée armarscià lë Boun Diou, as foutia su sa palhôse e as enjurmia c'mà un toppou.
La maire i duvia pensô a soun pëchò minadze e acudî l'ort, lâ tèra e lou prô:
i duvia fô tu lou travau dë campaggne c'mà s'î fousse un omme. Il ere asoumô dâ travôlh e, meme s'il ere encô dzouve, i semblôve dzò vellhe, tsardzô d'ôn, d' fastùddi e d' mizere.
A iclarzî lâ griza dzournô dë qu'lou doû pori diau l'ere aribà un minarot. Il avihon batià Dzon, ma pei il sounôvon Dzon Pouiét. Al ere bel c'mà tu lou minô, blonc e rou c'mà une roze, arviscou c'mà un lhaurot, ma... â crèisia pô. Al ere toudzourn pêchot, talmenta pëchot que â pouiha s'icoundre dint un caisot, dint un partuu ou dë sou la foellhe d'un tsau!
Un dzourn lë bascou avia acoumpagnà sa maire qu'avia menà la vatse malhô l'erbe dlâ ribba dë caire la tsoulìëre. Toù s'ere pasà ben pr'une belle pese: la vatse malhôve fazent dë bella goulô d'erbe frétse; la maire survilhôve la bramelle tricoutent une flanelle per soun omme; lë Dzon Pouiét sautilhôve din l'erbe, â couria aprê lou parpilhoûn e lou tsapadrôps e â mindzôve lâ grouzella rouia qu'eron meurô su lâ brantsetta dâ grouzëlia que lë boutsirau avia plantà dint un cantoun dla tsoulìëre.
D'en viste e non viste une grose nebble nìëre acouvatte lë soulélh e la valadde s' fai icure e dë grosa itisa dë ploeie acoumenson a tseire; une dë qu' là ramô d'ità que, surtout en mountaggne, il iclatton emprouvizëmenta per leizô pèi un sìël seren e clôr c'mà dzomai. Lë Dzon Pouiét, per pa së bagnô, as foure dë gron carìëre dë sou une grose foellhe dë tsau, sens que sa maire s' n'avize.
Malgré la ploeie, la vatse malhe lâ plantoursina, lou dzalée e lë trafoelh pèi i fai une goulô dla foellhe dâ tsau dount s'ere abricà lë gamin e il avalle c'mà se rien fousse!
Un moument aprê, vit que la ramô quitôve pô, la boune fenne s' nen tourne a mizoun. Il itatse la vatse a soun rol, is tsôndze dë robbe perqué il ere toutte bagnô e pèi i s'apreste a mouzre. Din la prese is rent pa counce que la mônque soun pëchò Dzon: â sarè encô rablônt plâ tsarìëra ou fourà din quaque cantoun, c'mà d'abitùdde... pense la pore fenne be qu'i pren soun sedzelin e soun selot.
Aprê aguée poutirà un pìël lâ pousa dla vatse, i s'asètte su lë selot e il acoumense a mouzre: lë lait desent din lë sedzelin fazent une icùmme blöntse c'mà l'aigue dla coumbe que saute din la gordze.
Quant lë sedzelin ée per mità plen, la vatse trampiggne e aloure la fenne brôlhe:
-Vire-té isôi!
Une vou misteriouze ripount:
-Vire-té ilôi!
La fenne arsaute: la lhë semble que la vou véne dë din la trippe dla vatse...Ma non , l'ée pa pousibble, la pò pa esre...E il arcoumense a mouzre.
Ma la vatse tourne trampignô.
-Bramelle dà diau!- dziboutia la fenne. Pei i brôlhe:
-Vire-té isôi!
E la meme vou ripount:
-Vire-té ilôi!
Si viedze la vou ée ben plu forte e plu clôre e pei, sens doutte, i ven dë din la trippe dla vatse!
Ibabagiô, la fenne quitte dë mouzre; i foute soun selot dint un cantoun dâ teit, i pauze soun sedzelin e pei, c'mà une folle, is butto a tsartsô soun Dzon.
Ma, tsartse d'un caire, tsartse dë l'autre, dâ Dzon Pouiét pa dzi dë marque!
Aloure une idéie folle acoumense a viroundô din lë servél dla pore fenne. I s'aprotse a la vatse e i lhë brôlhe:
-Vire-té isôi!
E la vou din la trippe dla vatse: - Vireté ilôi!...
-Moun Dzon Pouiét... l'ée la vou dë moun Dzon Pouiét... Oh, mi paure, mi paure... qu'ei cì-a da fô?- i dì en sangluten fort, be qu' sâ dzauta së baggnon dë ligrùmma.
En s' fazent forse e couradze, la fenne vai tsartsô dë malva, d'usencs, dë dzensône, dë viouletta, d'erbe d'ezent, dë pon dë tsabbre, toù dë sori d'erba, dë foellha e dë rèi e i foute lë tout dint une oule pendua a la tseine dâ fouiha, dount il avia dzò butà bulhî l'aigue plâ bouridda. I leise coire lâ-z-erba un bê moument pei i ramplî une grose boutte e i la foure din la labbre dë quelle bramelle qu'à avalà soun filh e il oublidze a fouttre avôl quelle boulhacôse.
-Béu, béu zoù tout- i dziboutia or d'elle - parìa tu té pùrdzi e tu m' rendi moun Dzon!....
La vatse avalle tout fin a la darìëre itise. Quant la boutte ée vèude, la fenne, squentô e sciuô c'mà un batsô, i s'asette su lë tabouréet e il agatse que la vatse... côie e qu'i lhë rend soun Dzon, magôre manét e bouzoulou ma sòn e viou!
La pôse un bê moument, un'oure, magôre dë mai, ma pèi finalmenta la vatse acoumense a trampignô. La fenne quitte pa lë panô dla vatse, il gait boù atenscioun... Sou-z-èu semblon dou tizoûn dë brôze, tont i brillhon, e sâ môn tramoulon...
Ma ecco que la vatse ause lë panô e i côie une belle bouze que s'aplatî su lë dzô iboulià per sol. La fenne fai un arsaut... Il à vit quacaren boudzô din la bouze: -Moun Dzon, moun Dzon Pouiét!...- i brolhe. I s'aprotse a cuël dla vatse e il embrônque soun pëchò gosso, il foute dint une gôvi plène d'aigue tèbbi e il lôve. Pèi il envourtoullhe dint un patarel e il bùtte din soun leit dount â s'enjoerme dint un clign d'oelh, be que sa maire s'adzenoullhe sla pallhe pr'armarsciô lë Boun Diou.