La Janetto mando soun filh Toumet a Fountano Freido prenne uno baraquinâ d'aigo frecho. La fai chaut; lou soulelh picco a ploump e a vouz eicoucourdî! Lâ vippra, lâ lazèrnala e lâ gramuza soun a sâ gogga!
Toumet vai a Fountano Freido e aprèe aguee begù doû vee a se setto su una de quella peira platta que soun pappa avìo butà per entrepausâ lh'aise cant sa mamma vai a l'aigo per lâ bestia bou lou bazou. Apree un moumentin â resto perouchà e la li semblo de sentî: «Sia-tu pancâ plen?... dan l'auro que te pisou dint!» dì la fountano ai gourc. «Quezoté» reipount lou gourc... «lèiso perdre un moumentin ta bèllo muzicco e eicuto soqque a se countian quella doua eitisa que da lounc temp s'èran perdua de visto!».
En efet doua grosa eitisa se soun encountrâ aprê lounc temp e â soun en tren a se fâ soun discourset tou sout vous, ma ben animà, proppi coumà quelli que soun countent e öroû cant il artrobban un càr amìs!
La prumièro eitiso apree aguee saluà bou calour sa coulèggo (la se fai per dire!) i li demando coumà î se l'èro pasâ da cant â s'eran laisâ lou darìe vee.
«Ma te dirèi» reipount la segoundo eitiso «decò lou dèrìe vee siuc ìtâ fourtunâ! Fauc toujourn bien atensioun de pâ soubrâ p'la vìo..., ma sent que te countie! Öiro ou s'enchamineen aval per lou bialot plan, plan perqué a vai atravers a quelli prà. Fai atensioun a pâ te fermâ perqué se nò tu vâ parâ la se â queico bouch de arparâ o de creisoun. Lou bialot â vai se giuggne ai coumbalot... atensioun perqué al ee biendreit e tout plen de sautou e l'ee fasile eibrichâ su lâ roccha; la sarìo ta fin perqué lou soulelh dint un rien a t'eisuarìo! Aprèe lou coumbalot a se fout dint lou coumbalas ma eiquì ou li sien jò bieen e, meme se vento encâ fâ atensioun de pâ eibrichâ foro, l'ee ben pì fasile aribâ ai Cluzoun que l'ee quel que cölh toutta la coumba e lî riou de la valaddo. Cant tu aribbi dint Cluzoun, countuno a arcoumandâ la segundo eitiso, mefiotè e ten-tè toujourn tan que tu pòi s'lou mes perqué dint que groo riou l'omme, da un pauc de temp de see caire, al a coumensà a li fouttre tutto sorto de porcarìa. Chaatant, loun dei Cluzoun, la lh'à d'embranchament d'aigo que l'omme al a batì per fâ virâ sî moulin e sâ tourbina per generâ la lucce eletricco ma, te diouc franchament, mi zou ritenou pâ pericouloû, ansi, la me fai uno drollo de sensasioun cant me trobbou a fâ quel gran saut... la me semblo d'èse toujourn jouvo! Pì lou Cluzoun vai aval pì al ee sfrutà per abielâ lâ campagna e, eiquì, vento fâ bieen, bieen atensioun a pâ sortî se no tu risqui de anâ chavâ la se a uno planto de melio! Aprèe lou Cluzoun a se fout dint un autre gros riou e cazi subit soun aigo vai s'argiouggne ensemp a quello dei pì groo fium d'Italìo: lou Pò. Cant tu te trobbi dint lou Pò, countuno a dire, aprèe de aguee prê un pauc de flà la segundo eitiso, ensemp a d'autra milo milioun de noutra coumpagna, la te semblère que a finise papì! A la fin de quel lounc viagge tu vâ finî din lou mar... grandioû... imense...! e se tu a agù la chanso de pâ te lèisâ eitoufâ da la petroulio que l'omme, (que delincouent!) a leisà scapâ basto que sie, tu sarê baizâ dai soulelh e, per uno lei meravilhouso creâ da Quel que tout fai e tout po', tu anarê finî su uno bèllo nebletto que trasportâ da l'auro de daval, te porterè tourno su setta bèlla e splendidda mountaggna ounte tu poirê tourno arcoumensâ, coumà fauc mi öiro, lou lounc e tant meravilhoû viagge!».
Toumet s'arvelho de colbe...! Soun Loublin ee en tren a li lecâ la man coumà per li dire: «Fai vitte, Toumet, que toun pappa e ta mamma t'atendan... il an se!».
Dint l'uvern, en fazent soun travalh su lâ siensa naturèlla â s'arsouven dei discourset sentì a Fountano Freido e queen la li frutèrè un bel öth sû soun caìe!