Mizoun l'ée-z- un gròn quèr, qu'à tônta roua
e la darìëre souvent l'ée la mamà,
que pure en travalhent i vè lâ soua.

Un viedze dint un paî la s'ée troubà
que notre roua, sens ipoucrizia,
travalhôve dë boun coer e voulountà,

anque se ogni tont il icrusia...
Ma en familhe i nen fazion pa cô:
l'ere une roua... eh! basta que sia!

L'ére mequé la mamà... que deu ben fô
toù soqque la vente, c'mà i fousse dë fer.
E èlle toudzourn su l' tir, a travalhô,

a pousô ciùttou e a soutenî soun quèr,
anque se l'ére souvent amôr e dur
vée que lâ-z-autra toutsôvon pa tère!

Lâ-z-autra roua, ben lùstra, que pure
eron tratô da damma aboù lou fiocs
avion trò pau dë fô brùtte figure

en travalhent c'mà fon lou fabiocs.
Ma cant un bru moument, a forse dë gouai,
lâ soun toutta ruinô per sol a tocs

pël pée dâ quèr (magôre frut a dzamai),
e mentre tuts lë dounôvon foutù,
malgrè lë pée l'icrazesse toudzourn mai,

èlle soulette, la maire, il à tengù,
sarent lâ dên, encastrô su la broua,
dounent a tuts encô mai da degù.