Doun Batistin al avìo pasà tree ân da viquere din uno grosso parouaso de pianuro, pöi al èro ìtà mandà a la parouaso de Sen Barnabé aut eiquiaut sû proppi a la simmo dei Gran Valoun. L'ee pâ que la li plaguesse pâ... ansi! Al èro countent e ourgouglhoû a'èse un curà de mountagno; a s'èro fait ben volguee da tutti, sourtoû da Juspin, lou patroun dè l'uniqque ostou que lhi fousse eiquiaut.Chaatani, coumà fan decò si parousien, â vai beure soun couart e a fai la bartavelhaddo ensemp a lh' autri omme e, magaro cant la porto l'ocazioun, decò la partìo a tree-sèt.
«L'ee pâ perqué» a dì: «l'ee pâ perqué portou la cotto que siuc pâ un omme coumà vouz'autri... vou semblo-lò?».
Ma pâ tutti la pensavan coumà el! Al ee proppi just que velh prouverbi que dì: «La lengo de la fenno i deicus e i talho tant e pì que un sabbre din un champ de batalho!".
L'évèqque ven a sabee de la sortìa de doun Batistin (quisau pöi de gaire engrosâ!) e un bèl journ a desiddo de anâ se asugurâ se l'èro proppi vee que un de sî jouve curà, que al avìo toujourn creiù ben en piotto e ben serioû, se fousse dounà a beoure en qu'lo manièro eiquì. Al aribbo a la curo de Sen Bernabé e â demando a la sirvento ounte al ee doun Batistin...; la sirvento que se vé denant l'évèqque i sau
papì reipoundre gran choso e en se counfoudent pâ mal e en cacaretent encâ de pì î planto foro uno pantoumino interminabblo e incoumprensibblo!
L'évèqque s'en doutto e a s'appròccho vers l'ostou de Juspin... Doun Batistin al ee proppi a l'ostou! A s'ee peno fait portâ soun couart que, a travers lî vittre de la fenetro, al arcounouis l'évèqque. A pren lou couart e vitte coumà un eilusé a së lou fouro din uno de la sacièra de sa cotto que a soun founzùa coumà un pous!
Coumà l'évèqque intro din l'ostou, doun Batistin s'afrando vers el per lou riverî...; l'évèqque serioû e un pauc brusquement â li demando soqque a fai eiquì a l'ostou. Doun Batistin tout sourient e pâ per rien emousiounà, reipount: «Siuc en tren a moutrâ lou catacirme a Juspin que... oie, oie, al ee brave coumà un soldi, ma al a cazi tout deimentià, e al a proppi bezougn de uno bèllo arpasadino!».
Din quee moument eiquì Juspin aribbo sai de la cuzino e, virent l'ölh su la taulo ounte al avìo pouzà lou couart dei curà e senso se n'avisâ de la presenso de l'évèqque â demando: «E lou couart!?». «Lou couart?» reipount vitte, vitte doun Batistin «Lou couart a coumando: ounouro e respetto toun paire e ta maire... tutti ti superiour, tî client, tî amis, tâ sore e tî fraire! ».