Vèi mùrs
dlâ mizoûn dâ-z-Ilên,
mùrs
pousirou e grî,
dùrs
c'mà lâ rotsa d'la Rougnouze
miprizô
dâ temp e dâ siècli pasô...
Vèi mùrs aboù la guigne severe
ardousìa dâ nîn
d'lâz alôndra e dà tin-tuîn:
â mèi une pëchotte fenetre
uberte
c'mà louz èu d'un gosse...
Lë soulélh
a pëchot a pëchot penetre
din la mizounette e â baize
la frount d'un vélh,
a soun aize
dapè l'fouhìa qu'itsaude sâ môn
e fai ardzouvî soun coeur...
Mùrs vèi dë sent ou dë mil ôn
qu'on vit pasô
lâ nouvella ipouza
abilhô
boù lou moutsau d' lâ frondza
tou foudìals dë seie,
mùrs qu'un dzourn trò leugn din lë temp
on counouisù lou brai
alègri dâ minô,
qu'on icoutà aboù gran péne la vou
d' la clotse
qu'anounsciôve une pasô:
l'ére un'autre vitte finìa,
un'autre crou
qu'anôve s' plantô
din la tère benizìa...
Vèi mùrs
boù lâz empôra d' boc
pléna d' lindze frec dë savoun
e dë lensìa
parfumô d'usencs
e dë roza dà goulenscìa;
mùrs
souliddi dë peira e lauza
que frétsa on counservà
lâ crotta dâ vèi
dount gôvi dë lait
e tupinô dë sousissa
e sibbrô dë lart
e mountagna dë trufa
éron la vitte d' la dzent
que din la vèlhe bourdzô
à vicù une vitte
trò dure e amôre...
Aprê mil ôn
la dzent il ée anô via
e il à leisà soulét lë pëchò vieladze:
enquèu, lou mùrs,
miprizô e soulée,
i digringollon â sol
boù gron tapadze
din la tsarìëre...
Un vol dë nìa courbô
disparèi
aut dint lë sìël...