Tousôn boine dë l'uvern! Une dë lâ plu grosa feta dë l'on que, din notre coumune, marque la fin dë la belle sazoun.
Lâ vatsa sorton pa mai, perqué a Tousôn finî la ferme dâ vatzìa: aprê la fete, se lë temp së manten bel, lâ bes-cha sorton pèi magôre encô për malhô qui pìël d'erbe qu'ée soubrô su lâ ribba e su lâ simousa d'lâ tèra abricô e que la dzìure à ipargnà.
E que freit la fai dzò! Lou dzarô plouron dë ligrùmma dë glô e la néu ée pa embaroun leugn e i s'aprotse toudzourn mai... Dabort la sarè uvern, lë lanc uvern pradzalenc: euch mée d'uvern e cattre d'enfern, c'mà dizìon lou vèi...
Ma Tousôn l'ée-z-une grose fete. A dirèi que a Pradzalà l'ée toudzourn ità une d'lâ feta plu counsiderô e plu sentìa. Din toutta lâ glèiza, a la mése e a la founscioùn dâ mors, la lh'avia toudzourn embaroun dë dzent, magôre vengua dë leugn.
-La lh'à dë teta nouvella, enquèu! dizìa aloure Bermoundot que, beq lë curà pritsôve, icoundù darèire lâ tenda dâ coer dë la glèize de La Ruô, s'amuzôve argardô la dzent que rampliscìa la glèize, abarounô din lou bôncs e s'la tribune.
En infet qui dzourn la dzent ére noumbrouze e d'cò lou-z-ommi intrôvon për tempe a la mése grônte e pa mequé aprê la prétse c'mà i fazìon d'abitùdde: la lh'avia proppi dë teta nouvella, lë dzourn dë Tousôn!
E la mése ére une fameuze mese, c'mà la së nen dizìa pa gaire din l'on! Lou couristri tsantôvon la Mése dâ-z-ôndzi, acoumpagnô dâ soun dë lâ-z-orga que le viquére dâ Pèu sounôve aboù gran sentiment e abilità. Magôre, për dounô un toun plu solenel a la fete ou për fô souvenî a doun Lantelme que l'ere mai oure qu'â lou-z-envitèsse un viedze béure l'aperitif, lou couristri i bralhôvon un pìël tro fort e la vaute dë la glèise nen tramoulôve, beq lâ filha, que ripoundìon boù lour bella vou, i duvìon fô d'iforsi për mantenî lë toun, un pìël trop aut, d' lâ notta!
Lâ velha dônda, adzenoulhô din lou bôncs, i berboutôvon entr'ella lou pater, ave e gloria dâ tsaplét e lou requiem plou mors, sens fô trô atenscioùn ni â couristi e ni â preire, beq lou-z-ommi icoutôvon suriou suriou...
La mése i durôve enviroun un'oure. Cant lë curà së virôve për dire: «Ite missa est» tou la dzente ripoundìa «Deo gratias » e, pèi, tuts sourtìon en së signent boù l'aigue benitte.
Ommi e fenna, dzouvi e vèi s'entsaminôvon për tournô a mizoun: la ventôve
fô vitte perqué din lâ doua oura, doua e duméie, la lh'avia vepra e aprê la founscioùn dâ mors que së fazìa a sementeuri d' lâ-z-Itatsa dount la dzent dë la parouase dë La Ruô së rancountrôve aboù iquelle dë lâ Traversa për rendre vesitte ensemp â mors, c'mà la së fai encô enquèu, Diou marsì.
Se lë temp së mantenìa bel, lë sementeuri semblôve un dzardin, toù flurì c'mà â së presentôve â-z-éu d' la dzent. Lâ toumba avìon toutta un blouquét e lâ lapidi e lâ crou dë pèire éron itô nechô; d'cò lou bletoûn e lou pîn, crèisu a cantoun dâ sementeuri e butô dë garde a la pé dâ mors, gardôvon për l'oucazhoun un bë coulour vert.
A sementeuri, la dzent s'adzenoulhôve su lâ toumba dë sou mors: ommi e fenna s'ibouliôvon d'isì e d'ilôi e i plourôvon dë ligrùmma dë doulour e d'argret, beq lou
couristri dë lâ douna parouôsa entounôvnn lë Libera nos Domine ou lë De
profundis e lou prèiri benizìon lâ toumba.
Pèi une gran tranquilità desendìa e toù së fazìa silensciou. Doun Lantelme, dreit su la pèire dë la grose Crou, acoumensôve a parlô e â dizìa â viou qu'il isublièsson dzomai lou mors, que dron murî i nou dizìon: souvenau pèi dë nou... A në clâ parolla, la dzent, que pensôve a sou mors, arcoumensôve a plourô...
Finalmenta, lâ-z-oumbra acoumensôvon a desendre su la valadde e aloure la dzent tournôve a mizoun, baizô dâ soufle qu' acoumpagnôve lou darìa raioûn dâ soulelh que coudzôve darèira lë Pitre dë l'Aigle. Din pa gaire, la seria ità tout icur, en ouguére sinà e pèi la së serìa fait la prumìëre vilhô d'la sazoùn e en ouguére d'cò mindzà lâ tsatagna!
Oh, belle vilhò dë Tousôn dâ-z-ôn pasô, vilhô pléne dë malincounìa que nou faisôve le coer ma d'cò plén dë pouizìa que fazìa battre fort lë coeur dâ minô!
Për lou gossi, la Mése grônte, la vesitte a sementeuri e toù lë reste counchôvon pa ren en counfrount a la prumìëre vilhô e â lâ tsatagna que lou-z-agatsôvon aprê sine!
Din lâ naou oura, lou parên e lou vezîn aribbôvon: tônte Roze e l'ouncle Boursirot, dônde Rouzin e barbou Felix, tônte Louizette e l'ouncle Felice, l'ouncle Fedricot, lâ couzina dà Rivée (lâ Pascalina) e d'autri encô. Cant tuts éron aribbô la s'acoumensôve lë tsaplét e lou pater, ave, gloria së seguìon lou-z-ûn aprê lou-z-autri...
D'en temp en temp, lâ vatsa së fertôvon countre la creppi e i fazìon battre lë batarel d' lâ sounalha qu'il avìon encô pendua a col; aloure lâ feia acoumensôvon a beslô e lë muël, din soun cantoun, rapôve l'ipore. Pèi tout tournôve tranquil: mequé lâ tsatagna s' entendìon bulhî din l'oule su lë poual e lë ron ron dâ tsôt que giurmìa su la palhe...
« Nel quinto mistero si contempla...» atacôve la vou dë tsì menôve lë tsaplét, e la prìëre countinuôve c'mà se rien fousse....
«Kyrie eleison, Criste eleison... » finalmenta ou-z-éron a la fin! Un requiem për l'un e un requiem për l'autre: aprê un'ourètte lë tsaplét ére finì!
Lou vèi s'astôvon aloure su lâ tserìëra dë boc e lou gossi pouhion tirô lë flà e së fertô lou dzenoui que lhë fazìon môl a fors d'itô adzenoulhô.
Pèi lâ tsatagna aribbôvon, tsauda e parfumô! En acoumensôve dabort un'autre serimounìa e din pa gaire lâ plalha s'abarounôvon su la palhe qu'adzasôve lë teit: que fete, parìa tuts ensemp!
«Ogni baròta, beive na vota... » dizìa mon sègn, pirin Milcar, en ausent soun vèir plen dë
boun vinot dë Pinirol ou dë Sen Segount e qu'anôve avôl c'mà se rien fousse!
Tousôn ére bell'e finì. Dront anô së coudzô, aprê une dzournô lôndze e fatigônte, tuts së razounôvon aboù gran politése e pèi lë teit e la mizoun entìëre tsihlon din la plu gran calme e tranquilità: su la taule, éron mequé soubrô lâ darìëra tsatagna e un pìël dë vin. Se, din le vepre, lou mors fousson desendu dâ sìël il ouguéron troubà cacaren per casô la croute...