L'abè Martin ero curà... de Cucugnan. Boun coumà lou pan, franc coumà l'or, a volìo ben a sî Cucugnanen coume un paire a sî meinâ; per el soun Cucugnan sarìo ità lou paradî su terro, se sî parouassien lh' aghessan dounà (li giourn de fêto, lâ diamengia e surtout per Paca), un pau mai de soudisfassious. En effet la vento dire que, ben souvent, a l'avìo, per eicoutâ sa messo a la diamengio, lou cleriquet que la servio e sa sirvento que s'apenuchavo; e per chantâ vèpra soun sacrestin e l'omme que sounavo lâ clocha. Dint soun counfessiounal las aragnâ countunuavan a s'eilargî e lou bel giourn de Paca, las ostia restavan ei founs de soun cibori (calice) e calavan pa gaire! E certamen lou coeur dei boun preire n'en restavo blessà e angouissà; lou brave preire que demandavo ei Boun Diou qu'a li fasesse la grassio de pa mieurî denant qu'a l'aghesse tout soun troupel arbatà dint soun boui (la gleiso), soun paure troupel qu'ero maleurousament tout eibandà e qu'ero tougiourn a la merci de la goulo e de lâ dent dei nìe e traditour Loùp! (lou demoni).
Euiro 'ous anà vë que lou Boun Diou l'a eicoutà e esaudì. Uno bello diamengio, a la messo grando, lou Curà de Cucugnan mounto su lou pùlpit e:
«Mi fraire» a di «encueui voliouc vous anounsiâ quaicaren que, de segur, vous aurìo fait bien plasëe, ma me vëouc pa a l'aviroun, per m'eicoutâ, pròu de cretien reunì.
Voliouc vou parlâ 'd'un tresor (mi sabou ount a se trobo que farè de richas de tuti li Cucugnanen, meme s'i foussan pi paure que Giob! 'Ou lou deicreuberen diamengio que ven e chacun n'aurè sa part. Que volau que dìe mi, en veient dint lou Sent Temple, ren que moun cleriquet Miset (que vé pa l'oura de poghëe eicoulâ lâ buretta dei vin sent); damisello Pousselino, bailesso de la coungregacioun, qu'ë arribâ a la messo en retard e s'ë deigagiâ a eimoulâ sa lengo dint las aurelhia d'Oursoulino; Aubert noutre sounaire de clocha, que, se trobent a l'ostou, s'es eisublià de sounâ lou darrìe; e peui Meste Bernat, que, en rounflent, atend la fin de ma predico... Que volau que vou dìe?... A diamengio, mî fraire! Ei tresor 'ou pescarèe. L'ë la grassio que vou souatou. Amen!».