A Pradzalà l'uvern ee embaroun lonc e la dzent pòse loû dzours â tèit ou dapê lë fouhìa dount lë fùëc flòmbe dou dë matin enché â caire dë la vilhô.
-Euch mee d'uvern e cattre d'enfern!- dizìon loû vèi. En ifet, la brutte sazoun a dzomai fin be qu'loû mee dë bê temp soun un vrè enfern pël gròn travòlh qu'en déou fô dròn quë la néou së tourne fô vee su la pountze dë la Bantzette ou dë l'Alberdzòn e pèi, planot planot,vene acouvatô la valadde e soû vieladdzi...
Së l'uvern ee lonc, còzi sense, fin aloure la vente fô une belle prouviste dë boc për pouguee s'itzaudô din la brutte sazoun. L'ee parìa qu'un vieddze, din tu loû vieladdzi, la së fazìa lë bosquèjjo: la Coumune permetìa â Pradzalencs d'anô arbatô dë boc din loû valoûn e din loû devee coumûn. En culhìa laz icrattza settza tzeouta dâ dzarô, en tzavòve souttza, en itroumpòve loû berlhoccou quë lâ tzalòntza avìon itrousà din l'uvern e pèi la së fazìa dë groo baroûn, tzacun fazìa lë seou ben arendzà e marcà, e finalmenta lë mee dë dzulhet, drònt acoumensô a fënô, aboù lâ leia e lâ rosa, en rablòve avòl lë boc e la së ramplishìa lâ boutzirìëra.
Amount e avòl p'lâ dròia quë menon din Mendìa, a Prà d'amount, darèire Guibourlhìa, a l' Oursìëre ou din lë Groo boc, en pouhìa vee la rimbambelle dë lâ leia tzardzô dë fisinô, dë baransoûn, dë grosa rutza, dë souttza boù lâ rèi torsa e coumplicô: louz ómmi î lâ guidòvon boù gròn abilità din loû virs dë lâ dròie e â mèi dë lâ pèira; lâ fenna e loû gòssi menòvon lâ rosa quë rablòvon loû bilhoûn. Tou lë mount travalhòve aboù plazer e loû dzours dâ bosquèjjo èron còzi une belle fete, une fete coumune perqué en travalhòve ensemp, en merendòve ensemp dapè une fountòne (quë dë pilô e dë tzavoûn dë boune sousisse la s'ee mindzà din loû valoûn dë notre belle valadde!), ensemp la së tournòve a mizoun cant lë soulelh s'aprestòve a coudzô darèire lë Pittre dë l'Aigle...
Enquèou la së vai pâ mai boutzirô.Loû valoûn soun silenshioû e î parlon boù dë paròlla dë mort; dëcò lâ marmotta e louz uzau e toutta lâ bescha dë la mountaggne semblon plena dë malincounìa, abandounô coumà î soun da la dzent dë notre paî qu'a leisà sâ velha mizoun veouda e freida su la mountaggne... Din lâ mizoun qu'abriccon loû darìa Pradzalencs la lh'a loû pouali a "querozene" ou loû valoûn e loû devee...
Un bê dzourn, cant la s'anòve encòre boutzirô, un barbou dë Dzousaut, barbou Metzìël dë la familhe dâ Grico (ou dâ Tòddou, c'ma î nen fazìon loû vèi), eez anà tzavô souttza din lë Devee coumun. Cant lâ soun itô tzavô, notre barbou a acoumensà a laz ipesô. Al a pree sa mose e soû couên e pèi, pique d'un caire e pique dë l'autre, apountze un cougn îsì e un ilôi, pë doua bounaz oura â lh'a travalhà a l'aviroun. Ma la souttze voulìa pâ s'ipesô: sâ rèi, envourtoulhô din tû loû biai, dura c'ma d'asìël, î latzòvon pô. Aloure barbou Metzìël, shuà c'ma un
batzô e asoumà dâ travòlh, â fout via la mòse dicounsoulà e pèi â s'asètte dapè la souttze.
-La vente qu'a l' fòze une mine- â pense -së non a nen fauc pâ rien...
Tournà a sa mizoun, barbou Metzìël â counche a soun filh soqu' la lh'ee encapità e pèi â di:
-Cant ou desendà a lâ Traversa, anà a la boutiqque dâ Dahinot e atzetà dë poudre nière, d'iquelle për fô mina. Ma faza-nen pâ parolle bou la dzent dâ vieladdze, parla-nen pâ aboù nun!
Caqui dzours aprê, lë filh dë barbou Metzìël, quë së dëmandòve Anrì, pren la via quë mene a lâ Traversa dount â vai fô lâ coumishioûn për soû piroûn.
Un istònt aprâ quë soun filh vënìa dë partì, lë barbou sort dë courshe de sa porte e â vai enché v' la pé dë dount â vè soun filh aribô v' la Croû dâ Nai, proppi dount un vieddze la lh'avìa un pëchot vieladdze. Vit soun Anrì quë courìa lest c'ma un uzèl, barbou Metzìël brôlhe fort:
-Anrì, Anri... Isublia-zoù pâ pei!
C'ma al entent la voû dë soun paire, lë garsoun së plonte dë colbe, â së vire e â di:
-Soqque?
E barbou Metzìël, quë voulìa pô quë la dzent sabesse soqu' soun filh anòve atzëtò e vit quë caqui curioû s'eron fai vee su l'û dë sâ mizoûn, al eubre lou brô â sìël e pèi a bròlhe fort tan qu'â pò:
-Poum! ... Poum! ....