Lë sirc Tarabaston al a plantà sâ tenda su la grand' plòso dë la Ruô. Soun prougramme al ee d'auto calità, aboù un numerò que fai granô, loû bròvi Prajalencs.
Un' jouvo doumatris, drollo coumà un bounbon, aboù dë peèls blons quë lhë chòian su laz epalla, un' vesto rouio tott' pleno dë chamaradura dourô, dë bròia blancha coumà la neò dë la Rougnouzo e dë bòtta niera quë brillhan a la lumiero dë lâ lampa, il intro din la jabbio dë lâ bestia salvajja e, en fazent clacô soun fouet, î lâ fai manouvrô ensemp coumà d'alpins a l'istrusion.
A la fin, aprê aguee butà un boucounet dë succre dins sâ labbra, î ven së plantô drant un' pantero niero; la bestiòso, en avansent soun moure bavoû e soû crocs lonc coumà lâ puô d'un'forcho, î lh'araccho lë boucounet dë succre.
Alouro la bell' mendiò, en së virent ver lë public quë s'esòvo lâ mans a aplaudî, î di en sourient:
-Vê eisì, mi sëmounou dê mil'lira a l'omme quë vorè nen fâ autrëtant.
Tut il arsautan e së quezan en s'agacent l'un l'autre. Ma, tou d'un colbe, lë Vitourinòs dë la Coutiddo â sauto aut en bralhent: "Mi!", â së fout avòl p' louz echaliés dë boc ver lë rioundon e â s'aresto dë caire la jabbio.
-Voû? - dëmando la doumatris etounô. -E ben, intrà puro!
-0i, pouletto- lhë repont Vitourinòs. -Voû fareic vee mi së siouc pâ bon a prenne lë succre din votri labros dë maiouso. Ma drant... fazà mequè sourtî un moument qu'lâ brutta bestiòsa!