En me rezervant de vou countiâ pöi encaro caic'uno de lâ balosadda que quelli doû gamin fazìan a quelli doû pauri velhet, öiro vauc vou parlà dei pelegrinagge que tû l'ân barbou Pin e sa Catlino fazìan ei santouari de "Notre Dame de la Salette", que se trobbo en Franso, dint lou Daufinat, a sincant'e doû quilomettri pi amount que Gap, vers lou nord, suz uno mountagno a milo sèt sente stanto mettre d'autour.
Prê dei santouari la lh'a uno fountano mounumentalo ounte èro pareisùo la Madonno e l'aigo que piso aboundanto da qu'lo dous ee counsiderâ sento, salutaro e beneficco coumà quello de Lourdes.
Noutri doû pelegrin partìan tû lh'ân a pè, cherjà de tola vöida per douzze on quinze littre d'aigo sento qu'î duvìan ramplî a qu'lo fountano e portâ a meizoun, fazent lou viegge(que entre anâ e venî èro de pi de cattre
sent quilomettri) coumpletament a pè, per aguee pi de merit e se gagnâ un pau mai d'endulgensa. Per fâ quee viegge, a uno meddio de trento quilomettri per journ, il emploiavan da douzze a catorze journ; lou dörmî a lour coutavo pâ ren perqué la "meizoun cantouniero" de Col de Sestrièra (lou Baracoun) e lh'abitant de lî vielagge qu'î traversavan dint lour tragit (Sezano, Claviera, Moungenebbre, La Vachetto, Briansoun, Embrun, Gap, St. Firmin, Corps e La Salette) lour dounavan voulountiè ouspitalità su la palho o su lou jas aboù l'espouar que, ei retourn, lî doû pelegrin lour fazessan pöi cadò d'un boutin d'aigo sento e de caica limajja sacrâ ou caiqui pourtret ou vedutto de quello sento loucalità tant arnouminâ.
De l'aigo sento que lour soubravo en aribent a meizoun, î nen dounavan un pauc a tutti lh'amis e credent que la deziravan. A ma maire, Diou l'aie, que lî doû pelegrin stimavan bieen, î nen dounavan toujourn un picit bout aboù caiqui caddre que reproduziàn la seno de l'aparisioun de la Madonno a quello picitto bergiero que larjavo soun troupèl decaire quello fountano e que, apeno la Sento Vierjo a disparù, ee courùo aval da sa familho per anounsiâ sa straourdinario e miracoulouzo vizioun, que s'ee subit divulgâ e a provocà l'enteresament de l'autorità ecleziasticco.
De soun aigo barbou Pin nen gardavo eimenc uno boutelho que li servìo per dounâ l'aigo a sa vigno de la Rounc ounte, aboù uno eipìo de blà que li fazìo de aspersouar, â beneizisìo chaco planto de vis. El al avìo la fermo counvinsioun que soun aigo sento aguesse, per lâ vis, encâ mai de vertù e d'eficacità que lou verdaram, e pötètre al avìo pâ tort perqué laz autra vigna de la zono(quello desous la gleizo, quella dei Vinsiart quella de Coto Rouio ecc.) ounte î dounavan lou verdaram, â rendìan pâ de pì que la souo.
La pò èse que la Prouvidenso, per pâ enculcâ deluzioun e mefianso dint l'amo pihouzo e simplo de barbou Pin e pâ fa vacilâ sa proufoundo fouà en Diou, î lh'aie councedù la grasio e lou privilegge d'ezaudî sa prihera e ricoumpensâ generouzament soun travalh umile e fatigoû.
En tû lî câ, ou poieen èse segur que barbou Pin, a sa mourt, al ee ità demandà en Paradî da lou Boun Diou que lh'a asignà la celestialo plaso qu'â se meritavo ei mes di beat que pöpplan soun Regne!