Queta couinta l'ai auvìa 'n Pramol da 'n Pömianin, e aloura vou la vëndou coum l'ai achëtâ, dapöi quë li Pömianin l'ē quëlli qui couintan la storia dë la couriola, e gar së tu li vole pâ creire. Ben, la couriola qui fëzìa la flour 'n Pömian (ma laz areis laz êrën tant lounja da pasâ sout lou col dë la Vachira e surtî en Angrögna) vou savē qu'ilh'ē sëgur veritabble. Öira auvē queta.
A Coumbaseccha, 'na vē, la lhi riva lou nau preire, qu'al êra neisù 'nt la valadda e pöi al avìa fait siz eitudde vìa.
Eiquì a Coumbaseccha la lhi itava soun barba, e aprê li festejamënt për l'"insediamento" del nau preire, la prouchesioun, l'inchëns, li paramënt a lâ fënetra e balcoun e tutta lâ cherimonia, lou barba e lou nëvoû s' trōvën 'n canonica a 'mbrasase e couintaie d'eison e d'eiquen. La storia ilh'ē dë quërc an pasà e l'êra daupöi qu'i së vin pâ. Aloura i n'avin dë coza da dise e iz êrën ben countënt d'êsëse ritrouvà.
Ma lou barba a zmilhava tribulà da quërcoza, e 'n bel moumënt â fai:
-Sui proppi countënt quë tu sie vengù a fâ lou preire eisì, anque perqué ai quërcoza da counfesâ. Lou nëvoû së stupî:
-Moun barba, tuti nouz an da counfesâ, ma creou pâ quë tu abbie 'na coza talamënt grave da trî eicoundùa sëns a trouvâ lou couragge da dire.
-E pura- di lou barba,- 'ntò quë parle, 'ntò quë të dize! Mi...vë-ttu...ën tëmp dë guêra...ai eicoundù 'n ma cratta...'n Ebrèou!
-Tout eiquì?- fai lou preire. -T'a eitërmà 'n Ebrèou? T'a moc fait ben! Së li Tedesc lou pilhâvou, lou masavën. T'a fait toun douver, e t'a fait franc ben! Më rëndou couint quë 'na vē lhi Ebrèou iz êrën acuzà dë "deicidio"; ma tu sâ quë öira lou pappë a dit quë i soun pâ coupabble. Aloura aucun remor. T'a moc fait ben.
-Tu më chave un grō pes- di lou barba. -Oira të diou tutt... Tu vē, la couestion l'ē quë mi...da moun Ebrèou....më sui fait dounâ...coum pöi dire...e ben...dezmila lìoura...lou journ...; tu coumprëndë, la vitta talamënt chara...
-Vai al troun- di lou preire.-Dezmila lìoura l'ē 'na bella flipâ... ma sui sëgur quë qui soldi tu li a pâ deipëndù malamënt...
Lou barba së fai pi tranquile:
-Për eiquen- dì, tu pôe êse sëgur quë quiouncoue chouquine a ma meizoun... 'n plat dë mënetra a lh'ē per tuti...
Dëcò lou preire al ē menou sousià.
-Tu vē- a fai, -tu se 'n galantom, tu deve pâ sousiate.
Lou barba â zmilha tout countënt.
-Sui franc soulajà - a dì, - ai fait ben a parlate a cör uvêrt. Öira sui pi tranquille. Ma...- â countinoua aprê 'n moumënt, -l'ē pa 'ncara finì. Ai da dite toutt...Tu capise...öira të diou...mi ai pa 'ncara trouvà lou couragge...dë dire a moun Ebrèou quë la guêra ilhi ē finìa....