Vouzautri dë noutro valaddo ou saurê quë vers la fin dei dersetieme siècle (e prechizament entre lh'an 1685 e 1696) uno gran part dë lî Valdée que abitavan dint setto valaddo dei Cluzoun, an degù s'escapâ en Suisso ou en Germanio a cauzo dî decret d'espulsioun que, per questioun dë relijoun, eran ità emanà da lou Rei dë Franso e da lou Duc dei Piemount.
Caicun d'elli, qu'avìo caiqui eipargn da caire, esperent dë poguée, un journ, tournâ a meizoun, noumpâ dë se portâ aprê toutto sa pichitto richeso, a preferà dë eicoundre sâ pèsa d'or dint un tupin e l'enterâ dint un pra ou dësous un chatagneré a un post pâ suget a èse sapà ou lavourà, e quë, a soun auspicabble retourn, fousse pöi fasile da arcounoùise (per eizemple: prê d'uno vio, dë càire un rochas pâ mouvibble, etc.).
Barbou Gírin Charìe da V'lou Boc, qu'avìo encaro dë countie de aranjâ aboù Poet (per la fachendo dei pounsoun su sâ taula), sabent quë Poet avìo un pra, aboù caiqui rochas eiparpalhà dessous dë grosi chatagnìe, dint la zono quë se noummo "Pra du Bert" (quë sarìo quello deitendùo de pra quë se trobbo a l'envers, a coumensâ dei pount dei Cherjòu fin aval a Beneitoun, ei cuou dë la broua quë desendan de lh'Emberjat e da l'Albareo), barbou Girin, dizìouc, a pensà quë quél l'ero un post adatà per eitremâ lou tupin aboù lâ mounea d'or dint e quë se preitavo dounco per jouâ a lou Ziene Poet un tir couquin.
Un sande dei mée d'òut, al a saupù quë lou landëman, diamenjo, lî Cherjoourin (surtout la jouventù) avian en programme dë se reunî, l'aprê dinâ, en Beneitoun (qu'ero un groo prà ounte l'erbo ero pâ lounjo, aboù dë bella oumbra e la fountano frecho tou prê) per chantâ, béoure, dansâ la courento, jouâ a lâ boccha e, aboù lh'ölh bindà, roumpre lî tupin pendù en aer, etc. Su la vio, quë traverso lou pra dë Poet, li sarìo dounco pasà bien dë gent (sie per anâ quë per venî); e alouro al a desidà dë realizâ soun plan diabouliqque.
Din la nöit al a fait curâ, dint lou pra de Poet, un bê croo entre la vio e uno groso peiro quë se trobavo a trée mettre lögn; ei founs dei croo al a plasà un velh tupin dë tèro cöito, cubert da un lauzarot, pöi â lh'a abarounà tou a l'aviroun bien dë tèro qu'al ben aplatà e damà, dë maniero quë cant al a tirà foro lou tupin, lh'a restà l'amprounto bello pouliddo, quë laisavo pâ dë doutte su l'ouget qu'avìo ocupà quello pichitto tampo. Tirà foro lou tupin, â l'a rout e n'a fait trée ou cattre clap (quë deisaràvan ben clar lour prouvenienso) e lh'a butà ben en visto. Dint la tampo al a decò laisà uno traso dë sappo, tou rulhento, quë su soun mani avìo lâ douâ inisiala P.E. (Poët Eugenio) emprimâ a fùoc. La duvìo figurâ quë dint la prèso dë finî denant quë la fouse journ, il ero itâ eisubliâ: la mizo en seno ero dounco perfetto!
La diamenjo aprê dinâ, la gent an coumensà a pasâ d'eiquì, e tutti se fermavan eitounà e amuzà a agachâ quello seno e fâ sî coument. E pisque la plupart sabìan quë quée pra apartenìo a Poët, e en surplus la sappo portavo laz empounta P.E., tutti an creiù e aurìan jurà quë, la nöit anans, Poet avìo trobà lou trezor; caicun ée tournà areire a eibardâ la vous dint lâ bourjâ, e tutti courìan a vée lou croo e lou tupin. Pluziöri omme se soun presipità da Poet per se complimentâ aboù el dë soun colbe dë fourtuno e, malgré quë el neguesse (e quë cant al a vit dint lou croo la sappo, pâ suo, marcâ P.E., al aie coumprée quë caico canalho lh'avìo jouà uno farso ben peourâ e â sie devengù furibount), malgré tout la gent volìan pâ li creire e il ensistìan qu'â duvìo festejâ quel aveniment straordinere en ofrent eimenc uno brindo dë vin quë elli s'encherjàvan dë portâ a Beneitoun per fâ béoure tutti lî prezent a la feto. Ma lh'a pâ ità mouien dë li fâ amettre soun colbe dë chanso e dë li fâ öbrî sa crotto!
E parelh toutto la coumitivo quë s'amuzavo a Beneitoun a degù s'acountentâ dë li prouvista quë chacun s'ero portà; e dei trezor pâ nun a pogù nen gòddre!
I me dizìan quë lou journ aprê Girin, tou fie e countent, se blagavo: "Sée viegge me nen siouc servì mi dei pounsoun a fuoc!".