Barbou Girin patroun dë l'"Albergo dei Cacciatori" a Chatêl dâ Boc, fazìo dëcò part dë la Società di François, ma l'ero pâ fasile li coumbinâ caico tir birboun perquè, esent dë desendenso dë Bourset, l'ero un furbachoun, farsör e chatto-miaulo quë se mefiavo bien. Ma, malgrè soun nâ fin e sa furbisio dë velho voulp, un journ li Viaretin soun reusì a gn'en jouâ uno ben amaro e salâ. Partent dë la mesonjo quë uno nöit li ladre avìan robà a l'Ambrouàeze Aretìe dei "Malvezin" dë taula, dë bancha e dë carea qu'êran entrepauzâ dint la baso-court dê soun ostou e quë êran timbrà a fuoc aboù lâ lettra inisiala H.A. (Héritier Ambrogio), il an coumplotà d'anâ d'eicondoun marcâ aboù lou meme pounsoun dë l'Ambrouàze caiqui möbble dë Girin e pöi dë nen reclamâ la restitusioun sout la mënaso dë li denounsiâ a li carabinìe.

E parelh, per lou journ fisà, mousù Poēt, quë a quell'epocco ero sendic, acoumpagnà da lou gabelìe, a presedù la coumitivo dî Viaretin e s'e prezentà a Girin aboù l'eicuzo quë la lh'ero caicaren da reglâ per la gabello. Dei temp quë elli tre discutavan dint uno saletto apartâ, soun aribà aval lh'autri (lou notari Martin, Ferloqué, moussu Alaes de l'oberge "Viaggiatori" e l'Ambrouàeze aboù soun pounsoun a la sacìero).L'Ambrouàze a s'ez arestà caica minutta dint la court de Gustin Gaiet, ounte lou magnin de Peirouzo (qu'ero d'acordi aboù Poet de se trobâ eiquì quē journ) avìo sa picitto forjo alumâ per eitagninâ lâ casarola e lî peirol. Lh'autri trē an proseguì vers Girin, ma envecce d'intrâ dint lou local, î sen soun refujà (senso ese vit da lî patroun) a l'oumbro dessous lou bersò, countournà dë vis e dë luvertin, plasà dint l'ort e möblà aboù douâ taula, douâ bancha e cattre velha caréa. Naturalment, il an pâ dëmandà Girin ni sâ filha e î se nen soun anà ben chut. Aprê caica minutta l'ez aribà l'Ambrouàeze aboù soun pounsoun rouì coummo la brazo e, parà a la visto de lh'autri tre per pâ quë nun lou veguessan manejâ a la viroun de quelli möbble, â lh'a marcà tutti aboù lâ lettra H.A. Apeno finì, e al trempà soun fere chaut dint l'aigo dë la fountano, â se l'e butà a la sacìero e pöi ez intra, tou soulet, dint l'ostou per saluâ lou sendic, barbou Girin e lou gabelìe. Aprê caica minutta i suoun sortì tutti cattre e, eitounà dë sentî dë gent parlâ dint lou bersò, î se soun aprochà per ve qui lh'ero. E veient tutti quelli Viaretin, barbou Girin a coumensà a niflâ e a se doutâ dë caico colbe mancin.
Apeno intrà dint la cabano, l'Ambrouàeze se butto a eizaminâ quella taula equella bancha, pöi planto un bralh e dì: "Oh! veisì lâ taula e lâ bancha qu'i m'an robà l'autro nöit!". Tutti soun restà belle freit (ou, emenc, il an fait finto dë zou êse). Girin quë se sentìo sëgur de soun fait, reipount bruscament: "Setta taula e setta bancha lh'a trent'ân quë laz aic: coumà poià-ou dire qu'a soun votra?". "Sëgur quë l'e lâ mia! Agachà quelli timbre H.A.! Vou, vou demandà-ou Héritier Ambrogio? Se a foussan votra, a durìan êse marcâ C.G.". En veient quella douâ lettra, Girin e restà eibranchà e senso parollo; e lh'autri prezent, tutti d'acordi a dire: "Al a razoun; la sigglo H.A. po pâ se referî a Charrier Girolamo. L'ez evident que al î soun robâ!". Girin, qu'ero pensieroû e avìo un vizagge eicur eicur, improuvizament arsauto coumà se a s'arvelhesse da un brut söim, soun vizagge s'eiclargî e, moutrent lou pugn a lh'autri, al esclamo: "Ah, bando dë couquin matricoulà: ou me l'avà faito!".
Alouro l'Ambrouàeze, fazent finto dë s'apaziâ e dë se rabounî, dì: "S'aguesse creiù quë lâ taula foussan eisì, dint la meizoun d'un amis, aurìouc pâ denounsià lou robarisi ali carabinìe; ma öiro l'e fait: î soun enfourmà e soun en tren quë charchan dë taula timbrà H.A.; la ventarìo li fermâ denant qu'i pasessan d'eisì".
En se moument, Poet, se dounent lou role dë pasificaire, enterven e, s'adressant ei notari, â li dì: "Ben, per fermâ lî carabinìe dint loura rechercha ou li pensen nou: pâ ve, notari? Per lâ taula e lâ bancha, lâ soun jò pitost velha e chamourâ e lâ valan pâ mai gaire; e alouro, pitost quë tourno laz eiproumenâ amount fin ei Viaret, pensou quë l'Ambrouàeze sìe dispozà a
lh'arnounsiâ e se nen fâ construre d'autra nouva".
"Girin quë, dinto sto facendo, e quel quë se l'e chavâ melh e trop a bounpat, s'oblijjo dë paiâ un boun dinâ a tutti nouzautri socchou dî François. Se ou siâ d'acordi, touchà-ou la man vouzautri doû: Girin e l'Ambrouàeze!".
E la farso a finì parelh.