Quëtto il é capitâ lou lonc d'la vìo quë vai dâ Prìe a Prâl. L'èro â tëmp d'la drièro guèro, e Barbou Tève d'Prâl èro calà dë sa miando fin â Prìe për lâ prouvista d'la sëmano. Lh'avìo pâ d'sërvissi pùbblic, lou viagge a s' fëzìo a pè e un lhi butavo toutto la journâ për tournâ a meizoun.
Nôtre brav-om, aprê d'agué fait sâ coumësioun a s'ëncamino dâ Prìe tout soulét e oub uno sachâ d' sincanto quillou. La fai chaout, lh'eitrasù coùlën, ma lh'à nhénte da fâ, 'ntò viajâ.
Aprê d'un'ouro d' marcho, â pënso d' se fërmâ un moumënt a l'oumbro d'un mèlze. Â paouzo soun sac, s'eisùo lh'eitrasù e vai për se 'stâ, cant al aouvo lou roumour d'lâ rouâ d'ur carét. La primmo spëranso souo, l'é quë lou carét anne d'cò a Prâl. A s'é pâ sbalhà: l'é Barboú Carlin quë vai a la S'lëtto. Tout countënt, al atëndo, për fâ lou viagge 'n coumpnìo. Cant Barbou Carlin é a douâ piâ, Barbou Tève s' vîto soun sac, salutto soun coulèggo, qu'à counoui bèn, e s'ëncamino.
Barbou Carlin, 'stà sû soun carét, fai dê mèttre e pöi l'ënvitto a mountâ. Lou Prâlin s'ou fai pâ dire douâ vê: â mounto e s'asètto.
Për pasâ lou tëmp , î pàrlën d'eison e d'eiquèn: lh'argoumënt mànquën pâ; fin quë Barbou Carlin fai: -Ma, paouzo toun sac dapè tu! Tu vourà pâ lou tërnî s' laz eipalla! - Ma Barbou Tève reipoundo 'n dizënt: -No, no, laiso pèrdre; séou jo trop countënt quë tu m'aie charjà mi-. E â countinùo lou discouërs dë drant.