Barbou Pierin d'la Simmo a l'itavo din la meisoun pi' amount de la pi' auto bourgiâ de Bourcet e a l'èro, anqu se pa gaire grand e da quaicun de la bourgiâ que li volìo pa trop ben, surnoumâ "Pierotoun de la Simmo"; l'èro un omenet ben deigourdì que avìo toujourn sabù se deibrönlhiâ dapertout, tant ben coumà quelli que soun bien pi grant e gròo!
Un journ, l'èro d'autögn tard, Barbout Pierin d'la Simmo desiddo de descendre a val a Prirol (Pinerolo) per s'achetâ quaiqui mirie de mèlio per se fâ la pulento st'uvern. La campagno, armerciant lou Boun Diou, il èro anâ ben: al avio cölhi 3 sac de lentilha, un pauc de granet a l'avìo decò e l'archo èro quasi pleno de bla.
Uno matin vite, Barbou Pierin d'la Simmo, aprè aguée saluà sa fenno Dando Catlino (uno fenno grando couma un artlhör e gróso coumà un chatagnìe) e s'êse butà 10 lira din la capsino (que l'èro pöi la meità de soque e l'avìo achapà en vendent soun vel), a s'enchamino, un pauc a pè e un pauc a piotta, e cumà la se fazìo a quelli temp eilai, vers lou marchà de Prirol per achetâ la mèlio.
Denant que l'achetâ a fai un vir per la vielo, dount, tanti an areire, al avìo fait l'alpin . En pasent denant l'ostou de la "Cernaia", dount, abou si coumpagn de la plummo nìero, a l'anavo souvent beure un boun veire de vin, la li ven uno völhio matto d'anâ fâun boun dinâ! A l'intro din l'ostou e vai s'assetâ a uno taulo dint un cantoun. Propi en faço a el la lh'a un "moussu" qu'ée decò arribà din qué moument e que ée giò en chamin a coumandâ da minjâ.
Barbou Pierin de la Simmo (que dint sa vitto à giamai coumandà un arpat a li restourant de la vielo) se trobo un pauc genà a counfus e quand lou cambrée li demando soque a vol minjâ a li fai signe: "Coumà a quel eiqui!". Per lour béure Barbou Pierin d'la Simmo fai tourno signe : ...."Coumà a quel eiquì". Per la segoundo portâ...tourno "Coumà a quel eiquì"...e toujourn parelh fin a la fin de l'arpat!
Finì soun dinâ lou "Moussu" demando lou count e quand lou cambrée li lou porto, a li dì en piemountée: "Quarantadue lire, giuste, giuste!". Quand Barbou Pierin d'la Simmo sent quén, a resto de boc e lâ siour coumensan a li degotâ e a penso: "Couma fauqìe a paiâ se abou mì aic mequé meità dei vel...."! senso sabée que l'autre client l'ée un pensiounari que aranjo lou count a la fin dei mée a que abou qu'la 42 lira a l'à paià la mesado!
A peno lou cambrée sort de la salo Barbou Pierin d'la Simmo chavo sâ 10 lira da sa capsino,lâ fouro vite dessous soun toundin e pöi plan plan prén la porto e vio pi vite qu'en prèso!
Entrementìe lou cambrée tourno dint la salo e en se lou trobent mancâ a penso qu'a sìe anà fa d'aigo o a coumenso a deibarasâ la tauro. Coumà al ausso lou toundin a vé qué bilhet de 10 lira, alouro a fount un colbe d'ölh vers la sortìo e en veient Barbou Pierin que se n'en vai lest lest e cateuri, a li bralho: "Moussù...qu'a speta...qu'i dagou la resta...". Ma Barbou Pierin d'la Simmo, que sabìo pa dei client pensiounari, à fait lou sourd e senso se virâ areire, a se n'ée tournâ a mount a soun Bourcet senso mèlio e... senso vel!
Laissou imaginâ a vouzautri coumà Dando Catlino, uno fenaso grando e groso parelh, abbie arsèt soun (e decò noutre) Barbou Pièrotoun!