L'epizodi quë voû countiou ez aribà cand mi erou encâ garçounet.
Lou matin dë S.Michel (a la fin dë setembre), doû' "pasocol" quë menavan un troupelot dë bestia a la fiero d'auteugn dë Peirouzo, aribent ei Mian, a cent pâ dâ la Jartoussiéro, an vit un omme quë, decaire lou cazei de Marquiziou, debatìo un grò nouìe, quë, a quello
epòco, ero renoumà pâ mëcqué per sa grossour coumò planto, ma encâ mai per la grossour e la bountâ dë sâ nouiza. (Aboù lou pelhoc az eran grossa casi coumò d'eou). Ero però uno calità dë nouiza qu'avìan lou pelhoc (grò, eipée e clar) quë së deitacavo pâ facile da la greulho, en maniero quë, en ñâ debatent, lâ nouiza cheuìan bâ tutta entiera e az eran grossa coumò li pichiti persi quë meuiran ei Mian. D'embê quë lou troupelot s'ée fermà â broutâ caiqui choufou d'erbo su la banquino dei chamin, un dî doû pastre (qu'avìo jamai vit dë nouiza verda aboù lou pelhoc) demando ei debatòu quë frut eran quelli e perquè a li debatio denant qu'î cheuièssan da soulet.
Lou mienenc, bourloun, li repount quë quen l'ero uno calità specialo dë persi (quë së noumavan "persia") e quë tardavo un pauc â meuirâ e quë az eran talment bouna quë, së â lâ laissavo encaro su la planto, li marandeur li laz aurìan robâ ou argueirâ tutta.
Alouro lour begìe demando ei mienenc së â gn'en laisso prenne uno sachìeirâ per laz eisaiâ e la minjâ, el e soun colego, chamin fazend.
Lou mienenc, malin e farseur, li reipound quë a nen prenne puro, ma qu'â lâ porte pâ vìo: qu'î lâ minjan eiqui (el e soun coumpagn), ma qu'î minjan mëcqué la poulpo a l'anviroun: lh'ò aboù li garilh (quë, a soun dire, soun amar coumò lou tosi) qu'î il laissan e li butan dint lou cavagn quë së trobo a li pée dë la planto (perquè a vol gardâ la semenço per d'autri plantin).
Li doû pastre së soun deigajà a nen minjà uno douzeno a purun (ma â dire la verità î laz an trobâ un pauc amara e forta!), peui an pauzà lh'ò dint lou cavagn, an remercià e së soun enchaminà vers Peirouzo.
A la bas'ouro cand î tournavan da la fiero, î së soun arestà denant lou cazei dë Marquiziou, per vée së lh'ero encâ lou debatòu dë la matin e së soun lamentà, abou quelli dë la meizoun, dizent quë lou matin, cand î soun aribà ei riou dë l'Agrevou, la lh'ée atacàa toutti doû dë forti doulour dë ventre e uno diarreo quë liz a oblijà a courre, pi lest qu'emprèsso, dessous lou pount dî "picco-peiro" per anâ pauzâ lâ braia pluzieuri viegge e së renssà lou dareire aboù l'aigo frecho dei riou!