Un journ dë dezembre dë la coumensâ dë nutre siecle, mousù Poet (sendic dei Roure a quello epocco) fai demandâ barbou Jan Bonin, lou pi boun beniaire dë la bourjâ di Vignal, e li di quë lou notari Martin dei Viaret l'avio encerjà dë li coumandâ tre benout per si tre filhet quë portavan jo lâ braia (lou catrieme al avio encâ la cotto). Quë al aprestesse dounco li tre benout per lou prumie dë l'ân e quë al anesse pöi quē matin li portâ el persounalment ei client amount ei Viaret. A lh'a dëcò counselhà (en li dizent quë lou notari ero bien gourmant dë la poulento acoumoudâ) dë li portâ un picit tupin dë flour dë lait frecho e magaro dëcò uno picitto toummo graso.
En li dizent quēn, â lh'a fait coumprenne quë lou notari, pâ mëqué â
lh'aurìo paià ben li tre benout, ma quë dë sëgur â l'aurìo envità a dinâ aboù el e quë â së sarìo ben arpatà a quello taulo ben garnìo.
Barbou Jan, countent e fie coume un Artaban dë quello coumando prouvenento da un client si ecsepsiounel e ilustre, â proumet quë al aurìo ezecutà lou travalh aboù particularo curo e presizioun.
Aribbo lou matin dei prumìe dë l'ân. Barbou Jan së prezento pountoualment ei Viatet, a la porto dei notari Martin, aboù si tre belli benout
soun tupin dë flour frecho e sa toummo. A souno lou clocin e, a la sirvento qu'e vengùo lh'öbrî, di quë al a portà li tre benout quë lou notari lh'a coumandà a mezzou dë l'intermediari Poet. La sirvento vai avertî soun patroun quë, apeno sentì lou noun dë quē couquin dë Poet, a subit minjà la fölho e, fazent bouno mino a joc birboun, a fait avis dë pâ esé surprē e embestià; ei countrari, al a fait dë bien bella maniera ei Jan, â l'a fait intrâ, l'a deibarassà dë sâ benna, l'a fait assetâ e lh'a paià lou ciquet dei prumìe dë l'ân; e cant lou Jan lh'a counsegnà lou tupinet dë flour e la toummo e lh'a esplicà lou moutif dë quē drolle e insolit argal, lou notari l'a envità a dinâ, pöi lh'a reglà soun counth di tre benout (qu'al a trobà fait a la perfesioun) e a li lh'a paià larjoment senso cerchâ dë li chavâ gnanco un soldi.
Ma dint sa pensâ e dint lou founs dë soun âmo, lou notari s'e jurà quë a li l'aurìo pâ laisà pasâ francho a quello canalho dë Poet e quë
a së sarîo venjà apeno la së nen fousee prezentà l'ocazioun.