Uno flour quë nais...
quë manifesto subit sa countenteso
ringrasiant lou Boun Diou en moutrant a tutti sa bëleso.

Un floc dë neo quë ven bâ plan plan...
e bê quë tutti dörman
plan plan â fai vinî tou blanc.

Un toquet de toummo bou dë pan...
dounà a 'n paure quë paso en mandiant,
ma dounà bou lou cör a la man.

Lou sfiourâ d'uno careso...
un bazin dounà bou amour
la fai deimentià tutta lâ souferensa e li doulour.

Lou splendour dë la luno...
quë anque së l'ē nöit
meità dei mount il ilumino.

Lou cör d'uno mamma....
bê quë î croso soun meinâ
e î li chanto la ninno nanna.

Coumà î soun pöi belli lh'ölh d'un inousent...
î beican toujourn aut
perqué l' ēl'ölh d'uno picit sent.

Lou filh quë per uno semano al a travalhà
lögn dë meizoun, magaro en sità...
al aribbo e â dì: "Chau pappa, chau mamma!"
aprê dë lh'aguē ben embrasà.

Lou soulelh-quë, a la matin a l'albo
al envad e al enrouî tou la pè dë ma valaddo...
l'ē un spetacle meravilhoû
quë â douno a moun cör nouvel vigour.

Lou soun dë lâ cloccha quë per ma valaddo â s'espant...
l'ē un jouioû din don dan
quë intro din lou proufount dei cör a tutti li boun cretian.

La bâs-ouro dei mē dë mai...
la filhetto bou uno rozo a la man
ai rozari dë la Madonno countento î vai.

Lou siel seren coumà uno perlo...
l'ē dë noutro patrìo la chozo pi bello,
l'ē queicaren dë verament meravilhoû
quë a la ment e ai cör dë l'omme, filh dei Creatour,
la fai meditâ e amirâ l'imenso grandour.

L'ē tout dë belli trëzor...
l'ē tout dë belli e grosi sentiment
quë, a li pensâ ben ben,
î coutan proppi rien!