Ei counouisö un barbou dâ Rivē, un certo barbou Pierot. Eure al î mort, ma lou vèi s'en souvenan ben. Barbou Pierot l'ere un brav'omme, ma al avîa pau ëd vē l'sanc.

Un vièdze al ere a soun prà d' laz Itatsa que çiôve, (côzi dapé l'sementöri), e l'iz encapità qu'en imoulent â s'î riblà l' dé aboù soun dôlh, dint un moument ëd distracsioun. Aloure al a foutö via soun dôlh e a s'î vitte butà la man dareire l'itsine per pâ vē soun sanc. Aboù la man gautse â s'î tsavà la cravatte e â s' l'iz envourtoulhô a l'aviroun dâ dé. Aprê â së sentìa môl. Aloure â s'î casà la man d'sou sa cazaque, su l' cör, per tënî l' brô â cōl, e â s'iz astà tou plen d' fastöddi.

En atendent, l'iz aribà l'oure d'dinô, ed ecco vënî vitte vitte sa fenne, dande Melanì, aboù soun cavôgn e soun tupin. D'emprumìa î vè pâ soun barbou Pierot çiô, e î pense toutsuite môl; ma a la fin î l' vè astà din l' prà.

Ma notre barbou Pierot ëdcò l'a vite, e a coumense a souspirô: "Ah, paure min! Oh! Que môl!". Dande Melanì l'entent, î s'avëzine e î l'vè aboù l'brò a col, blanc ëcmà un patarêl. Su moument î s'fai d'la péne, e î pauze soun dinô pel sōl. Pèu î lh'dì: "Ma Pierot, sou qu'avà-ou? Avà-ou môl? U sà blanc ëcmà un linsōl!".

Barbou Pierot s'leve e ripount:

-Ah, s'ou sabessi! Ei pau d' m'esre strupià!

-Oh min min! L'î pâ pousibble! C'mà avà-ou fait ?

-A m' sareic ibourà l'dé!

Dande Melanì, que counouisìa soun barbou, aloure a coumensà a coumprènre e a s' fâ couradze, e il a dit a Pierot:

-E ben, douna-mèn la man, qu'a véie!

-Non, non: la m' fai tro môl!

-Ma non qu'a ou fai pâ môl! Faza-men vē.

E'n parlent î lhe pren l'brò.

Barbou Pierot, per pâ vē soun sanc, s'bötte l' brò dareire l'itsine, e dande Melanì coumense a difaisô. Ma a tsaque vir l' barbou souspirove plu fort:

-Ahi ahi! Tou plan! Ou m' fazà môl!

E a tsaque souspir sa fenne dizìa :

-Ma là! A va plan. Boudzà pô!

E un vir aprê l'autre, î l'a ditourtoulhà tou planot. A la fin il a pâ vit ni sanc ni tôlh, e il a dit:

-Ma Pierot! Dount ou sà-ou talhà?

-A dé: vià-ou pô?
-A ouz ei tou difaisà: ma lh'a pâ ren!.

Notre barbou Pierot s' sent soulëvà; ma â pò pâ lhe creire, e â dì:

-L'î pâ pousibble!

-L'î pro pousibble! Lh'a pâ ren. Argardà pure.

Ël Pierot s' fai couradze: â tire anant l' brò, al argarde ben, e aloure â dì tou cousoulà:

-E ben! A criioûc proppi d' m'esre talhà!