Un prajaren<c> que abou soun méoul e soun picit carretoun desendìo touta lâ semana a Pinirol per ana charjâ quaiqui mirie de chausino de gis, de moun, etc e per anâ vendre a uno tanarìo lâ pēl de voulp, de feino, de lapin e de derboun que a trobavo a achetâ eiquiaut a soun paî, durant soun viegge de retourn a se fermavo toujourn a arpaissâ uno nöit a l'ostou dei Ziene de Poët ei Charjòu, perqué ei retourn dei marchà, un pauc per la charjo e un pauc la mountâ dei chamin, a devìo partajâ soun viegge en doua tappa.

Dint uno de sa fermata que baliste de Moussu Poët li di: "Oh! barbou Jouslin: vous que cherchâ de pel de voulp e de feino: mi sabou vous endicâ uno familho d'eisi di dintourn que a doua bella pel de feino da vendre; ou poirìa fâ un saut e li demandâ; mi pensou que ou faria un boun affâ.La se tratto de Titto Gay de la bourjâ di Vignal, que es eilai en faso; cand ous aribà a li prumìe casei ou demandà ounte ito Titto Gay: tuti saban vous endicâ sa meizoun".

La vento saupé que Vignal a la fenno de Titto Gay i li disìan "la feino" e coumò i l'avìo jò uno filho grando e mariouiro, alouro decò la filho i la demandavan la feino: pareilh la fasìo doua feina. A maou tout countent esperant de fâ un boun countrat, a l'aribo ei Vignal e trobo lou Titto Gay denant soun teit e a li demando se a vol vendre sa doua pél de feino: lou Titto li mando un'oeillado de coulero que semblavo un eilusé e li reipound:"atendà,couquin eifrountà! vous lâ dounou subit lâ doua pel de feino!" e a l'é intrà dint soun teit, a embrancà lou trent e a l'é volà foro coumò sa volgesse enfoursa que paure fouretìe que, vit la mal parâ, e scapà coumò uno leurre ganduo.