A tréi cart d'ouro d' la Balmo, ënt un bèe valoun soulitari qu'un nommo l'Alp, lh'à doou-tréi meizounëtta dî bërgìe.
Lh'à lountëmp, ën qu'lâ baracca, d'îtà la lei itavo dui fraire.
Un filh dë Rooudourét, qu'èro oou lour da garsoun, un jouërn al anavo amount, aprèe dâ viôl quë mounto d'leirìe dâ Riou Grô.
Ma cant al aribbo a la Pourachiéro, lou p'cit riou quë callo dâ col d' la Valëtto, â vé un burìe ënt un toumple.
"M'ëdmandou qui la po èse qu'à laisà picatâ eiquì dint soun burìe! La 'smillho fait ësprès: qu'la sie calcun quë s'ê vënjà?".
 touërno pilhâ sa vio e cant al aribbo a lâ mianda d' l'Alp, al ëdmando a sî patroun s'il an 'd vê mai laisà picatâ lour burìe ën â tâl post.
Lî dui î suspëttën subit quë la po lei èse calcozo dë foro vio, ma î fan a vîs dë rién:
"Nouz an pâ fait picatâ rién, ma noû van aval vê toun burìe. Tu, asèttë-té, tu déve èse strac, e béou-té un'eicuèlo d' lait".
Calquë tëmp aprèe, lî dui fraire an vëndù l'Alp e î soun anà ën la viélo fâ lî sënhouri. La vôl dire qu'il avin troubà lou burìe bén plén, e lî vëzin jaloû parlàvën d'la groso soummo d'or quë lî bërgìe avìën pëniblamënt tirà foro dâ toumple.
Lî dui fraire î soun mort e lour famillho à 'dcò dispareisù. Ma calqu'ann aprèe lour mort, un jouve 'd Rooudourét à agù uno drollo dë vizioun. Coum al avìo dëgù touërnâ a l'alp ën l'oouteunh jo tart, për calcozo quë përsavo, dâ tëmp quë lî pâturâl soun veuit e lâ meizoun sërâ, al à agù la surprézo dë vê un om ëstà dapè d'uno miando sû d'un traou quë deipasavo lou mur.
A s'aproccho e â vé qu'l'ê lou corp oûsasù d'un vélh, oou la calotto dî bërgìe, quë naino sai e lai sâ chamba pëndënt. Lou vélh së viro e notre jouve ërcounoui subit la fërzumìo dâ pi vélh dî dui fraire, trist e eiblavì. Lou jouve foutto un bram dë poou, peui al ëscappo vio e a 's nën touërno aval.
Dooulouro, al à papi agù lou couragge d' lei touërnâ e â vôl méme pâ nén parlâ.