N'iage i avìo en paou de famìie e n'i ero pa da minjà per tuchi: i minà venìen fità
fin dai set ann ent l'aouto valado a fa i pastour ou, cante i èren n'estis pi grant, a travaià en Franso a fa i amoulaire.
Mourizi avìo just douze ann cante al ero 'sta fità a Foundouvet e al durmìo ensemo ai fee. Ent n'aquìe pastural vivìen pa i Sarvanot, ma ele dizìo de sentì-se coumo en Sarvanot sarvage e bourasù.
Neto es 'sta fità a set ann ilamoum ent la Chastlado e i es mai anà per en paou d'ann apres. I anavo a la mountà a la fin d'abril e i 'stavo findi a San Michel ou a la fiero di Sant, cante 'scolo avìo jo tacà. A l'ouro de parte, la maire dizìo a sio minà: - Ganhà voste salari se voulè pei minjà poulento 'st uvern-.
I vivìo ent la cazo di patroun e lou matin bounouro i endraiavo i vache en pasturo e i 'stavo tout lou journ a gardà. De sero, en touchant enquiaoure, i fazìo encà na fesino de bosc que pourtavo a sie patroun per viscà lou fuec ent al fournel e fa sino. Carqu' iage Neto devio 'cò fretà i pirol d'aram e per fa-ie viene luzent charìo betà "d'ueli de goùmes", coumo dizìo sio patrouno. La pichoto sabìo pancà so que voulìo dì ié chamavo nante se chatavo aquel ueli.
A la fin dla stajoun aribavo la pago pa gaire groso, poque lire venìen dounà a la maire e se i avìo travaià ben ié jountàven encà en parei de soque.
N'iage s'es fità 'cò na jouve mendìo Sarvanoto: digun sabìo pa que aquelo fieto ero na Sarvanoto. I freme n'iage vestìen bou de cote loungue fin en tero que stremàven i pè d'istà e d'uvern, sempre bou en mouchet sla testo e na chamizo de telo de cazo di manie loungue. Jaque, se i avésen pougù veire i pè dla mendìo, i se sarìen navizà que l'ero na Sarvanoto: lour chamìnen deschàous e la pato dal pè se seméio an aquelo di chabre.
I pourtavo sempre na coto rouso que ié piazio en paou, belo que toute i aoute freme ou mendìe pourtésen de cote di coulour pi 'scur. Per lou resto i ero 'ma toute, countento, i chantavo suent e i travaiavo da matin a sero. Sourtoù i ero ben bono a fa la toumo e lou bur, i aribavo findi a tirà foro la siro dal lach. I voulìo pa d'aouti ensemo cante i travaiavo e paréi pa digun sabìo coumo i fazìo, ma ai patroun l'anavo ben paréi: lou bur e la toumo poüìen pa ese pi boun.
Entramentìe i semane pasàven, i aoute mendìe fità vïàven ensemo de sero, en countiant i 'storie de sie caze e acò ié fazìo sente pa tan daluenh di sie. La pichoto Sarvanoto 'stavo 'scazi sempre souleto e i fazìo na vinco deforo 'scazi tuchi i sero; pa digun ié fazìo cas.
Aribà a la fin dla stajoun, la patrouno vol chatà en paréi de chousìe ai mendìe fità, soubre pi dla pago, coumo i avìo proumetù ai maire. I chamo i jouve per pià-ie la mezuro di pè, ma la mendìo dla coto rouso s' 'aiso pa touchà.
D'aquel iage i an tacà a pensà que l'ero na Sarvanoto. Per descuerbe se l'ero propi paréi sie patroun an 'slarjà de senre en tero, paréi i avarìen pougù veire la pià di pè.
La mendìo Sarvanoto fazìo entensioun a sie patroun e, cante i a capì so qu'i voulìen, i es 'scapà vio e pa pi digun l'an visto.