COMEUNE DE SEIN DZOUIRO DE SUSE
PROVINSE DE TURIN
ESTATUT
APPROVÀ AVÓ DELIBERASHON DO CONSELH COMUNALO N° 33 DO 16.12.1999.
MODEFEIÒ AVÓ DELIBERASHON DO CONSELH COMUNALO N° 2 DO 25.02.2010
TITRO I
PRENSIPIO FONDAMENTALO
ART. 1
Otonomì estatutéra
La Comeune de SEIN DZOUIRO DE SUSE:
ét eunn otonomo localo avó representatività dzenerala selon li prensipio de la Costitushon e din lo respet de le lei de la Repeblicca Italian-na;
ét eunn democraticco qu’ou creit din li prensipio europein, de la pé e de la solidarità;
ou s’arcunut an an sistémo estatualo unitéro de tipo federativo e solidéro, basà dessù lo prensipio de l’otonomì de eunn localo;
consideraia la spesseficca realità territoriala e sossiala din laquinta lhe se trove, lh’arveindze pre lhi méma e pre les otre Comeune an rolo din la gestion de les arsourse economique locale, comprein lo monteunn fiscalo, e l’organisashon de sarvisho peblicco on d’intré peblicco; heunn din lo respet do prensipio de la sussidiarità, selon loquin la responsabilità peblicca lh’eut adziò de l’otorità territorialameunn e fonshonalameunn plu protse de sitadin;
lhe valorizhe tsaque forma de collaborashon avó li otri eunn localo;
lhe realizhe, avó li potér e li istitut do preseunn estatut, l'otogovert de la comenetà.
Lo preseunn estatut, din lo doméno de l’arcunussanse costitushonala de les otonomì locale ou veunt librameunn formà do Conselh comunalo e ou costitueit ina sordzeunn normativa priméra an applicashon de le lei de prensipio emanaie an referimeunn a l’art. 128 de la Costitushon.
ART. 2
Finalitaie
La Comeune de Sein Dzouiro de Suse lhe s’ensereit din lo comprensouéro zhograficco, ambientalo e sossialo de le valaie de la Douire Repére e aflueunn e pé dzò de la Bassa Val de Suse, de laquinta la Comeune lhe partadze le vississiteude e le trasformashon sossio-economique passaie din lo cours do séclho qu’ou s’anandie vers la fin. Entre héte le souiveinte:
a)-lo progressivo detsanemeunn, tein qu’a l’embaleviò, d’an sossietà an prevaleinse rurala de montinheu, sostituiò trouplan de in’economìe méhlhe endustriala, agréra, silvo-pastorala que lh’at consantù an relativo equilibro din lo doméno economicco, sossialo, culturalo e uman;
b)-la graduala ahlhapoura de het equilibro din lo secon apré-guera a cosa de l’abandon de l’esersisho agréro e pastoralo e a cosa de recoreinte, rudie redushon de l’attività endustriala e de l’occupashon masculin-na e femenin-na;
c)- la creissanse do setour tershéro, vouieinta din li derér vent’an, seinsa, entrotro, que heunn l’isse creà de deblocadzo din l’occupashon a ina greunta pert de plu dzevenó, formà de la creisseinta escolarisashon;
La Comeune de Sein Dzouiro de Suse lhe se sitùe an he contesto, din loquin le greunte trasformashon sitaie ou l’ont pa, totun, empachò la conservashon d’an lieunn entre lo passà e lo preseunn, lieunn qu’ou s’at tradouì an in’identité ideala e culturala mouraia dipé briva, ranforhiò de la fehiò e defessilhe partissipashon attiva a la Resesteinse e a la Guera de Liberashon 1943-1945.
Sa comenetà, an séclho de glhouére, lh’at betà ensein d’intré ilià a la spessefissità de son territouéro: l’agriculteura, la silviculteura, la lavorashon do granì ecc…, avó ina londze ressertse de rescat e de melhorashon sossiala, en sartseunn asseu, din le protse rezhon de confin, occazhon de travalh e de collaborashon que, on clher de la feta entegrashon europeintse, ou costitueisso lo prepó pre unir, dessù li doueu verseunn de les Alpe, poplo e territouéro avó etnì, istouére, economì e vizhon samblable.
Lo territouéro, l’ambieunn alpin pa polluà, ou represeinto li plu valablo prepó pre in futur developameunn ilià a in tourismo eunngrà avó la nateura e lo folcloro localo.
4. La Comeune lhe valorizhe e lhe sovegarde l’equilibro do territouéro e lhe concourt, ensein a les otre istitushon nashonale e enternashonale, a la ridushon de la pollushon, an assurieunn, din lo doméno d’an us soutenablo e justo de les arsourse, li drouet e le nessessitaie de le presseneu d’incoueu e de le dzenarahion a venir. Lhe sovegarde la santà de sitadin e, asseu, la coesesteinse de le difareinte espéhe veveinte e de le biodiversitaie.
4 bis. La Comeune de Sein Dzouiro de Suse lhe declhare de:
“Arcunuhre lo drouet uman a l’éva, on sisse l’acsé a l’éva an teunn que drouet uman, universalo, endevesiblo, inalienablo e l’éva an teunn que bieunn comun peblicco;
confirmar lo prensipio de la proprità e gestion peblicca do sarvisho idricco entegrà e que toteu les éve, de surfahe on desòt-tera, bieunn que pa prein de la tera, ou sont peblique e ou costitueisso an’arsoursa a anovrar selon de critéro de solidarità;
arcunuhre que lo sarvisho idricco entegrà ét an sarvisho peblicco localo seinsa relevanse economicca, an teunn que sarvisho peblicco essenshalo pre avarantir l’acsé asseu economicco a l’éva pre touit e méma dinhità a touit li sitadin”
La Comeune, en plu, lh’enspire sa méma ashon a le finalitaie souiveinte:
donar plein drouet a l’attiva partissipashon de sitadin, hanglhér on assossià, a la viò organisativa, poleticca, amministrativa, economicca e sossiala de la Comeune de Sein Dzouiro de Suse; pre heunn far lhe souteunt e lhe valorizhe l’édo fasablo e responsablo de volontéro e de le libre assossiashon;
valorisashon e promoshon de les attivitaie culturale e sportive comme estrumeunn qu’ou pousso la creissanse de le presseneu;
sovegarda, conservashon e promoshon de les arsourse naturale, do paisadzo, istorique, artsetetonique e de le tradishon cultural preseinte dessù son mémo territouéro;
valorisashon do developameunn economicco e sossialo de la comenetà, an pousseunn la partissipashon de l'inissiativa emprenditoriala de privà a la realisashon do bieunn comun;
souteunn e le realitaie de la cooperashon qu’ou poursouivo but de caratéro mutualisticco e sossialo;
sovegarda de la viò uman-na, de la pressenò e de la familhe, valorisashon sossiala de la maternità e de la paternità, an assurieunn souteunn a la corresponsabilità de pareunn din l’engadzo do soueunn e de l’educashon de moueinà, asseu moueieunn li sarvisho sossialo e educativo; avarantiò do drouet a l’eheudio e a la formashon culturala e profeshonala pre touit, an an cadre istitushonalo enspirà a la libertà d’educashon;
respet e sovegarda de le diversitaie etnique, languestique, culturale, reledzouse e poletique, asseu moueieunn la promoshon de le valour e de la culteura de la toleranse;
souteunn a la realisashon d’an sistémo global e eunngrà de suretà sossiala e de sovegarda attiva de le presseneu malizhìe e desavantadzìe;
arcunussanse de le meme opportunitaie profeshonale, culturale, poletique e sossiale entre li ses.
ART. 3
Territouéro e siédzo comunalo
La Comeune de Sein Dzouiro de Suse lh’eut costituiò de l’ensein de le populashon e de terrritouéro de la velò e de le bordzìe Marteneut e Vieut. Lo territouéro de la Comeune lhe s’aheunt pre 19,60 kmc, lhe debonhe avó le Comeune de Bahoulein, Tsanòc, Breseul, Sein Didé, Lo Vilé, Coasse e Roure. Lh’eut enseriò din lo territouéro de la Rezhon Piemon, de la Provinse de Turin e de la Comenetà Montan-na Bassa Val de Suse e Val Heniclha.
Lo Palé sevicco, siédzo comunalo, ou l’eut an Plahe Hinc Martiro n. 1.
Les adunanse de organismo collezhalo ou se derolo do soli din lo siédzo comunalo; ou polo tenisse an de caro difareunn an cas de nessessità on pre d’esedzeinse spessefique.
Din lo territouéro de la Comeune de Sein Dzouiro de Suse li se pout pa, pre heunn qu’i intre les attribushon e le competanse de la Comeune an matére, l'ensediameunn de sentrale nucleére ni lo stashonameunn on lo passadzo d’arme nucleére e residù radioattivo. Lh’eut asse defandouò, din lo doméno agréro, tsaque forma de cultivashon de prodouì transzhenicco.
ART. 4
Blason, gonfalon e boul
Lo Comeune, din li at e din lo sedzeulh, lhe s’ideunnféie avó lo non de SEIN DZOUIRO DE SUSE.
Lo blason de la Comeune ét hel istoricameunn an us (d’or, on Sein Dzòrs armà avó mantel voleunn de bleu, empinheunn avó la dreiò ina lanse d’ardzeunn, an séla a an tseval blan, inalberà, arvoutà, atelà de rodzó, tsarpeseunn an dragon arversà de veurt, leingà e alenà de rodzó, traspersà din la ganahe de la lanse d’ardzeunn. Ornameunn esteriour de la Comeune) tal que approvà avó D.P.R. n. 2556 do 20.6.1975.
Din le seremonìe e din les otre recoreinse peblique, e touit li còl que sisse nessesséro reindre ufishala la partissipashon de l'eunn a in’inissiativa spesseficca, lo Santicó ou pout desposar qu’ou venisse esebì lo gonfalon avó lo blason de la Comeune.
La Dzouinta lhe pout otorizhér l’us e la reprodushon do blason de la Comeune avó but pa istitushonalo rinque enté qu’li isse an intré peblicco.
Lo boul ét lo sedzeulh qu’ou porte l’emblémo de la Comeune, ou n’an identiféie at e documeunn e ou reunt li mémo a norma de lei a tsaque efet.
ART. 5
Conselh comunalo di dzevenó
La Comeune on but de poussar la partissipashon di dzevenó a la viò collettiva lhe pout donar l’adreiò pre l'eleshon do Conselh comunalo di dzevenó.
Lo Conselh comunalo di dzevenó ou l’at l’ensardzo de deliberar an viò consultiva din le matére souiveinte:
poleticca ambientala, sport, tein libro, dzouò, relashon avó l’assossiashonismo, culteura e spetaclho, peblicca istrushon, assisteinse li dzevenó e li vieulh, relashon avó l’UNICEF.
Le modalitaie d’eleshon e lo fonshonameunn do Conselh comunalo di dzevenó ou sont ahablìe avó regulameunn aspres.
ART. 6
Programmashon e forme de cooperashon
La Comeune lhe realizhe se méme finalitaie an adoteunn la metoda e li estrumeunn de la programmashon.
La Comeune lhe concourt a la determinashon de but contenù din li programmo de l’Estat de la Rezhon Piemon, de la Provinse de Turin, de la Comenetà Montan-na Bassa Val de Suse e Val Heniclha, an s’eideunn avó le formashon sossiale, economique, sendicale, sportive e culturale ovreinte dessù lo territouéro.
Din lo doméno do prensipio vu on coma 1., la programmashon des ovre e de sarvisho peblicco lhe deit iéhre emprontaia a de critéro de priorità e d’analizhe tecnicca de fré gestionalo, avó la predisposeshon de dzeusto plan finashéro.
Le relashon avó les otre Comeune, avó la Comenetà Montan-na, avó la Provinse de Turin e la Rezhon ou sont enformaie on prensipio de cooperashon e complementarità, equiordinashon e sussidiarità entre li difareunn doméno d’otonomì.
La Comeune lhe pout delegar, din le forme de lei, a la Comenetà Montan-na, a Consorsho entre Comenue e entre Comeune e Provinse e a d’otre forme d’assossiashon entre eunn localo prevue de la lei, la gestion e l’organisashon de sarvisho, canque le capassitaie comunalo ou consantisso pa ina gestion amodo.
TITRO II
Ordenameunn struturalo CAP I
Organismo e ses attribushon
ART. 7
Organismo
Ou sont organismo de la Comeune lo Conselh comunalo, lo Santicó e la Dzouinta e le respettive competanse ou sont ahablìe de la lei e do preseunn Estatut.
Lo Conselh comunalo ét organismo de endrého e de controlo poleticco e amministrativo.
Lo Santicó ou l’eut responsablo de l'Amministrashon e lo legalo represanteunn da la Comeune; ou l’adzeit, an plu, le fonshon de l’Uffishalo de Govert selon le lei de l’Estat.
La Dzouinta lhe collabore avó lo Santicó din la gestion amministrativa de la Comeune e lhe derole d’attivitaie propositive e d’empulshon anvers do Conselh.
ART. 8
Deliberashon di organismo collezhalo
Le deliberashon di organismo collezhalo sont assumaie, de réglhe, avó votashon paleisa; ou sont a assumar a scrutinio secret le deliberashon conserneinte de presseneu fesique e dzuredique, canque lhe venisse adziò ina facultà descreshonala fondaia dessù l’aprézhemeunn de le calitaie tepique d’ina pressenò on dessù la valutashon de l'ashon feta de héta méma.
L'istrutouére e la documentashon de le proposeshon de deliberashon ou sont féte moueieunn li responsablo di sarvisho; la verbalisashon di at e de le sedeutte do Conselh e de la Dzouinta lh’eut souanhò do Segretéro comunalo, selon le modalitaie e li termo ahablì do regulameunn pre lo fonshonameunn do Conselh.
Lo Segretéro comunalo ou partissipe pa a le sedeutte canque ou se trove an situashon de encompatibilità; an he cas ou l’eut sostituì an viò temporéra do componeunn do Conselh on de la Dzouinta nominà do presideunn, de norma lo plu dzevenó d’adzo.
Li verbal de le sedeutte ou sont firmà do presideunn e do Segretéro.
ART. 9
Conselh comunalo
Lo Conselh comunalo ou l’eut dotà d’otonomì organisativa e funshonala e, an represanteunn l'entiére comenetà, ou delibére l'endrého poleticco-amministrativo e ou l’adzeit lo controlo dessù son applicashon. La presideinse do Conselh comunalo lh’eut attribuaia o Santicó. An cas d’asseinse on d’empatso do Santicó, la presideinse lh’eut assumaia do Vissesanticó e, queunn héti ou sisso asseunn on empachò, di otri Assessour, selon l’ordre donà de l’adzo. An asseinse do Santicó e di componeunn de la Dzouinta, la presideinse lhe veunt assumaia do Consilhér comunalo plu vieulh pre adzo.
L'eleshon, la duraia an sardze, la composeshon e lo deboueiladzo do Conselh comunalo sont reglhà de la lei.
Lo Conselh comunalo ou l’adzeit le potestaie e le competanse ahablìe de la lei e de l’Estatut e ou derole se méme attribushon an conformeunse i prensipio, a le modalitaie e a le prossedeure ahablì din lo preseunn Estatut e din le norme regulamentére.
Lo Conselh comunalo ou defeneit li endrého pre la nominashon e la desinhashon di represanteunn de la Comeune an tse eunn, asiende e istitushon e ou prevoueit a la nominashon di mémi din li cas prevù de la lei. Hi deut endrého ou sont valablo limitameunn a l'arc temporalo do mandà poleticco-amministrativo de l'organismo consilhéro.
Lo Conselh comunalo ou conforme l'ashon complessiva de l'eunn i prensipio de peblissità, traspareinse e legalità avó lo but d’assurér emparsialità e justa gestion amministrativa.
Li at fondamentalo do Conselh ou dévo contenir l'endeviduashon di but a ardzunhér e le modalitaie de reperimeunn e de destinashon de les arsourse e di strumeunn nessesséro.
Lo Conselh comunalo ou l’enspire sa méma ashon o prensipio de solidarità.
L'attività do Conselh comunalo lhe se derole an seshon ordenéra, strordenéra e d’urdzeinse, avó le modalitaie prevue din lo regulameunn do Conselh comunalo.
Le sedeutte do Conselh ou sont peblique, viò li cas prevù do regulameunn consilhéro qu’ou n’an desseplin-ne lo fonshonameunn.
An siédzo d’approvashon do bilan de previzhon, ou véno touit li eunn definìe les arsourse finanshére destenaie a poussar l’attività do Conselh comunalo. Lo regulameunn do Conselh comunalo ou desseplineret la gestion de les arsourse surendecaie.
ART. 10
Linhe programmatique de mandà
Din lo termo de henn e venn dzòrt, decorreunn da la data de son avenù ensediameunn, ou sont presentaie, de la pert do Santicó, santouò la Dzouinta, le linhe programmatique relative a les ashon e i prozhé a realizhér pandeunn lo mandà poleticco-amministrativo.
Tsaque Consilhér comunalo ou l’at plein drouet a entervenir din la defenishon de le linhe programmatique, an proposeunn les entegrashon, li adecameunn e le modeficashon, moueieunn la presentashon d’emendameunn aspres, din le modalitaie endecaie do regulameunn do Conselh comunalo.
Et facultà do Conselh prevér a entegrar, din lo cours de la duraia do mandà, avó adecameunn struturalo e/on modeficashon, le linhe programmatique, dessù la base de les esedzeinse e de le problematique qu’ou devisso merdzér din lo doméno localo.
O termo do mandà poleticco-amministrativo, lo Santicó ou preseinte a l'organismo consilhéro lo documeunn de rendicontashon de l’estat d’attuashon e de realisashon de le linhe programmatique; deut documeunn ou l’eut soubetà a l'approvashon do Conselh, previo esame do grado de realisashon di enterveunn prevù.
ART. 11
Commishon
Lo Conselh comunalo ou podret istituir, avó deliberashon aspres, de commisshon permaneinte, temporére on spessiale avó but de controlo, d’enquéta, d’eheudio. Pre heunn qu’i intre le commishon avó fonshon de controlo e d’avarantiò, la presideinse lh’eut attribuaia i Consilhér apparteneunn i groupe d’opposeshon.
Lo fonshonameunn, la composeshon, li potér, l'odzeut e la duraia de le commishon ou seront desseplinaie avó regulameunn aspres.
La deliberashon de l’istitushon lhe deveret iéhre adottaia a madzouranse assolùe di componeunn do Conselh.
ART. 12
Consilhér
1. L’estat dzuredicco, le demishon e la sostitushon di Consilhér ou sont reglhà de la lei; lhour ou represeinto l'entiére comenetà a laquinta costeintameunn ou l’arfondo.
ART. 13
Drouet e dovér di Consilhér
Li Consilhér ou l’ont drouet de presentar enterogashon, enterpelanse, moshon e proposeshon de deliberashon.
Le modalitaie e le forme d’esersisho do drouet d’inissiativa e de controlo di Consilhér comunalo ou sont dissseplinaie do regulameunn do Conselh comunalo.
Li Consilhér comunalo ou l’ont drouet d’avér di ufisho de la Comeune e de les asiende, istitushon on eunn depandeunn, toteu le nove e les enformashon utile a l’espletameunn de son mémo mandà. Lhour, din le lemitte e avó le forme ahablìe do regulameunn, ou l’ont drouet de vizhonar li at e li documeunn, asseu preparatouéro, e de cunuhre tsaque otro at utilizhò i but de l’attività amministrativa e ou sont tenù o secret din li cas spesseficameunn determinà de la lei.
Tsaque Consilhér ou l’eut tenù a elire in domessilo din lo territouéro comunalo, selon le modalitaie prevue din lo regulameunn do Conselh comunalo.
Li Consilhér comunalo qu’ou l’entervéno pa a les adunanse pre trei iadzo consecutivo seinsa reison dzestefeiò, ou sont declharà decadù avó deliberashon do Conselh comunalo. A heunn dire, lo Santicó, apré l’avenù assertameunn de l’asseinse mouraia de la pert do Consilhér enterishò, ou prevoueit avó comunicashon ehresouò, i seins de l’art. 7 de la lei 7 agosto 1990 n. 241 e s.m.li., a communicar l’andio do prossedemeunn amministrativo. Lo Consilhér ou l’at la facultà de fare valér le cose de dzesteficashon de les asseinse, e de fournir o Santicó d’eventualo documeunn probatouéro, din lo termo endecà din la communicashon ehresouò, que, totun, lhe pout pa iéhre plu bassa de venn dzòrt decorreunn de la data d’arsuò. Scadù he derér termo, lo Conselh ou l’esaméne e an fin ou delibére, tenù amodo contio de le cose de dzesteficashon presentaie de la pert do Consilhér enterishò.
ART. 14
Groupe consilhéro
1. Li Consilhér ou polo costituisse an groupe, selon heunn prevù din lo regulameunn do Conselh comunalo.
ART. 15
Santicó
Lo Santicó ou l’eut elù dereitameunn di sitadin selon le modalitaie ahablìe de la lei que lhe desseplin-ne, an outre, li cas d’ineluabilità, d’encompatibilità, l’estat dzuredicco e le cose de sessashon de la sardze.
Loueu ou represeinte la Comeune e ou l’eut l'organismo responsablo de l'Amministrashon, ou surenteunt a le verificashon di resultà iliaie o fonshonameunn di sarvisho comunalo, ou l’emparteit de direttive o Segretéro comunalo, o diretour, si nominà, e i responsablo di ufisho e sarvisho an ordre i endrého amministrativo e gestionalo, e dessù l'esecushon di at.
Lo Santicó ou l’adzeit le fonshon attribuaie de le lei, de l’Estatut, di regulameunn e ou surenteunt a l'espletamunn de le fonshon estatale on rezhonale attribuaie a la Comeune. Loueu ou l’at, de plu, de competeinse e de potér d’endrého, de vedzelanse e de controlo dessù l'attività di Assessour e de le struteure gestionale e esecutive.
Lo Santicó, dessù la base di endrého ahablì do Conselh, ou prevoueit a la nominashon, a la designashon e a la revocashon di represanteunn de la Comeune an tse eunn, asiende e istitushon.
ART. 16
Attribushon de l’Amministrashon
Lo Santicó ou l’at la represantanse dzenarala de la Comeune, ou nomine li Assessour, ou pout delegar se fonshon on pert de héte i Assessour hanglhér e ou l’eut l'organismo responsablo de l'amministrashon de la Comeune; pé dzò lo Santicó:
ou deredzeit e coordine l'attività poleticca e amministrativa de la Comeune e l'attività de la Dzouinta e di Assessour hanglhér;
ou pousse e ou l’assume d’inissiative pre conclure accord de programmo avó touit li sedzeut peblicco prevù de la lei, santù lo Conselh comunalo;
ou convoque li comsho pre li referendum prevù de l'art. 6 de la lei n. 142/90, e s.m. e li.;
ou l’adote les ordenanse contendzible e urdzeinte prevùe de la lei;
ou nomine lo Segretéro comunalo, an l’aherneunn din l’albo aspres;
ou confereit e ou revoque o Segretéro comunalo, s’ou zo creit e avó deliberashon de la Dzouinta comunala, le fonshon de diretour dzeneralo;
ou nomine li responsablo di ufisho e di sarvisho, ou l’attribùe li ensardzo di deredzeunn e hi de collaborashon esterna, an base a les esedzeinse effettive e verifiable.
ou confereit ensardzo spesseficco i Consilhér comunalo.
ART. 17
Attribushon de vedzelanse
Lo Santicó, din l'esersisho de se fonshon de vedzelanse, ou aquiste dereitameunn an tse touit li ufisho e sarvisho les enformashon e li at, asseu reservà, e ou pout desposar de l’aquisishon de at, documeunn e enformashon an tse les asiende spessiale, les istitushon e le sossietaie pre ashon, apparteneinte a la Comeune, moueieunn li represanteunn legalo de le meme, an enformeunn lo Conselh comunalo.
Loueu ou compeit li at conservativo di drouet de la Comeune e ou pousse, dereitameunn on an s’eideunn do Segretéro comunalo on do diretour, si nominà, le enquéte e le verificashon amministrative dessù l'entiére attività de la Comeune.
Lo Santicó ou pousse e ou l’assume inissiative pre assurér que ufisho, sarvisho, asiende spessiale, istitushon e sossietaie apparteneinte a la Comeune, ou fasisso ses attivitaie selon li but endecà do Conselh e an coereinse avó li endrého attuativo espressà de la Dzouinta.
ART. 18
Attribushon de organisashon
Lo Santicó di l'esersisho de se fonshon d’organisashon:
ou l’ahableit li argumeunn a l'ordre do dzòrt de le sedeutte do Conselh comunalo, ou n’an despose la convocashon e ou lo presside. Ou prevoueit a la convocashon canque la domanda lh’eut formulaia d’in hinquiémo di Consilhér;
ou l’adzeit li potér de polissìa din les adunanse consilhére;
ou propose argumeunn a trattar an Dzouinta, ou n’an despose la convocashon e ou la presside;
ou l’arseit les enterrogashon e le moshon a soubetar o Conselh.
ART. 19
Vissesanticó
Lo Vissesanticó, nominà do Santicó, ét l'Assessour qu’ou l’at la delegashon dzenerala pre l'esersisho de toteu le fonshon do Santicó, an cas d’asseinse on d’empatso de he derér.
Lo conferimeunn de le delegashon, lishìe i Assessour, ou deit iéhre communicà o Conselh e i organismo prevù de la lei, e pebleiò a l'albo pretouéro.
ART. 20
Moshon de malconfianse
Lo vout do Conselh comunalo contréro a ina proposeshon do Santicó on de la Dzouinta ou n’an comporte pa le demishon.
Lo Santicó e la Dzouinta ou sésso de la sardze din lo cas d’approvashon d’ina moshon de malconfianse votaia pre apel nominalo de la madzouranse assolùe di componeunn do Conselh.
La moshon de malconfianse lhe deit iéhre motivaia e souhresouò d’omoueins doueu hinquiémo di Consilhér assinhò, seinsa contar pre heunn fare lo Santicó, e lhe veunt betaia an descushon pa deveunn de dis dzòrt e pa outré li oltre treunta de sa presentashon. Si la moshon lhe veunt approvaia, i s’avanse o deboueiladzo do Conselh e a la nominashon d’in commisséro, i seins de le lei vedzeinte.
ART. 21
Demishon do Santicó
1. Le demishon presentaie do Santicó o Conselh ou véno irrevocable apré venn dzòrt de la presentashon. Passà he termo, i s’avanse o deboueiladzo do Conselh, avó contestuala nominashon d’in commisséro.
ART. 22
Dzouinta comunala
La Dzouinta ét in organismo d’empulshon e de gestion amministrativa, lhe collabore avó lo Santicó o govert de la Comeune e lh’empronte sa méma attività i prensipio de la traspareinse e de l'effissieinse.
La Dzouinta lh’adote touit li at aspres a l’ardzunhemeunn di but e de le finalitaie de la Comeune, din lo cadre di endrého e an attuashon de le dessizhon fondamentale approvaie do Conselh comunalo. Pé dzò, la Dzouinta lh’adzeit le fonshon de endrého poleticco-amministrativo, an defeneunn li but e li programmo a attuar e an adoteunn li otri at rintreunn din lo derolemeunn de héte fonshon e lhe vereféie la respondeinse di resultà de l’attività amministrativa e de la gestion di endrého empartì.
La Dzouinta lhe refereit touit li eunn o Conselh comunalo son attività.
ART. 23
Composeshon
La Dzouinta lh’eut composaia do Santicó e de catro Assessour, diquin un envehì de la sardze de Vissesanticó.
Li Assessour ou sont ahernù normalameunn entre li Consilhér; ou polo, totun, iéhre nominà asseu Assessour esterno o Conselh, bieunn que dotà di requisito d’eluabilità e qu’ou l’isso pé dzò de competanse e d’esperieinse tecnique, amministrative on profeshonale.
Li Assessour pa Consilhér ou partissipo a le sedeutte do Conselh comunalo seinsa drouet de vout.
ART. 24
Nominashon
Lo Vissesanticó e li otro componeunn de la Dzouinta ou sont nominà do Santicó e presentà o Conselh comunalo din la premiére sedeutta sussessiva a sa nominashon.
Lo Santicó ou pout revocar un on plu Assessour, an doneunn motivaia communicashon o Conselh e ou deit sostituir din quinze dzòrt li Assessour demishonéro. Le demishon de l’Assessour ou sont presentaie dessù papél o Santicó, ou sont irrevocable, ou nessessito pa de la preisa d’at e ou véno efficahe in còl adottaia do Santicó la relativa sostitushon.
Le cose d’encompatibilità, la poseshon e l’estat dzuredicco di Assessour e li istitut de la decadeinse e de la revocashon ou sont desseplinà de la lei.
Viò li cas de revocashon de la pert do Santicó, la Dzouinta lh’ihe an sardze tein qu’o dzòrt de la proclamashon di elù an occazhon de l’arnovelameunn do Conselh comunalo.
ART. 25
Fonshonameunn de la Dzouinta
1. La Dzouinta lh’eut convocaia e pressidouò do Santicó, qu’ou coordine e ou controle l'attività di Assessour e ou l’ahableit l'ordre do dzòrt de le reunion, asseu tenù contio di argumeunn proposà di Assessour hanglhér. Le sedeutte de la Dzouinta comunala ou sont pa peblique.
2. Le modalitaie de convocashon e de fonshonameunn de la Dzouinta ou sont ahablìe de manére enformala de la méma.
Le sedeutte ou sont valable si preseunn trei componeunn e le deliberashon ou sont adottaie a madzouranse di preseunn, avó votashon paleisa, viò din li cas espressameunn prevù de la lei.
ART. 26
Competanse
La Dzouinta lhe collabore avó lo Santicó din l'amministrashon de la Comeune e lhe compeit li at que, i seins de lei on do preseunn Estatut, ou sisso pa reservà o Conselh e ou rintrisso pa din le competanse attribuaie o Santicó, o Segretéro comunalo, o diretour, si nominà, on i responsablo di sarvisho comunalo.
La Dzouinta lh’ovre de manére collezhala, lhe done attuashon i endrého dzeneralo espressà do Conselh e lhe fet attività propositiva e d’empulshon anvers do mémo.
Ou véno attribuaie asseu, a la competanse de la Dzouinta, an applicashon de l’art. 4, coma 2 de la lei 142/90 e s.m.li.:
l’otorisashon a poussar e resestar i tsacòt, viò qu’i sisse la madzistrateura dzedzeinta e lo grado d’apel e le nominashon legale relative;
l’approvashon di verbal de gara e de concours, an proclameunn li adzedicatéro e, respettivameunn, li candidà declharà amodo;
l’assettashon de donashon;
la conseshon de sovenshon, contrebushon, sussido e vantadzo economicco de touit li dzindro a eunn e presseneu, din lo respet do spesseficco regulameunn comunalo;
la fissashon de la data de convocashon di comisho pre li referendum e la costitushon de l'ufisho comunalo pre les operashon referendére, doquin ét betà l'assertameunn de la regularità do prossedemeunn;
lo conferimeunn d’ensardzo prozhetualo e otro ensardzo profeshonalo de nateura fidushére relativo a le matére de méma competanse.
TITRO III
Istitut de partissipashon e drouet di sitadin CAP I
Partissipashon e dessentrameunn
ART. 27
Partissipashon populéra
Lhe veunt avarantiò e poussaia la partissipashon di sitadin a l’attività de la Comeune, pre assurér la justa gestion, l’emparsialità e la traspareinse.
Pre li memo but, ou sont preveledzìe le forme assossiative, cooperative e les organisashon de volontarià, an pousseunn l’acsé a le struteure e i sarvisho de la Comeune.
I sitadin ou sont consanteuve de forme dereite e semplifeìe de sovegarda d’intré qu’ou favorisso son enterveunn din la formashon di at.
La Comeune lhe pout attivar de forme de consultashon, pre aquisir l’adreita de le categorì produttive e de le representanse sendicale.
CAP II
Assossiashonnismo e volontarià
ART. 28
Valorisashon de le forme assossiative e organismo de partissipashon
L’Amministrashon comunala lhe favoreit e lhe pousse l’attività d’intré peblicco de les assossiashon, di comità on di eunn ovreunn dessù lo mémo territouéro. Pé dzò ou sont valorizhìe:
le parotse e les otre comenetaie reledzouse locale, sisse an teunn que represanteunn d’intré spiritualo e d’elemeunn de promoshon uman-na, sisse an teunn que guardian de batimeunn de culto e de le tradishon reledzouse;
l’assossiashon touristicca Proloco, regulérameunn arcunussouò i seins de la vedzeinta legislashon rezhonala, an teunn que strumeunn de base pre la sovegarda de le valour naturale, artestique, culturale e de promoshon de l’attività touristicca. Lo Conselh comunalo ou podret prevér que l’assossiashon Proloco lhe sisse representaia din li organismo consultivo comunalo e qu’a la méma ou sisso confià de sarvisho comunalo angardeunn lo settour;
les assossiashon e li eunn caritativo, assistensialo e educativo a caratéro volontéro, de nateura laica on reledzouse, iquin lhe venir confiaia la gestion de fonshon comunale an sintonì avó se finalitaie;
les assossiashon sportive, recreative e culturale, a lequinte lhe pout, de prefereinse, iéhre confiaia la gestion d’emplant e sarvisho on la realisashon de prozhé e inissiative d’intré comunalo;
li consorsho agréro e les otre assossiashon pre la sovegarda e lo melhorameunn do patremouéno agréro e zootecnicco;
les assossiashon e li groupe de sitadin qu’ou s’attivo spontaneameunn pre la sovegarda ambientala, la proteshon sevila, lo mantenimeunn di us sevicco e la conservashon de le corvé agro-silvo-pastorale.
Pre heunn fare lhe veunt poussaia la partissipashon de hi sedzeut a la viò amministrativa de la Comeune, a travers de consultashon i organismo comunalo, l’acsé libro a le struteure e i sarvisho comunalo, la possibilità de presentar memouére, documentashon, osservashon utile a la formashon di programmo d’entervanshon peblicco e a la solushon di problémo amministrativo.
L’Amministrashon comunala lh’enterveunt avó la conseshon de sovenshon, contrebushon, sussido, édo finanshéro o otro vantadzo economicco a souteunn de les inissiative voleuve di eunn diquin o coma 1, an base a regulameunn aspres. Avó regulameunn aspres ou seront desseplinaie le conseshon di localo comunalo. A hi eunn lh’eut donaia la possibilità d’utilizhér le struteure e li sarvisho de la Comeune, a titro de contrebù promoshonalo pa finanshéro, asseu an relashon a spessefique attivitaie.
Lh’eut asseu favoriò la formashon d’organismo a base assossiativa de l’uteinse quou se proposo de concoure a la gestion di sarvisho peblicco a demanda endeviduala. A hi eunn lhe pout iéhre confiaia, an base a norme de regulameunn, la gestion de hi sarvisho, avó oblidzo de referir o Conselh comunalo li resultà de la gestion.
CAP III
Modalitaie de partissipashon
ART. 29
Consultashon
Din le matére d’esclusiva competanse locala que l’Amministrashon lhe reputisse iéhre d’intré comun e o but de conseintre la plu hota empostashon e realisashon de les inissiative, ou sont anandiaie de forme difareinte de consultashon de la popolashon.
Le consultashon, anandiaie de l’Amministrashon comunala, ou podriont derolasse selon la forma do confron deret moueieunn l’assembléa, l’enterlocushon a travers de questionéro, de l’engadzo din li travalh de le commishon e avó tòt otro mouieunn utilo a l’ardzunhemeunn do but. Les inissiative ou deveront iéhre devan-hìe de la plu ampla peblissità.
Les osservashon, li sedzerimeunn, le proposeshon qu’ou devisso conseguisse de la pert di sitadin, hanglhér on associà, ou formo odzeut d’attenshon do caro de l’Amministrashon, laquinta lhe done l’adreita i proponeunn dessù si enterveunn, an endiqueunn li ufisho preposà.
Le consultashon ou polo avér caro an coinsideinse avó operashon elettorale comunale.
ART. 30
Petishon
Touit, an forma personala on assossiaia, asseu si pa resideunn din lo territouéro comunalo, ou polo anfrontasse i organismo de l’Amministrashon pre stimulàsenn l’entervanshon dessù de question d’intré comun on pre esposar des esedzeinse de nateura collettiva.
La culhetò d’adezhon lhe pout avvenir seinsa formalità, o piò do testo compreneunn le demande qu’ou sont féte a l’Amministrashon.
La petishon lh’eut inoltraia o Santicó loquin, din quinze dzòrt, l’assinhe o sedzeut competeunn e ou n’envìe ina copìe i groupe preseunn an Conselh comunalo.
Lo contenù de la dessizhon do sedzeut competeunn, unitameunn o testo de la petishon, ou sont pebleiò moueieunn affishon din li caro dedeiò, an manére que touit ou zo sisso.
ART. 31
Istanse e proposeshon
Li elettour de la Comeune ou polo fare istanse e proposeshon o Conselh e a la Dzouinta comunala relativameunn a problem de relevanse sitadin-na.
Lo Conselh Comunalo on la Dzouinta, din treunta dzòrt do ressevimeunn, avó deliberashon aspres, ou preneret at do ressevimeunn de l’istanse on proposeshon, an assumeunn eventuale determinashon consequeinte.
Le proposeshon ou deveront iéhre souhreseuve omoueins do 20% di elettour ehresù din le liste elettorale de la Comeune, avó firme otenticaie selon la prossedeura prevùe pre la souscreshon di referendum populéro.
Lo contenù de la dessizhon de l’organismo competeunn, unitameunn o testo de l’istanse on proposeshon, ou sont peblissizhò moueieunn affishon din li caro aspres e de manére que touit li firmatéro resideunn din lo territouéro de la Comeune ou zo sisso.
ART. 32
Referendum
In neumbro d’elettour resideunn, pa plu petiòt d’in treizhémo di iscrit din le liste elettorale, ou pout mandar qu’ou sisso endeut referendum an toteu le matére de competanse comunala.
Ou polo pa iéhre endeut referendum an matére de tribut localo e de tarifashon, d’attivitaie amministrative vinculaie de lei estatale on rezhonale e canque dessù lo mémo argumeunn ou sisse dzò ihà endeut in referendum din li derér hinc an. Ou sont, an outre, esclusaie de la potestà referendéra le souiveinte matére:
Estatut comunalo;
regulameunn do Conselh comunalo;
plan regulatour dzeneralo e strumeunn urbanisticco attuativo;
La demanda a soubetar i elettour lhe deit iéhre comprensibla e pa equivocabla.
Ou sont ammissible le demande de referendum asseu an ordre a l'odzeut d’at amministrativo dzò approvà di organismo competeunn de la Comeune, viò hi relativo a le matére de lequinte o pressedeunn coma 2.
Lo Conselh comunalo ou l’approve in regulameunn din loquin ou véno ahablìe le prossedeure de derolemeunn di referendum.
Le souscreshon referendére ou dévo iéhre otenticaie din le forme de lei.
Lo referendum ou vot pa s’ou l’isse pa partissipà a le consultashon omoueins la moueità plu un di aveunn drouet.
Lo mancà ressepimeunn de les endecashon approvaie di sitadin din la consultashon referendéra ou deit iéhre adecatameunn motivà e deliberà de la madzouranse assolùe di Consilhér comunalo.
Din lo cas que la proposeshon soubetaia o referendum lhe sisse approvaia de la madzouranse assolùe di aveunn drouet o vout, lo Conselh comunalo e la Dzouinta ou polo pa assumar dessizhon contrasteinte avó helò.
Li referendum ou polo pa tenisse an coinsideinse avó operashon elettorale comunale.
ART. 33
Acsé i at
I sitadin hanglhér on assossià lh’eut avarantiò la libertà d’acsé i at de la Comeune e di sedzeut qu’ou dzéro li sarvisho peblicco comunalo, on d’enterveunn din li prossedimeunn amministrativo, selon le modalitaie defenìe do regulameunn e an osservanse de prensipio ahablì an matére de le lei de l’Estat.
2. Ou l’ont pa drouet d’acsé i at que de desposeshon de lei ou declharo reservà on soubetà a le lemitte de devulgashon e hi esplissitameunn endeviduà do regulameunn.
Lo regulameunn ou desseplin-ne, an outre, li cas din liquin ét applicablo l’istitut de l’acsé differì e ou l’ahableit le norme d’organisashon pre le copìe.
Tsaque elettour ou pout fare valér an dzudihio les ashon e li recours de la Comeune. An cas de soccombeinse, li fré prossessualo ou sont a sardzo de l’elettour, viò que la Comeune lh’aderisse o recours, an se constitueunn.
Et istituì din lo siédzo de la Comeune, an in caro fassilhemeunn acsessiblo o peblicco, l’albo pretouéro comunalo pre la peblicashon que la lei, l’Estatut e li regulameunn ou prehriso.
La peblicashon lhe deit iéhre feta an manére que li at ou se polisso lire an entiér e fassilhemeunn.
TITRO IV
Attività amministrativa CAP I
ASHON AMMINISTRATIVA
ART. 34
Prensipio e critéro enformatour de l’ashon amministrativa
La Comeune lh’enforme la méma ashon amministrativa a prensipio de democrassì, de partissipashon, de dessentrameunn, de traspareinse e d’emparsialità.
L’organisashon di ufisho e di sarvisho lh’eut fondaia dessù l’otonomì, dessù la fonshonalità e dessù l’economissità de gestion, selon li critéro de profeshonalità e de responsabilità, avó separashon entre li devouéro d’endrého e de controlo de l’organismo de govert e li devouéro de gestion amministrativa, tecnicca e contabla do Segretéro comunalo e di depandeunn nominà responsablo di ufisho e di sarvisho.
ART. 35
Organisashon de l’ashon amministrativa
L’amministrashon de la Comeune lhe s’attùe moueieunn in’attività pre but e lhe deit iéhre enformaia i prensipio souiveunn:
organisashon do travalh pre prozhé-but e pre programmo;
endeviduashon de responsabilità hereitameunn iliaia o doméno d’otonomì dessizhonalo di sedzeut;
superameunn de la separashon reida de le competanse din la devizhon do travalh e plu hota flessibilità de le struteure e do personalo.
Din l’organisashon de la méma attività la Comeune lhe pout eidasse avó de strumeunn operativo e enformaticco a hot contenù tecnolozhicco. A hi doméno ou polo attivasse de forme de documentashon a souteunn manheticco on d’otro dzindro, an sostitushon de la documentashon an papél.
La Comeune lh’arcunut la valour di documeunn trasmetù avó mouieunn telematicco de communicashon.
La Comeune, o but de sodesfare les esedzeinse di sitadin, lh’attùe le forme de partissipashon prevùe do preseunn Estatut e lhe favoreit le forme de cooperashon avó d’otro eunn localo.
ART. 36
Sarvisho peblicco comunalo
Lo Comeune lhe prevoueit a la gestion di sarvisho peblicco qu’ou l’isso pre odzeut la produshon de bieunn e sarvisho on l’esersisho d’attivitaie pre presouivre de but sossialo e pre poussar lo developameunn economicco e sevilo de la comenetà locala.
Li sarvisho a gestir avó drouet de privativa ou sont ahablì de la lei.
ART. 37
Forme de gestion di sarvisho peblicco
Lo Conselh comunalo ou pout deliberar l’istitushon e l’esersisho di peblicco sarvisho din le forme souiveinte:
an economì, canque pre le petiote dimenshon on pre li tret do sarvisho, ou sisso bieunn de costituir in’istitushon on in’asienda. L’organisashon e l’esersisho di sarvisho an economì ou sont desseplinà de regulameunn aspres;
an conseshon a ters, canque i isse de reison tecnique, economique e d’opportunità sossiale;
moueieunn d’asiende spessiale, asseu pre la gestion de plu sarvisho de relevanse economicca e emprenditoriala;
moueieunn d’istitushon, pre l’esersisho de sarvisho sossialo seinsa relvanse emprenditoriala;
moueieunn de sossietaie pre ashon on a responsabilità limitaia a prevaleunn capitalo peblicco, queunn i se reunt nessesséro, an relashon a la nateura do sarvisho a erogar, la partissipashon d’otro sedzeut peblicco e privà;
moueieunn de convenshon, consorsho, accord de programmo, union de Comeune e toteu otre forme consanteuve de la lei.
La Comeune lhe pout partissipar a sossietaie pre ashon, a prevaleunn capitalo peblicco localo costituìe on partissipaie de la Comeune, pre la gestion de sarvisho que la lei lhe reservisse pa an viò esclusiva a la Comeune.
La Comeune lhe pout asseu, donar empulshon e partissipar, asseu endereitameunn, a attivitaie economique iliaie a si but istitushonalo, an s’eideunn avó li prensipio e li strumeunn de drouet de la Comeune.
Li potér, viò lo referendum, que lo preseunn Estatut ou l’arcunut i sitadin din li confron di at de la Comeune, ou sont ahandù asseu i at de les asiende spessiale, de les istitushon e de le sossietaie de capitalo a madzouranse peblicca.
ART. 38
Asiende spessiale
Lo Conselh comunalo ou pout deliberar la costitushon d’asiende spessiale, dotaie de personalità dzuredicca, d’otonomì gestionala e emprenditoriala e ou l’approve l’Estatut.
Les asiende spessiale ou l’enformo son attività a critéro de traspareinse, d’efficahe, d’effissieinse e d’economissità e ou l’ont l’oblidzo de l’equilibro finanshéro e economicco, a conseguir a travers lo balansemeunn di fré e de les intraie, asseu comprein li trasferimeunn.
Li sarvisho de competanse de les asiende spessiale ou polo iéhre esersità asseu andefora do territouéro comunalo, avó stipulashon d’accord pre avarantir l’economissità e la bon-na calità di sarvisho.
ART. 39
Struteura de les asiende spessiale
L’Estatut de les asiende spessiale ou n’an desseplin-ne la struteura, lo fonshonameunn, les attivitaie e li controlo.
Ou sont organismo de les asiende spessiale lo Conselh d’amministrashon, lo presideunn, lo diretour e lo collédzo de revizhon.
Lo presideunn e li amministratour de les asiende spessiale ou sont nominà do Santicó entre presseneu qu’ou l’isso de requisite d’eluabilità a Consilhér comunalo, dotaie de spessiale competanse tecnicca o amministrativa pre ehedio fet, pre fonshon esersitaie an tse asiende peblique on privaie on pre ufisho cuvert.
Lo diretour ou l’eut engajò pre peblicco concours, viò li cas prevù de l’art. 4 do R.D. 15-10- 1925 n. 2578, an preseinse doquin i se pout prossédre a l’apel deret.
Lo Conselh comunalo ou prevoueit a la nominashon do collédzo di revisour do contio, ou confereit lo capitalo de dotashon e ou determine li endrého e le finalitaie de l’amministrashon de les asiende, asseu comprein li critéro dzeneralo pre la determinashon de le tarifashon pre la fruishon di bieunn on sarvisho.
Lo Conselh comunalo ou l’approve asseu, li bilan annualo e pluriennalo, li programmo e lo contio consuntivo de les asiende spessiale e ou l’adzeit la vedzelanse dessù son ovra.
Li amministratour de les asiende spessiale ou polo iéhre revocà rinque pre grave violashon de la lei, documentaia ineffissieinse on difformità respet i endrého e a le finalitaie de l’Amministrashon approvà do Conselh comunalo.
ART. 40
Istitushon
Les istitushon ou sont d’organismo strumentalo de la Comeune seinsa personalità dzuredicca ma dotaie d’otonomì gestionala.
Ou sont organismo de les istitushon lo Conselh d’amministrashon, lo presideunn e lo diretour.
Li organismo de les istitushon ou sont nominà do Santicó qu’ou pout revocali pre grave violashon de la lei, pre documentaia ineffissieinse on pre difformità respet i endrého e a le finalitaie de l’Amministrashon.
Lo Conselh comunalo ou determine li endrého e le finalitaie de l’amministrashon de les istitushon, asseu comprein li critéro dzeneralo pre la determinashon de le tarifashon pre la fruishon di bieunn on sarvisho, ou l’approva li bilan annualo e pluriennalo, li programmo e lo contio consuntivo e ou l’adzeit la vedzelanse dessù son ovra.
Lo Conselh d’amministrashon ou prevoueit a la gestion de l’istitushon e ou delibére din lo doméno de le finalitaie e di endrého approvà do Conselh comunalo e selon le modalitaie organisative e fonshonale prevùe din lo regulameunn.
Lo regulameunn ou pout asseu prevér forme de partissipashon di sitadin on di uteunn a la gestion on o controlo de l’istitushon.
ART. 41
Sossietaie pre ashon o a responsabilità limitaia
Lo Conselh comunalo ou pout approvar la partissipashon de la Comeune a sossietaie pre ashon on a responsabilità limitaia pre la gestion de sarvisho peblicco, eventualmeunn an prevaieunn asseu a sa costitushon.
Din lo cas de sarvisho peblicco de priméra emportanse, la partissipashon de la Comeune, unitameunn a helò d’otro eventualo eunn peblicco, lhe deveret iéhre obligatouérameunn madzouritéra.
L’at costitutivo, l’Estatut, l’atset de cotisashon, ou dévo iéhre approvà do Conselh comunalo e lhe deit, totuns, iéhre avarantiò la representatività di sedzeut peblicco din li organismo d’amministrashon.
La Comeune lh’aherneit li mémo represanteunn entre sedzeut dotà de spesseficca competanse tecnicca e profeshonala e, din lo concoure i at gestionalo, lhe considére li intré di consumatour e di uteunn.
Li Consilhér comunalo ou polo pa iéhre nominà din li conselh d’amministrashon de le sossietaie pre ashon on a responsabilità limitaia.
Lo Santicó on in son delegà ou partissipe a l’assembléa di socho an represantanse de la Comeune.
Lo Conselh comunalo ou prevoueit a verifiér annualameunn l’andameunn de la sossietà pre ashon on a responsabilità limitaia e a controlar que l’intré de la collettività ou sisse adecatameunn sovegardà din lo doméno de l’attività adziò de la sossietà méma.
ART. 42
Convenshon
Lo Conselh comunalo ou delibére de convenshon aspres a stipular avó Amministrashon estatale, rezhonale, provinsiale e comunale, avó otro eunn peblicco on avó privà, o but de fournir, de manére coordenaia, fonshon e sarvisho peblicco.
Le convenshon ou l’ont a ahablir li but, la duraia, le forme de consultashon di eunn contraeunn, se relashon finanshére e li resseproco oblidzo e avaratieu.
ART. 43
Consorsho
La Comeune lhe pout partissipar a la costitushon de consorsho avó d’otro eunn localo pre la gestion assossiaia de un on plu sarvisho, selon le norme prevùe pre les asiende spessiale, an teunn qu’applicablo.
Pre heunn fare, lo Conselh comunalo ou l’approve, a madzouranse assolùe di componeunn, ina convenshon i seins do pressedeunn articlho, unitameunn on Estatut do consorsho.
La convenshon lhe deit prevér l’oblidzo, an sardzo do consorsho, de la trasmishon a la Comeune di at fondamentalo, qu’ou deveront iéhre pebleiò a l’albo pretouéro.
Lo Santicó on in soi delegà ou fet pert de l’assembléa do consorsho, avó responsabilità pari a la cotisashon de partissipashon fizhò de la convenshon e de l’Estatut do consorsho.
ART.44
Accord de programmo
Lo Santicó, pre la defenishon e l’attuashon d’ovre, d’entervanshon on de programmo d’entervanshon qu’ou mando, pre sa compléta realisashon, l’ashon entegraia e coordenaia de la Comeune e d’otro sedzeut peblicco, an relashon a la competanse primèra on prevaleinta de la Comeune dessù l’ovra on dessù l’entervanshon on dessù li programmo d’entervanshon, lhe favorizhe la concluzhon d’in accord de programmo pre assurér lo coordenameunn de les ashon e pre determinar li tein, le modalitaie, lo finanshameunn e tòt otro adempimeunn ilià.
L’accord de programmo, consisteunn din lo conseins unanimo do presideunn de la Rezhon, do presideunn de la Provinse, di Santicó de les Amministrashon enterishìe, ou veunt defenì an ina confereinse aspres laquinta lhe prevoueit, an plu, a l’approvashon formala de l’accord mémo, i seins de l’art. 27, coma 4, de la lei 8 zouin 1990 n. 142, modefeiò de l’art. 17, coma 9, de la lei 127/97.
Din lo cas que l’accord ou sisse adottà avó decret do presideunn de la Rezhon e ou comportisse de variashon di strumeunn urbanisticco, l’adezhon do Santicó lhe deit iéhre ratificaia do Conselh comunalo din treunta dzòrt, pein-na la decadeinse.
TITRO V
Ufisho e personalo CAP I
Ufisho
ART. 45
Prensipio struturalo e organisativo
L'amministrashon de la Comeune lhe s’esplique moueieunn lo perseguimeunn de but spesseficco e lhe deit iéhre emprontaia i souiveunn prensipio:
in'organisashon do travalh pre prozhé, but e programmo;
l'analizhe e l'endeviduashon de le produttività e di sardzo fonshonalo de travalh e lo do grado d’efficahe de l'attività féta de tsaque elemeunn de l'apparà;
l'endeviduashon de responsabilità hereitameunn iliaie odoméno d’otonomì dessizhonala di sedzeut;
lo superameunn de la separashon reida de le competanse din la devizhon do travalh e lo conseguimeunn de la plu hota flessibilità de le struteure e do personalo e de la plu hota collaborashon entre li ufisho.
ART. 46
Organisashon di ufisho e do personalo
La Comeune lhe desseplin-ne, avó d’at aspres, la dotashon organicca do personalo e, an conformità a le norme do preseunn Estatut, l'organisashon di ufisho e di sarvisho, dessù la base de la distinshon entre fonshon poleticca e de controlo attribuaia o Conselh comunalo, o Santicó e a la Dzouinta, e fonshon de gestion amministrativa attribuaia o diretour dzeneralo, si nominà, e i responsablo di ufisho e di sarvisho, tenù asseu preseunn lo prensipio costitushonalo do bon andameunn e de la semplificashon de l’ashon amministrativa.
La Comeune, i seins de l’art. 51, coma 1, de la lei 142/90 e s.m.i., lhe prevoueit a la determinashon de la méma dotashon organicca e a l’organisashon e gestion do personalo din lo doméno de la méma otonomì normativa e organisativa, avó le soleteu lemitashon dereveinte de la méma capassità de bilan e de les esedzeinse d’esersisho de le fonshon di sarvisho e di devouéro attribuà.
Li ufisho ou sont organizhò selon li prensipio d’otonomì, traspareinse e effissieinse e critéro de fonshonalità, economissità de gestion e flessibilità de la struteura, asseu an anovreunn les innovative forme de flessibilità do rapport de travalh.
Li sarvisho e li ufisho ou l’ovro dessù la base de l'endeviduashon de les esedzeinse di sitadin, an adequeunn costeintameunn la méma ashon amministrativa e li sarvisho semonù, an verifieunsenn la respondeinse i bosein e l'economissità.
ART. 47
Regulameunn di ufisho e di sarvisho
La Comeune, moueieunn do regulameunn d’organisashon, ou l’ahableit norme dzenerale pre l'organisashon e lo fonshonameunn di ufisho e, pé dzò, les attribushon e le responsabilitaie de tsaque struteura organisativa, le relashon resseproque entre ufisho e sarvisho e entre héti, lo diretour, si nominà, e li organismo amministrativo.
Li regulameunn ou s’uniformo o prensipio selon loquin i organismo de govert lh’eut attribuaia la fonshon poleticca de endrého e de controlo, entandouò comme potestà d’ahablir, an plein-na otonomì, but e finalitaie de l'ashon amministrativa an tsaque setour e de verifiésenn lo conseguimeunn; o diretour, si nominà, e i fonshonéro responsablo ou totso, i but do perseguimeunn di but assinhò, l’ensardzo de definir, congruameunn avó li but istitushonalo, li but plu operativo e la gestion amministrativa, tecnicca e contabla, selon prensipio de profeshonalità e responsabilità.
L'organisashon de la Comeune lhe s’articule an unitaie operative qu’ou sont agredzìe, selon de critéro d’omozhenità, an struteure progressivameunn plu ample, comme disposà de l’aspres regulameunn, asseu moueieunn l’édo de struteure trasversale on de staff entersetorialo.
La Comeune lhe ressepeit e lh’applique li accord collettiv nashonalo approvà din le forme de lei e lhe sovegarde la libra organisashon sendicala di depandeunn, an stipuleunn avó le representanse sendicale li accord collettivo dessitrà i seins de le norme de lei e contrattuale an vigour.
Lo regulameunn comunalo dessù l’ordenameunn di ufisho e di sarvisho ou desseplin-ne, entrotro, le modalitaie de nominashon e le fonshon do diretour dzeneralo, di responsablo di ufisho e di sarvisho, li ensardzo de hota spessialisashon, li ensardzo de consuleinse e le collaborashon esterne.
CAP II
Lo Segretéro comunalo
ART 48
Segretéro comunalo
Lo Segretéro comunalo ou l’eut nominà do Santicó, doquin ou depeunt an fonshon e ou l’eut ahernù din l’albo dedeiò.
Lo Conselh comunalo ou pout approvar la stipulashon de convenshon avó d’otre Comeune pre la gestion consortila de l'ufisho do Segretéro comunalo.
L’estat dzuredicco e lo trattameunn economicco do Segretéro comunalo ou sont ahablì de la lei e de la contrattashon collettiva.
Lo Segretéro comunalo, din lo respet de le direttive donaie do Santicó, ou préhe consuleinse dzuredicca i organismo de la Comeune, i Consilhér hanglhér e i ufisho.
Ou l’at le fonshon prevùe de la lei, do regulameunn dessù l’ordenameunn di ufisho e di sarvisho e di otri regulameunn, e touit li devouéro e le fonshon qu’ou véno assinhò do Santicó.
ART. 49
Visse-Segretéro comunalo
1. Lo Santicó ou pout assinhér le fonshon de Visse-Segretéro comunalo, an l’endevidueunn din un di fonshonéro apicalo de la Comeune.
TITRO VI
Patremouéno finanse e contabilità CAP I
Patremouéno e contabilità
ART. 50
Demanio e patremouéno
In regulameunn aspres, a adotasse i seins de l’art. 12, coma 2, de la lei 15 mai 1997, n. 127, ou desseplineret les alienashon patrimoniale.
He regulameunn ou desseplineret asseu le modalitaie de relevashon di bieunn comunalo, sa gestion e la revizhon periodicca di envantéro.
ART. 51
Ordenameunn finanshéro e contablo
L’ordenameunn finanshéro e contablo de la Comeune è riservà a la lei do Stà.
In regulameunn aspres ou desseplineret la contabilità comunala, an conformità a heunn prehresù de l’art. 108 do D.L.vo 25 fevrér 1995, n. 77 e s.m.i.
ART. 52
Revizhon economicco-finanshére
La revizhon economicco-finanshére de la Comeune lh’eut desseplinaia de la normativa estatale.
Lo regulameunn doquin coma 2 do pressedeunn articlho 51, ou desseplineret asseu, que l’organismo de revizhon ou sisse dotà, o soueunn de la Comeune, di mouieunn nessesséro pre lo derolemeunn de si memo ensardzo.
TITRO VII DESPOSESHON FINALE
ART. 53
Revizhon de l’Estatut
Le deliberashon de revizhon de l’Estatut ou sont approvaie do Conselh comunalo, avó le modalitaie de lequinte a l’art. 4, coma 3, de la lei 142/90 e s.m.li.
La deliberashon d’abrogashon totala de l’Estatut lh’eut pa valabla si pa acompanhò de la deliberashon d’in novo Estatut, qu’ou ramplahisse lo pressedeunn.
ART. 54
Intrada an vigour de l’Estatut
L’Estatut comunalo ou l’intre an vigour lo trentiémo dzòrt souiveunn a sa peblecashon a l’albo pretouéro de la Comeune.
Lo Conselh comunalo ou fizhe le modalitaie pre assuriér la cunussanse de l’Estatut de la pert de sitadin qu’ou resido din la Comeune e de Eunn qu’ou z’i ont siédzo, an confieunn a la Dzouinta comunala son esecushon.
commenta