An bòt la vouòrp e lou lou ou l'avioùnt nint da mindjìa e la vouòrp, qu'i iéret più bouèurba, i a dit a ou lou: «Vinàn avè mè, dj'alèn sercà d'intrà ant 'ou veilìn per bèiri la fioù! ».

An tou mu dou veilìn i avìt an pertùss quitì e la vouòrp e lou lou ou sount riuscì a intrà. Ouand qu'ou sount sta an dinss ou l'ant ancaminà a lapà la fioù qu'i i avìt an tou bassìn.

La vouòrp, qui i ieret più bouèurba, mìnca tant i allàvet a beigà si passavet ancou travé lou pertuss. Lou lou, a ou countràri, ou lapàvet a gran fòrssi. Ouand que la vouòrp i a viù qu'i passàvet quasi piìnt par lou pertùss, i ist saià d'ou veilìn e i ist alà a stermàsse. Lou lou ou l'a continouà a bèiri e après d'na brivàtta, quand que lou bardjìa ou l'ist rivà par frutà lou làit e ou l'a drouì l'uss dou veilìn, lou lou ou l'a piìnt poussù scapàsse.

Lou bardjìa ou l'at ancamminà a doùnai tou lou bastoun s 'la squìnna, finqué lou lou ou l'rivà a passò vià da l'uss, più mort que vi. Ouand que lou lou ou l'rivà da la vouòrp ou i a dit: «Bèiga, dj 'è la squìnna touta dernà!». E la vouòrp, que i s'avìt butà an po' d'fioù s 'la tèsta i a rispondù: «Mè s'è più malada que tè! Beiga, dj 'è lou servèl qu'ou sàit da nt 'la testa. Ourà dj 'en da scapàsse e mè peu nint martchìa; e vìntet que tè d'im pòrtess s 'la squìnna!». Lou lou ou s'a tchardjà la vouòrp s'ls'spàless e ou s'a butà a couòri più lèn qu'ou pouìt. Minca tant la vouorp i disìt. «Par li mount e par li piàn lou malàdou ou pòrtet lou san!». Lou lou ou i tchamàvet co qu'i disìt e quièla i li rispoundìt qu'ou ou l'alàsset più lèn perqué lou bardjìa ozi li courìt d'après.