I a djà passà sàze an da quand que la festa dou patuà est sta féta lou prim, e l'ultim bot ant l'nostess valàdess, a Ala da Stura. San-qui i a marcà l'inìssi d'na coustùma.

Da sa épouca iquì, i a gnint passà an sansa que una delegassioùn d'la nosta djant ou i éuissount mancà d'allà an troup a lféstess d'la Savòi, d'la Val d'Ousta, dou Valèis o d'la Gruiéri, an touta la granta àiri dou Francprouvensàl qui i ist tout a virant dou Mount Bianc.

A ourà e toùtchet a Séress d'avé l'ounou d'ritchévri li amis qu'rìvount d'an amount e d'an avàl, da davsin e da lougn, par passà ansémbiou doùess béless djournàiess d' fésta.

San-qui e douvrìt dounà¬nouss l'oucasiùn d'dimoràsse ansèmbiou an querquess manèress, d'parlà, d'vìvri an poc a nosta moda, d'mindjìa e d'bèiri coume nou pietit, avì li nosti amìss da d'sai e da d'lai dal nostess béless mountàgness.

Nouss voulèn fàri arvìvri lou nostou passà, dounài da mant a li viéi, qu'ou s'souvìnount dal tchòsess d'an bot. E voulèn co' d'beigà a l'avinì d'li djoun, tou la sprànssi d'piìnt véli vintà allà vià, qu'ou pouiéount nàistri, vìvri e travaìa a ou paìss.

Vinéss a visità l' nostess bourgà avì nouss e, s'ou pouiéss, aidà-nouss a gnint pèrdri l'nòstess rèis, qu'ou sount pè co' l'vòstess.

Vinéss fari fésta avì nouss, par vous-aouti l'uss ou l'ist semper duvèrt.