An bòt la vouòrp e lou lou ou l'avioùnt gnint da mindjìa e la vouòrp, qu'i iéret più bouèurba, i a dit a ou lou: «Vinàn avè mè, dj'alèn sercà d'intrà ant'ou veilìn per bèiri la fiou!». An tou mu dou veilìn i avìt an pertùss quitì e la vouòrp e lou lou ou sount riussì a intrà. Quand qu'ou sount sta an dinss ou Pont ancaminà a lapà la fiou qu'i i avìt an tou bassìn.

La vouòrp, qui i ieret più bouèurba, mìnca tanti allàvet a beigà si passavet ancou travé lou pertuss. Lou lou, a ou countràri, ou lapàvet a gran fòrssi. Quand que la vouòrp i o viù qu'i passàvet quasi piìnt par lou pertùss, i ist scià d'ou veilìn e i ist alà a stermàsse. Lou lou ou l'a continouà a bèiri e après dyna brivàtta, quand que lou bardjìa ou l'ist rivà par frutà lou làit e ou drouì l'uss dou veilìn, lou lou ou l'a piint poussù scapàsse. Lou bardjìa ou l'at ancamminà a dounài tou lou bastoun s'la squìnna, finqué lou lou ou l'rivà a passò vià da l'uss, più mort que vi.

Quand que lou lou ou l'rivà da la vouòrp ou i a dit: «Bèiga, dj'è la squìnna touta dernà!». E la vouòrp, que i s'avit butà an po' d'fiou s'la tèsta i a rispondù: «Mè s'è più malada que tè! Belga, dj'è lou servèl qu'ou sàit da nt'la testa. Ourà dj'en da scapàsse e mè peu gnint martchìa; e vìntet que tè d'im pòrtess s'la squìnna!». Lou lou ou s'a tchardjà la vouòrp s'ls'spàless e ou s'a butà a couòri più lèn qu'ou pouìt. Minca tant la vouorp i disìt. «Parli mount e par li piàn lou malàdou ou pòrtet lou san!». Lou lou ou i chamàvet co qu'i disìt e quièla i li rispoundìt qu'ou ou l'alàsset più lèn perqué lou bardjìa ou li courìt d'après.