An bòt, li margué ou piévount d'vàtchess d'afit par li tre mèis d'istà e ou mountàvount s'l'arp.

Lou prim bòt cou lardjévount, e s'coustumàvet d' douncli camìn al' vatchess toutes ansèmbiou, perquè cou ssount poussù fari la batài. L'vàtchess ou l'ant d'avé salla qui fàit da padroùna. Ou s'bàtount e salla qui vàgnet i ist la rèina dou troup. Parèi, cant cou sàiount, ou sant djà qui qu'est qui coumàndet. Est gnìnt an coumbattimant servàdjou. Ou s'lìmitount a poussoun.àsse e, a ou massim, e pòut capità que an corn ou sa squiàpet, ma sansa fàri sai d'sanc. Salla qui ist più fòrta i poùsset vià l'àouta.

San-qui e s'a sempre fàit, sansa gnùna ourganisassioùn. D'ou 1979, a Séress, e s'a foundà n'assoutchiassioùn que e s'tchàmet "I Amìss dal Rèiness d'la Val ad Lans", per ourganisà li coumbattimànt. Santoutànta e anque dousànt.

A ou prinsipi d'vàtchess e n'avit pòiquess, ourà sen tantòt a D'ràsses e n'a doùess: la Valdoustàna e la Svìsra. La prima i ist matchioulà bièntchi e nèiri, più guaiva e nervoùsa. La Svìsra i ist maròn brusatà, i ist più gròssi e più boùna da làit.

Disèn que issi da nousàouti tanti marguè ou l'ant tchetà d'vachess sprèss per fàri la coumpetissioùn e san qui iàt aidà an baroùn a migliourà la rassi. I at diversess categoriess d'bèstiess, a secounda s'ou sount prountes (pràgness) o gnìnt e a secoùnda dou pèis.

Li coumbatimànt ou sfànt a Cantòiri ver la metà d'outoùber e per qui nt'la prima a Cafàssess.

Ourà e nou piaserìt d'fari n'coumbatimant d'istà a ou Pian da Mùssa, a ou mès dal nostess mountagness. Lou difficil  e ist que a sou tens iquì li margué ou sount s'i arp e ou l'ist maladouòrn a meinà l'vàtchess.

La passioùn d'anlevà e dfàri battri Préiness i at aidà an baroùn a mantinì an t'l nòstess valàdess la tradissioùn ed tinì l'vàtchess. Tanti djoun qu'ou l'avioùnt lassià perdri lou travài dou bardjìa oul'ant artchapà a tini d'vàtchess e fina a taìa e ritiria lou fen ant i prà quou i erount djà abandounà e mèsi brusc.