Së sciüe cupërtine da Vaštéra 'r paréscë dëlong chic rèn dë caraterištichë de gènte e di paiisi brigašchi, ër në pìa dë sëgüü mancàa de futugrafie o di dësìgni chë li fan véiru a moda dë veštursé di Brigašchi dë šti àni. A fasiùn da rùuba chë li së mëtin e a štofa chë li duvravu per farlà, la èra a pröpia 'ntë tüti i paiisi da tèra brigašca e dunca 'r cuštümë dë šti ani l' e üna de cùuse ciü caratérištiche da vita di Brigašchi.

A manéra dë veštursé d'ine gènte la dìiž 'r sé caràtere, a sa manéra dë véiru e cùuse, i séi güšti, 'nt'üna parola, a sa àrima.

Turnàa a cunùsciu e dunàa 'npurtansa ae rùube dë šti ani, arura, ër në vòo dìi-nu dunàa corda a na nuštalgia sènsa süüghë o vurée èsu dëfrénti dai autri a tüt'i cönti, ma 'r vo dìi cunusciu e "raìiže" de noštre gènte, a sa dignità e 'r sé valùu, e dunca lo ch'e séma nue 'r dì d'ëncöi. Difati e séma cunvinti chë l'è dëma 'n argurdèndësé dë lò ch'è pasà, e 'n vurènd bèn a lo ch'e noštre gènte n'han muštrà, ch'e purëréma guaitàa e pënsàa cun fidücia a r'avëgnìi.

Ën cumënsènd da štë nümëru, dunca, e vuréma püblicàa chiche futugrafìe dund in po' véiru i cuštümi di paìisi brigašchi.

E cumënsàm cun ina futugrafia 'ndund in véirë tréi paštùu d'Üpëga, chë la è avüa faita sensautrë 'n lë štüdi d'in futògrafu (difati in véir inë šfund dëdërè ch'ër vòo s'asëmëgliàa in bošc) e 'n li Figun (forsë a Aràscë): difati i tréi paštùu li han dënant i séi bidun ëndund li purtavu a véndu 'r lait o a quagliàa ëndund li andagin ën bandìa.

La é ina futugrafìa dëché 'nteresanta 'ndund in pò véiru a ruuba chë li së mëtin i omu dë šti ani e in pò véiru chë li han de cuuse chë le i fan parésciu ciü bülu: guitai përžempi chë bèla caina cua muštra chë li han e che curpét bèn fait sut' a maglia.

Ëntë šta futugrafìa in pò fìe acorgiursé chë quand la é avüa faita 'r l y avìa ina pasiun per le cuuse d'in viàgë e për le cuuse caraterištiche: l'é fìe për lolì ch'i futografu li s'agradavu quand li pin futugrafàa i paštùu di nöštri paiisi vëštìi aa sa manéra quand li andagin ën bandìa cun e féi.