Stànë për l'Ëncontrë di Brigašchi, che fam túti i ani, l'era ër turn dë Vërdegia.

Don Alvise dë Batì Cua, com l'ama firmarsé, a già fait ina përsëntasiun dë r'ëncontre dë Vërdegia cuscì cumpleta e sëntùa chë ër ni uria pròpi ciù ren da agiugnu. E difati, nue da redasiun da Vastera e në vurém agiugnu ren anche përché fra r'autrë e públicàm r'articulu dë r'amigh giurnalista Marcu Corradi e r'ëntërvista chë l'a fait a Benedetto, a Liliana, a Elisio, a Ezio, a Ivano e a Padre Franco. E vùrém però rëngrasiaa pröpi Don Alvise për loc l'a scriit e pöi tùti i Vërdëgiaschi për loc li sun avui bon a faa ër 6 dë sëtembre, per la bravúra, a generusità r'uspitalità, a caruu e ër sens d'amicisia chë li an dëmustrà e chë li an sapù ufrii a tuti quili, e li eru pròpi tanti, ch'eru përsenti.

Ën salùt e in grasie anche a Don Lanteri, ër nöstrë Munsignuu e Prevu di Brigaschi: e i vurém tuti ben, e e së purtam tuti ën le coo i sei sëntiminti e loc ër në sa dëlongh dii.

In grasie anche a Valentino, ër nòstr sunauu, e pöi, anche dë coo, in grasie aa Pro Loco, ar sé Përsident e ae braviscime Femne dë Vërdegia per le tante cuose bone chë le n'an fai asagiaa.

E së pùrtam drint in'argòrd vivë da bela giurnaa che am pasà ën Vërdegia, in'argord ligà a ëngéch de cumusiun ma anche a r'ëntensiun de cuntinuaa a ëncuntrarsé tùti i ani per tegnu vive e couse chë në stan a coo. "Arveiru a stàn chë ven".