La courenda tradisiounal an Bàrmes ì ist coumpounuà ad douì mouvimant, la loungi é la frizà. La prima ditta ad co spasjada è ieret ‘na balà, più anticamant, que li duì balarin, un douant a l’aoutou cou s’ tinhoùnt par lh’avanbras, lou cavalier coun li bras a l’estern di bras ad la dama. Lou pas est sal dla bourée a tre tens. An tens più vizin, sit mouvimant ou i eret costituì da an pas ad poulca, ou s’ tinhount par li fianc é li bras é ou girievount. A la loungi è fasìt segouit la frizà, que is ripetit duì bot. Sit mouvimant ou s’ coumpounit ad doues part: pruma li duì ou s’ pìount par al mans coun li bras tandù é ou baount an po li pe aou tens ad muzica é ou girount an sens ourari, ou tienhount la chamba anterna più dreta, ou fant girìa salla esterna. La courenda at Bàrmes is diferensià da salla di aoutri pais dla Val, parqué ì ist ezegouià an maneri più lenta, più coumposta é an po cadensià, sensa saoutà é sensa agità li bras. Carcun ou diount que sit modo ad balala ou i eret nechessari parqué al gians ou balavount coun li socou é pouiount nhint arzigà ad perdli mentre cou balavount. È zmìet co que da d’aoutrës part, par ezempi an Val Varaita, la maneri ad balà più coumposta é mizura ì fuset propria di pais dl’aouta val, rispet a sai più vizin a la pianura que evidentemant ou i erount più duert al modës cou vinhount da fora.

Ansembiou a la courenda tradisiounal, an Bàrmes, ancoù ancoué, ì vint ezegouià an ocazioun dal fèstes, ‘na muzica tipica qu’ì ist vinuà ant ‘ou tens un di simboul più sintù dla coultura loucal, la “courenda di set saout”. Is coumpounët dou “brandou” é d’una courenda figurà.