Grasië a li ricort é a l’ezempi ad “Jan Janoun” é ad “Luiza”, ‘na dansi que s’avit cazi dizmentià, i vinìt salvà an estremis é touorna antrouduà ant l’ouzou ad touti li dì. Sitta ì ist vunuà una di simboul dla coultura barmenchi, ansembiou aou carateristic coustum tradisiounal é al muziquës ezeguìës escluzivamant coun strumant a corda, vioulin é quitara. Par tanti an sitta muzica ist istà ezeguià da li grup ad Bàrmes an coustum cou partechipavount al festës é a li radoun, nhint mac an Valada, ma co a Turin é Rouma. Mac ant ‘ou secount dopou gouera, sitta tradisioun i avit ancaminà a decadri a caouza più ad tout dou declin demougrafic dou nostrou pais disangouà da l’emigrasioun.

La courenda di set saout i eret istà balà par l’ultim bot ant ‘ou dzembër dou 1974, ant la sala dal festës dl’Oubergi Camussot, ant l’oucazioun di festejamant par lou chentenari dl’alpinizm invernal Italian.

I ieret istà salla iquì l’oucasioun andoua lou Maestro Countino ou ieret riusì miracoulouzamant a salvà lou patrimoni musical ad Bàrmes destinà deznò ad alà pardù. Sounant quial medezim li strumant é souvrapounant al registrasioun ou l’avit ricoustruì da soul nhint mac lou brandou é la courenda di set saout, ma co ‘na loungi serië d’aouti toc d’anterès é ouriginalità.

Dopou n’intervallo durà oltre vint an, ant lh’ultim tens la courenda di set saout ì ist tournà a rivivri grasië a la bouna voulountà d’an group d’apasiounà. La dansi ist istà ricoustruià grasië a ‘na rica coulesioun ad foto d’epouca, ma più ad tout par merit ad n’atacamant a la tradisioun ad carqui Barmenc, cou l’ant voulù trazmatri a li joun li propi ricort. Tra sitti voulèn ringrasià più ad tout an bèl group ad Barmenc, coume Rita é Nicola, coume Mimì, coume Titìn Barbounnat, Nini Baraquin, Marianatta, Franchesca, Marianina, Beppe é pe d’aouti ancoura. É rivoulgen co an pensé ricounhousant a sai que purtrop ou z’nant jà alà.

Tanti ad sai que ancouè ou balount la courenda di set saout ou sount joun é è piait pensà que carcun ad lour, magara tra mes secoul, ou sarant ripetri l’esplouà ad Jan Janoun é Luiza.