Un esglhai ente l'arma, de set talhs.

Dolor unenca, ente l'arma, ente l'arma,

pas maiq lo còr, apres, tota la vida;

esglhai de croç: vergadas, clhòs, espinas.

 

Ah Dolorada.

Dolor doenca: eisili, en Faraonha;

long, afros romelhatge; pàren l'aire

ilhs nòucents inocents, ilhs mas-sacrats.

 

Ah Dolorada.

Dolor tresenca: pèrder, pas pus vèire

lo Filh, Jésus lo Crist, tres jorns, tres nuèchs,

mai-estat de sia mòrt reviscolanta.

 

Ah Dolorada.

Dolor quatrenca: la via de la croç,

sang per la terra, plhors, renegs en l'aire.

 

Ah Dolorada.

Dolor cinquenca: miralh de la croç:

tota aquela dolor es dins son arma,

arma miralh de Diòu, Diòu de dolor.

 

Ah Dolorada.

Dolor sieisenca: lo Filh mòrt en fauda;

mòrt mas sias plhagas èren totas vivas.

 

Ah Dolorada.

Dolor setenca: lo Filh estremat,

dins lo sudari, dins la peira dura,

ente tias grimas han laissat ilhs marcas.

Ah Dolorada.