(Remarques de vido nostro d'autri temps)

Piera Rous di Rous Soubirans

 

Ista, estajoun de souléi e de chaud, ma decò de gruès tempourals, de troun e d'eslussi: la esmeho souvent que lou cièl e li mountanhes se duèrben e rùnen chabal, al founs di valouns.

'Na vinco, quouro dins li ruha i aviho bèn de famihes, se semenavo prou de champs de bia, fourment, bòdi: minjàr de touto l'annado. Un gruès tempoural ou uno greliado  èro la fin de tout.

- «Se li nebies van vers San Pèire, piho lou dài e tourno aréire... Se van envers la mar, piho lou dai e vai à chiàr! » -.

-Se la tròno envers lou Col (de l'Ourtiho, en Coumboscuro), pièvo n'en vòl » -.

-Se la tròno envers lou Bourq (Borgo San Dalmazzo) la empìs lou gourg »-.

   Aquisti èren entra li prouverbis li mai escouta dal temps de l'ista e nous demòstren coumo la gente de mountanho, à la primièro nebio bruto èro piha de l'engourf e de l'afre

   Primièro causo da far quouro coumençavo à  trounàr e à piòure fort, èro de sounàr à grando vous li choques dal chouquiher e acò touchavo al sacristo ou al préire. A la fin de l'ista lou sacristo passavo 'bou uno bissacho e, se la .recolto èro ana bèn, toutes li famihes ié dounàven uno palouta ou doùes de granes de robo.

   Un autre escounjùr dal tempouràl èro decò aquest: uno frémo ou doùes per ruha pihàven un pau de braso, la pourtàven foro, al mès de l'ièro, ié butàven sus uno pinha d'èrbo, de isòp (e un'autro encaro, que n'ai pus trouba lou noum) e cuerbihen 'bou un segelìn ou uno bassìno de ram. Li èrbes brusàven pian pianét e paràven li grèles.

   Se pourtavo decò foro de meisoùn, sout de la pièvo, la chéino dal fournèl e se butavo l'apio e lou pourès en fourno de crous, per tenìr luénh l'amo dal diàu.
   I aviho de òmes que pihaven la messoùiro la mai grosso, anàven sout de la pièvo e se desbrassàven à tranchàr a vuéid dins l'aire. La messoùiro fasiho da armo, per coupàr l'amo dal malình, que esfougavo 'bou la tempèsto sa rabio envèrs li òme e tout acò avariho jounch à la grosso miserio di temps un'autro charestìo.