S'es passa lou 26 e 27 d'avoust, dins lou jòli vilage de la val Cluzoun, ilai ente «la valaddo» se fai mai rudo e auto (iqui passavo anticament lou counfin en tra lou Dòufinat e lou Piemount) e la parladuro pren un gaubì tout mountagnard, de puro soucho d'Oc.

   Soun esta doùe urouse journade, debana sus lou prougramo qu'avihen presenta sus lou derrihe «Ressoun de Coumboscuro». Lou dissate à la Coumuno, lou Counséi Coumunal a delibera que lou noum dal vilage es LOU ROURE e pus e jamai «Roreto».

   Lou dimenche, malgrat un pau de pièvo, qu'a rèn degasta, inauguracioun de la «Vio Frederi Mistral», cerémounìo touchanto e pensadivo, abou lou apaciouna descours dal manteneire Sandre Cerile Gay e la resposto dòu Capoulié Reinié Jouvau. Après Messo dicho e chanta touto en prouvençau (pouli e clar sermoun Doun Livio Brun), sesiho coulturalo (bouleganto e vivo, bèn se rèn ourtoudòsso e respetoùso dal tèmo coultural: avén pus d'espaci, malurousamen, per n'en parla mai aisa) e dins la sesiho la premiacioun del «2°Councours de Pouesìo e Prozo en lengo d'Oc «Lou Roure».

   Après soupado festo e danço sus l'esplanado de juèq, abou li group prouvençau  «Reneissenço Prouvençalo» de Vedèno (Avignoun), «Li Geinesto» (Souliès-vilo),  «Sisteroun» (coulourido gent de gavoutino!), Bacchu-Bèr (espadounaire de Pount-de-Cervièro), Fenestrela e siéi espadounaire, Varacho (abou lou linde coustume de la Baiho), Abaiho Couralo val Cluzoun, Coumboscuro e «La Montanina da Viarét ».

   E un tube de mounde, que s'es enfouti pa mal de la pièvo e dal bagna, talament qu'enfin lou marri temp s'en-es ana e es sahi lou serén.

   La reussido d'aquelo grando engimbrado vai la mai part al Conse de Lou Roure, Ettore Merlo, que senço tapaja, a travaia founs e a mena l'oupinioun publico e li ouperacioun amenistrativo an-aqui resulta abou coustanço, equilibri, serieta esemplari.

   Que la coumuno de Lou Roure siegue un simbòle de realita prouvençalo dins noste valade d'Oc.