«Lou Roure»

(Roure/Roreto-val Cluzon)

 

   S'es debana lou 17 de outoubre, per l'enteressament forço mai souagna de la Pro-Roure e souto la bono alo de la Coumuno. Sa reussido nous a rebattu la coufourtablo sitouacioun de la val Cluzon, anima per un estrambord esemplari per sa lengo d'Oc e en trin de recupera uno counscienço prouvençalo-òucitano vertadierament seguro e coumbativo.

   Val Cluzon e val S. Martin (que n'en fan pi uno souleto e grando) an respoundu à l'iniciativo -da Pramol à Fenetrela à Prajala- abou de pouesìo genìco, soustancia d'un afougament esperançous d'avenir, que rapresento vertadierament la forço e la Muso founso de noste mounde patoisant.

   La Jurìo a rescountra un nivèl mèdi de qualita esquisiho, ente lou prouvençau-alpin pousso à si natural resulta sa noblo voucacioun lirìco, de souco troubadourìco-mistralenço.

   Encaro en cop li coumpousicioun prouvençales manda al roure soun esta vous d'uno esperienço souferto e atoualo, en foro de touto coumplasenço passatisto e foulclourìco. 

   Me, e li proses? Es iqui, dins lii counte en proso, que cuieién li poussibleta nouveles nostro lengo: acò per lou merit di brave cuentaire e de Sergio Ottonelli en particuliér, emé soun « Aprentissatge »: escourregudo narrativo, soustancia d'uno noblo e amaro meditacioun sus un tissu lenguisti en tra pavesian e rudament persounal.

   Per li vers uno mencioun vai facho de la lirìco de Franco Bronzat (Viarét) «Deèsso maire»,  per soun urouso mitisacioun di forces segretes touchantes l'amar ideal de nostre rescubert mounde patoisant.

   Braves le Pro-Roure e la Comuno! Se à Roure intrè dins lou burèu dal Conse, ié troubè escrich:

«Eici parlén lou patois». Esempi magnifi e courajoùs à prou de conse malate de qualounquismo bourgués, que se despatoùien pa mal, per la pòur de se far counouisse prouvençau e mountagnard: em'acò tradìssen, abou sa lengo, sa gent e sa valado touto entiero.