"I BARMAS" a fach lou vir di valade prouvençale, coumo tuchi i an despi. E a pa manca de paréisse à la piano, ente la troupo de la Coumboscuro l'a douna à Couni, lou 22 de genìe, per i estudiant de la vilo (magistrale, licèu, ITI, proufeciounale) d'après la bravo e encoumiablo iniciativo de i amis estudiant de la 5^C de l'ITI (Istituto Tecnico Industriale). Aquisti bravi joùe - patoisants ou rèn patoisants - se soun enmedesima de la questioun de la sauvogardo coulturalo di valade oucitane e an douna espountanament sa coulabouracioun. Gramacis à Segne lou Preside, prouf.Paltrinieri, à li coulègo proufessour qu'an vourgu èstre abou nousiauti, an-aqueli brave estudiant.

-La journado centralo per "I BARMAS" es esta aquelo dal 12 de genìe à Sancto Lucìo de la Coumboscuro, abou un fube de mounde, qu'èro ilai per nous estrégne dins lou cerqui de soun amistà franco e chaudo. Oh, coumo i avén sentu dapè aqui fraire di valade e de la piano, aquel vespre d'uvern! e que chalour counsoulanto sentihen dins noste cor, maugrat la fréit rèdo. Sabén qu'eren mounta à la Coumboscuro, mena dal noste medesme ideal: qu'es l'ideal de l'atacamen à la coulturo de nosto terro prouvençalo, per n'en tira forço per l'avenìr, en noum de la liberacioun de l'óme anienta, desumanisa, acrasa d'uno fausso civilisacioun galòiso e materialisanto. A la fin es iquilou sens de noste grèu travai: es  UNO QUESTIOUN DE MOOUDERNITA, es UNO QUESTIOUN DE LIBERTA!

-"I BARMAS" DINS I VALADE- Lou 3 de genìe à VOUDIER es esta l'oucasioun de estrégne per lou premìe bot uno franco e couralo amistanço abou i brave gent de la val Ges. Sus l'oundo dal dramo pastoural avén descourgu, avén chanja i nuèste idéie e nous sen trouba d'acorde sus prou de argument. Gramacìs, fraire patoisants de Voudier: gardén dins noste cor vosto caro amista. Gramacis, don Brignone, à vous que nous avé ouspita tan generousamèn.

-Lou 6 de genìe vaqui Coumboscuro à LA ROCHO de Drounìe, à renouvela abou lou brave Don Ghìo e li gent d'ilài uno vieio amistanço. A La Rocho sen de famiho,uromai. Courage, gent de la Rocho! Vousiauti -à dui Km. da Drounìe soulamèn- vous troubè à la frountièro dal patoua abou la piano: es uno pousicioun delicado. Tené aut lou drapèu de vosto lengo prouvençalo, voulè bèn an-aquesto lengo, beiqué de la moustra ai vuèsti fihét. Disèn encaro na vinco, senço s'estoufia: ES UNO OUESTIOUN DE LIBERTA !

-Lou 17 de genìe à CHASTELDELFIN - abou la guiéiso bourra de mounde (na bono part descendu de Blins (fidèl fraire de Blins!), present decò Gian Renzo Mortéo, Direitour artisti dal Tiatre Stabile de Turin. Gran bello terro la capitalo de la Chastelado varachenco: terro que nous reveio l'ideio antico d'uno grando Prouvenço mountagnardo, fiero d'uno soùo civilisacioun. Encaro  en bot l'avén sentuho l'oundo d'estorio e de rudo tradicioun, que quìto pas de passàr sus aquele aute tèrre; e parimèn l'<avihen> jo sentuho lou jour de l'an, que per coumençar bèn nosto annado patoisanto -jolio e crous- èren à FRAISSE, entra aquelo bono raço de <Varachenq> que soun li Frassiròl. A èli avén parla à cor dubert, coumo ai fraire de la Chastelado. E de la mèsmo manièro franco disén noste "gramacis" è i préire que nous an ouspita, vèr portoensigno de l'idéio de liberta espritalo. Devén pensàr que tout acò finiarè en journ? Ou sarè la fede à la gagna sus un mounde que vol nous ramaçàr dins lou gourg di fuéie morte?