Es jòli de véire tuchi i an - la secoundo diamenjo de juiet - la loungo proucessioun de patoisants, que chànten e préguen chapuéi dal chamin que mounto per la Coumboscuro. Prèguen e chànten en prouvençau. Préguen e chanten abou l'umilta e la fervour de qui retrobo la meisoun dal paire - es à dir, la relijoun, e la lengo di viéi. O, belèu, creié que i nuèsti réire preguéssen en lengo touscano, es à dir, en italian?

   O sabé pa que encaro uro i-a de viéi que de séro, quouro an barra l'uis de la vòuto, se fan la crous e dihen: «Estoussero me vau coujàr, sai pa lou matin se me vau levar; demandou tres cause à Iddìou...» ?

  O sabé pa, vous, que vous enrihé d'acò, que prou de amis de la plano vénen iqui, à pregàr abou nous, ent'aquesto nosto lengo reiralo, que nou parlo de uno fede, antico? Acò lou vihén tuchi an al Roumiage de la Vierge Adoulourado, e l'avén vist justamen decò aquest an, lou 11 de juiét: i amis de Couni, de Turin, de Saluce, de la plano e di valade an prega e chanta tuchi ensém, an escouta i descours sus i misteri Jouious dal Rousari, tengu da i préire di valade Mairo e Varacho, da D. Jourdàn e dal noste D. Fiandra.

 O vous, que avé pa fede dins nosto lengo, lou sabé perqué touto aquelo gent fourestiero ven prega abou nous dins "nosto lengo mespresado" ?

O vous que avé pa fede dins nosto fede, lou sabé perqué tuchi i an aqui préire di valade venen coumenta lou S. Rousari dins " nosto lengo mespresado" ?

   O vous qu'avé pa fede dins uno trebulacioun que purifico, sabé dir perqué après l'ouferto d'aquest pelerinage nou sentén pus pasiha abou lou Segnour ?

   Lou sabé tout acò, vousiauti tuchi, qu'avé pa fede dins la pouesìo di cause umìle e poupoulare ?